بەيسەنبى, 19 قىركۇيەك 2024
3866 0 پىكىر 26 اقپان, 2018 ساعات 09:13

تاشكەنت ەكس-باس پروكۋرور راشيد كادىروۆتىڭ ۇستالعانىن راستادى

وزبەكستاننىڭ باس پروكۋراتۋراسى بۇرىنعى باس پروكۋرور راشيد كادىروۆتىڭ ۇستالعانىن رەسمي راستادى. اتالعان مەكەمەنىڭ مالىمەتىنە قاراعاندا، كادىروۆقا قاتىستى قىلمىستىق كودەكستىڭ 165-بابى («بوپسالاۋشىلىق»), 205-بابى(«بيلىكتى نەمەسە قىلمىسىن اسىرا پايدالانۋ») جانە 210-بابى («پارا الۋ») بويىنشا ايىپتار تاعىلعان.

باس پروكۋراتۋرا ءباسپاسوز قىزمەتىنىڭ وكىلى ۆوحيد شاروپوۆ 23 اقپاندا «كادىروۆ قاماۋعا الىنعان جوق، وعان قاتىستى ەشقانداي تەرگەۋ ءجۇرىپ جاتقان جوق» دەپ مالىمدەگەن. بىراق 24 اقپاندا مەكەمە رەسمي تۇردە راشيد كادىروۆتىڭ ۇستالعانىن، وعان قاتىستى ءۇش باپ بويىنشا قىلمىستىق ءىس قوزعالعانىن مالىمدەدى.

دەرەككوزدىڭ حابارلاۋىنشا، 22 اقپاندا راشيد كادىروۆتىڭ ءۇيىن ءتىنتىپ، ءوزىنىڭ قولىنا كىسەن سالىپ، الىپ كەتكەن. ەكس-باس پروكۋروردىڭ 42 جاستاعى ۇلى الىشەر كادىروۆ ون كۇن بۇرىن ەلدەن قاشىپ كەتكەن.

66 جاستاعى راشيد كادىروۆتى ءوزى ون بەس جىل باسقارعان باقىلاۋ ورگانى تەرگەپ جاتىر. ول 2015 جىلدىڭ ءساۋىر ايىندا وتستاۆكاعا كەتكەن. دەرەككوزدىڭ مالىمەتىنشە، كادىروۆپەن بىرگە تاعى دا پروكۋراتۋرانىڭ بۇرىنعى ەكى شەنەۋنىگى ۇستالعان.

Abai.kz

0 پىكىر