پلانشەتتەگى پالەن-پاشتۇگەن...

 1. كورشىنىڭ ۇرىسقانى – كوڭىل كوتەرەدى.

2. حالىققا قىزمەت ەتۋ – بالاڭدى تاربيەلەۋدەن باستالادى.

3. قازاقتا ۇيىمشىلدىق پسيحولوگيا جوق. ايتپەسە، بىزدە دە فۋتبول داميتىن ەدى.

4. بىزدەر بولشەۆيكتەردەن قۇتىلدىق، كوممۋنيستەردەن قۇتىلدىق، ال باتىراش-قوتىراشتاردان ارىلاتىن ەمەسپىز. ارىلا المايتىن دا شىعارمىز...

5. بيلىككە بارعاننىڭ ءبارى اقىلدى بولسا – ەلىمىز باياعىدا گۇلدەنىپ كەتەر ەدى.

6. بىزدە ەرتەڭگى ەلۋ جىلىن ويلاعان اكىم كورسەم – كوزىم شىقسىن.

7. كرەسلوعا وتىرعاننىڭ – كوڭىلى كوتەرىڭكى.

8. قازاق ادەبيەتى قانداي باي بولسا، قازىرگى ادەبيەتتىڭ ينتەللەكتىسى سونداي – جۇدەۋ.

9. ەڭ وڭاي نارسە - ادام بوپ ويانۋ... ەڭ قيىن نارسە – ادام بوپ جاتۋ...

10. وسى كۇندە تەرميندەردى قازاقشاعا اۋدارىپ ءجۇر. بۇل جاقسى. ال، كوپ جاعدايدا وسى ءتارجىما دۇرىس ەمەس. ءبىزدىڭ جازۋشى-جۋرناليستەر ورىسشا تۇرماق، اعىلشىن، گرەك، ياعني حالىقارالىق، الەمدىك سوزدەردى اۋدارادى. كەيدە ءتىپتى كۇلكىڭ كەلەدى. مىسالى: «ارتيست»، ءسوزىن – «ءارتىس» دەپ اۋدارىپتى. گرەكشە «ارت» ءسوزى، (ونەر، تۆورچەستۆو), «يست» – «ورىنداۋشى»  دەگەن ۇعىم.  ياعني، ونەر يەسى. سول ونەردى اتقارۋشى دەگەن ءسوز. ال، «ءارتىس» – تۇسىنىكسىز. جولدان قوسىلعان – جولداياق. بىزگە ءۇيدىڭ ىشىنەن ءۇي تىگۋدىڭ قاجەتى جوق. ۇلى وركەنيەتتەن شەتتەمەۋ كەرەك. قازاقتار دا الەمدىك وركەنيەتتىڭ، مادەنيەتتىڭ ءبىر بولشەگى.

11. سۇلۋ قىزدى كورگەندە – ايەلىڭ سۇرىقسىز بولىپ كورىنەدى.

12. الاتاۋدىڭ قادىرىن – استانادا بىلەسىڭ...

13. الماتىدا جەر سىلكىنسە – استانالىقتاردىڭ زارەسى ۇشادى.

14. كارى ءبيشى بيلەسە – ەستى كورەرمەن ەدەننىڭ شەگەسىن سانايدى.

15. اكىم قاشان كەتەم دەپ ويلايدى،

اقىن قاشان كەلەم دەپ ويلايدى.

16.پالەلى قىزعا جولاساڭ - پوماداسىنىڭ ءىزى قالادى.

17. جاقسى مولدانىڭ ءۇش قاسيەتىنە كوڭىل اۋدارام... بىلىمىنە، ماقامىنا ءھام ساقالىنا...

18. حالىققا قىزمەت ەتۋ قۇدايعا قۇلشىلىق جاساعاننان دا قيىن.

19. دولى قاتىن اتوم بومباسىنان دا جامان.

20. كەشەگى كوممۋنيستەردىڭ كوبى – بۇگىندە «نۇر وتاننىڭ» مۇشەسى بولعان. ال، بۇگىنگى كوممۋنيستەر تەك كوڭىل كوتەرۋ ءۇشىن... كلوۋنادا...

21. قۇدايدان قورىقپاعان – فينپولعا جەم بولادى.

22. زيراتقا بارعاندا – تاۋبەڭە كەلەسىڭ...

23. سامولەتكە وتىرعاندا – ۋاقىت وتپەيدى.

24. امەريكانىڭ قاراسىن كورگەندە – قازاقتىڭ قاراسى اپپاق بولىپ كورىنەدى.

25.  انانىڭ ماحابباتى شەكسىز، ءسابيدىڭ رياسىزدىعى شەكسىز، ادامنىڭ اقىماقتىعى شەكسىز...

26. تسيفرلى مەملەكەتتىڭ، نانوتەحنولوگيانىڭ - ادامگەرشىلىككە ەشقانداي قاتىسى جوق...

27. ءبىر كۇندىك ماقساتپەن ءومىر سۇرگەن قوعامدا مەملەكەت قۇرۋ مۇمكىن ەمەس...

