قۇرمەتتى الىس-جاقىن شەتەلدەردەن ورالىپ، ۇلى دالا ەلىنىڭ جوعارى وقۋ ورىندارىندا ءبىلىم الىپ جاتقان قانداس ستۋدەنتتەر!

مەنەن زاڭدىق كەڭەس سۇراپ، كۇندىز-ءتۇنى تەلەفون شالاتىن قانداستارىمىزدىڭ قاتارى تىم كوپ، وتە كوپ.

سوعان بايلانىستى، كەشتەۋ بولسا دا  "WhatsApp" الەۋمەتتىك جەلىسىنەن «قانداس ستۋدەنتتەر» دەگەن توپ قۇرىپ، بۇدان بىلايعى جەردە سىزدەرمەن بىرگە بولۋدى شەشتىم.

سەبەبى، سىزدەر – جاسسىزدار، حات تانيسىزدار. ودان قالا بەردى، ءاربىرىڭىزدىڭ ارتىڭىزدا اتا-انا، ناعاشى-جيەن، قۇدا-جەگجات، دوس-جار، اۋىلداس-ايماقتاس  سىندى نەشە جۇزدەگەن قازاق اتاجۇرتقا كەلۋدىڭ ءسات-ساعاتىن كۇتىپ وتىر. ەرتەڭ ولار كوشىپ كەلىپ، سىزدەرگە تابان تىرەيدى. سوندا، سىزدەر اۋىلداسىڭىزدى قالاي تىركەۋگە تۇرعىزۋدىڭ جولىن بىلمەي، ەلدەن سۇراپ جۇرسەڭىزدەر، ۇيات بولادى. زاڭ اياسىندا بەلگىلەنگەن الەۋمەتتىك تيىمدىلىكتەردەن پايدالانۋدىڭ جولىن ايتىپ بەرە الماساڭىزدار، اعايىندارىڭىز «ايعا قاراپ ءجۇردىڭ بە، بالام؟!» - دەپ، جازعىرادى ءسىزدى. اكىمشىلىك قۇقىق بۇزۋعا ۇشىراعان تۋىسىڭىزدى زاڭ اياسىندا قورعاي الماساڭىزدار، ءتىپتى ماسقارا بولاسىزدار!

سول ءۇشىن، بۇل توپ باسقا توپتان وزگەشە بولۋى كەرەك. مەن كوك مىلجىڭ، بوس ءسوزدى ۇناتا بەرمەيتىن اداممىن. ودان گورى، بىرەۋ بولسا دا ءىس تىندىرعان دۇرىس!

مەن – اۋىت مۇقيبەك – وزدەرىڭىزدىڭ قانداستارىڭىزبىن.

1998 جىلى 24 قازاندا قىتاي حالىق رەسپۋبليكاسىنان ورالعانمىن. ءجۋرناليستپىن. ولەڭ جازام. اتاجۇرتقا كەلگەننەن بەرى «جاس جۇرەك جايىپ ساۋساعىن»، «قالقاتايعا قاراي-قاراي تالدى كوز»، «ءمولدىر»، «الپامىس تەكتى ۇل»، «كوش، كوشكە كىم ءوش؟!»، «ۇلىلىق پەن ماڭگىلىك»، «زاڭ تۇزەلدى، قانداسىم، سەن دە تۇزەل!» اتتى كىتاپتارىم جارىق كورگەن.

سوڭعى ون جىلدىڭ كولەمىندە ەلباسىمىزدىڭ كوشى-قون ساياساتىنىڭ قولداۋشىسى رەتىندە الىستان ورالعان قانداستارىمىزدىڭ قونىستانۋ، قۇجاتتانۋ، الەۋمەتتىك جەڭىلدىكتەردەن يگىلىكتەنۋ بارىسىندا تۋىنداعان ماسەلەلەرىن زاڭ اياسىندا شەشۋمەن اينالىسىپ كەلەم.

2015 جىلى قازاقستان رەسپۋبليكاسىنىڭ پارلامەنتى ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوشى-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن تالقىلاۋعا قاتىسىپ، «حالىقتىڭ كوشى-قونى تۋرالى» زاڭعا بىرقاتار تولىقتىرۋلار مەن وزگەرىستەر ەنۋىنە ىقپال ەتتىم.