28. وپپوزيتسيا بولۋ ءۇشىن – الدىمەن اقىل، سونان سوڭ اقشا كەرەك.

29. لەگاليزاتسيا كاپيتالا ناچيناەتسيا س گولوۆى.

30. شەت ەلدە ءۇيى باردىڭ – ەكى جانى بولادى.

31. التىن ءتىسىڭ بولعانشا – كۇمىس ساقيناڭ بولسىن.

32. كوك اسپان - شەكسىز، كوك تەڭىز - شەكسىز، كوڭىل – شەكسىز...

33. بىزگە گەرادوتتان گەراعاڭ جاقىن...

34. ومىردەگى باتىراشتان – ونەردەگى قوتىراش قاۋىپتى.

35. مەشىتتەن شىققاننىڭ ءبارى – پەرىشتە ەمەس.

36. ساقالسىز مولدا كورسەم، رايكومنىڭ حاتشىسى ەسكە تۇسەدى.

37. سپورت تا، ونەر دە – ۋاقىتقا تاۋەلدى. سپورتتا تاعدىرىڭ سەكۋندتارمەن ولشەنەدى، ال ونەردىڭ باعاسىن جىلدارمەن بىلەسىڭ...

38. ايەلىن سىيلاماعان – كەلىنىن دە سىيلاماس...

39. تەلەديداردان ايتىلعاننىڭ ءبارى – شىندىق ەمەس.

40. بايدىڭ تويىنا بارعىڭ كەلمەيدى.

41. اقىماق قاتىن قىرىق جاسىندا دا قىز بولام دەپ قىلىمسيدى.

42. وپەرا تەاترىندا جارتىسى سپەكتاكل كورۋ ءۇشىن بارسا، جارتىسى كويلەگىن كورسەتۋ ءۇشىن بارادى.

43. كويلەكسىز قىز بولسا دا، شالبارسىز قىز بولمايدى.

44. دجينسى كيگەننىڭ ءبارى- جىگىت ەمەس.

45. شاممەن وتىرعاننىڭ ءبارى – رومانتيك ەمەس.

46. ءدجيپتىڭ دە جەلى بولادى.

47. تولعاق تەز ۇمىتىلادى، سايلاۋ تەز ۇمىتىلادى، جاقسىلىق تەز ۇمىتىلادى...

48. بۇرىن اقىننىڭ جيىنىنا باراتىن ەدىك، ەندى اكىمنىڭ جيىنىنا باراتىن بولدىق.

49. بۇگىندە سويلەگەننەن ۇندەمەگەن ءتيىمدى.

50. قازى جەگەننىڭ ءبارى – قازاق ەمەس.

51. قادىرىڭدى بىلمەيتىن قاتىن جامان، قامشىلاساڭ جۇرمەيتىن اتىڭ جامان.

52. جالاقى العان – جارىماس.

53. اقىل ايتقاننىڭ ءبارى- كوسەم ەمەس.

54. ادەمى قىزدىڭ اقىلى – اينادا بولادى.

55. اكىمنىڭ بالاسى – اكىم بولسا، تاڭدانبايسىڭ، اكىمنىڭ بالاسى – اقىن بولسا، تاڭداناسىڭ.

56. سۇيكىمدى بوپ كەلۋدەن - سۇيكىمدى بوپ كەتۋ الدەقايدا قيىن...

57. اتاق، ابىروي، قۇرمەت – ول قوعامنىڭ ساعان بەرگەن قارىزى.

58. ءبىر نۇكتەگە قاراپ وتىرعاننىڭ ءبارى ويشىل ەمەس...

59. پايداسىز قالعان تۇز جامان،

تاڭەرتەڭ كەلگەن قىز جامان.

60. قازاقتىڭ ءانى مەن كۇيى بىتكەن كۇنى قازاق جەر بەتىنەن جويىلادى.

61. ەڭ ۇلكەن ەرلىك – اتاقتى بولا تۇرا قاراپايىم بولۋ...

62. قاتىنىنا قارايلاعان ەركەكتەن ەلدىڭ قامىن جەيتىن ەر شىعادى دەۋ- وتىرىك.

63. بايىنان كۇندىز-ءتۇنى قاتەلىك ىزدەگەن قاتىن – سورلى.

64. ءبىر-بىرىنە سەنىمسىز ادامدار عانا «ءبىز ءبىر-ءبىرىمىزدى سۇيەمىز» دەپ جار سالادى.

65. اقىماق قاتىنعا ۇرى دا ءبىر، ۇلى دا ءبىر.

66. ماحاببات – اللانىڭ ادامعا بەرگەن سىيى.

67. تاڭەرتەڭ سايراۋ تەك بۇلبۇلعا جاراسقان...

68. باقانىڭ دا ءوز ءتىلى بولادى.

69. تاڭ اتپاي بىرەۋدى ءسۇيۋ – تەك اناعا جاراسقان...

تالعات تەمەنوۆ،

قازاقستاننىڭ حالىق ءارتيسى، پروفەسسور  

Abai.kz