بيىل دا – 2018 جىلى دا ماجىلىستەگى جۇمىس توبىندا بولىپ، «ورالمان» مارتەبەسى ءوتىپ كەتكەن قانداستارىمىزدىڭ ماسەلەسىن شەشتىم. زاڭ جوباسى ءماجىلىستىڭ ءبىرىنشى وقىلىمىنان ءوتتى. ەندى ەكىنشى وقىلىمنان، ونان ارى سەناتتىڭ ماقۇلداۋىنان وتسە، ەلباسى قول قويادى. سونىمەن اتالعان زاڭ باق-تا جاريالانعان سوڭ قولدانىسقا ەنەدى...

مەن قازىر «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە كەڭەسشى (كونسۋلتانت) بولىپ قىزمەت اتقارامىن.

قۇرمەتتى ستۋدەنتتەر!

ەندى "WhatsApp" الەۋمەتتىك جەلىسىنەن «قانداس ستۋدەنتتەر» دەگەن توپ قۇرىپ، سىزدەردى «ءبىر شاڭىراق» استىنا جيناۋداعى ماقساتىمدى ايتايىن.

قازاقستان رەسپۋبليكاسىنىڭ كونستيتۋتسياسىننىڭ 1-بابىنىڭ 1-تارماعىندا «قازاقستان رەسپۋبليكاسى ءوزىن دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە ورنىقتىرادى، ونىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى» - دەپ جازىلعان.

دەمەك، ءبىز – قۇقىقتىق مەملەكەتپىز. ءوز ءومىرىمىز بەن قۇقىعىمىزدى قورعاۋ ءۇشىن، ەڭ الدىمەن، زاڭدى ءبىلۋىمىز جانە زاڭعا جۇگىنۋىمىز كەرەك!

شەتتەن ورالعان  ەتنيكالىق ستۋدەنتتەر ءۇشىن العاشقى ادىمدا  «حالىقتىڭ كوشى-قونى تۋرالى» زاڭى مەن ۇكىمەت قاۋلىلارىنداعى جانە  نورماتيۆتىك قۇجاتتارداعى وزدەرىڭىزدىڭ قۇقىقتارىڭىز بەن مىندەتتەرىڭىزدى بىلۋلەرىڭىز جانە ونى اتقارۋشى بيلىكتەن تالاپ ەتۋلەرىڭىز شارت. سوندا عانا سىزدەر ۇلت كوشباسشىسى، ەلباسى نۇرسۇلتان نازارباەۆتىڭ ءوز پارمەنىمەن وزدەرىڭىزگە جاساپ وتىرعان قامقورلىعىنان تولىق پايدالانا الاسىزدار!

مەنىڭ سوڭعى شىققان كىتابىمدى «زاڭ تۇزەلدى، قانداسىم، سەن دە تۇزەل!» دەپ اتاۋداعى ماقساتىم دا سول!

ەندەشە، بۇگىننەن باستاپ، مەن ءوز تاجىريبەمە سۇيەنە وتىرىپ، قولدانىستاعى زاڭدار مەن  نورماتيۆتىك قۇجاتتار توڭىرەگىندە سىزدەرگە ءدارىس بەرەتىن بولام.

سونداي-اق، سول قۇقىعى تاپتالىپ، تيىمدىلىكتەردەن يگىلىكتەنە الماي كەلە جاتقان ستۋدەنتتەردىڭ زاڭ اياسىندا ماسەلەلەرىن شەشەتىن بولامىز!

ەسكەرتۋ:

1. "WhatsApp" الەۋمەتتىك جەلىسىندەگى بۇل توپقا تەك قانا ستۋدەنتتەر كىرەتىن بولسىن;

2. توپقا قاتىسسىز ۆيديو، سۋرەت سالۋعا تيىم سالىنادى;

3. جۇمىس بابىمەن تەك قانا قىزمەت ۋاعىندا حابارلاسۋ كەرەك.

وسى «ەرەجەنى» ءۇش مارتە بۇزعان ستۋدەنتتەر توپتان شىعارىلادى.

تەل: +77019884189

ەلپوچتا: oimanbulak@mail.ru

توپ جەتەكشىسى: +77088164699 (توپقا وسى جىگىت ارقىلى قوسىلا الاسىزدار)

مەن سىزدەرمەن بىرگەمىن، ءىنى-قارىنداستارىم!

زاڭدى بىلەيىك، زاڭمەن ءومىر سۇرەيىك!!

قۇرمەتپەن،

اقىن،

قازاق كوشىنىڭ جاناشىرى

اۋىت مۇقيبەك

27.02.2018

استانا

Abai.kz