پروكۋرور توقماديدى "كىسى ءولتىرۋ" بابى بويىنشا ايىپتى دەپ تانىپ، 11,5 جىلعا سوتتاۋدى، بۇعان دەيىن كەسىلگەن جازانى قوسىپ، بارلىعى 12 جىل باس بوستاندىعىنان ايىرۋ جازاسىن كەسۋدى سۇرادى. پروكۋرور سونىمەن قاتار توقماديدەن 356 مىڭ تەڭگە ساراپتاما جاساۋعا كەتكەن شىعىندى ءوندىرىپ الۋدى سۇرادى.

ال توقماديدىڭ ادۆوكاتى ونىڭ قىلمىستى ء"وز ءومىرى مەن جاقىن تۋىستارىنىڭ ءومىرى ءۇشىن قاۋىپتەنگەننەن" جاساعانىن، "كىناسىن مويىنداپ، تەرگەۋگە بولىسقانىن" ايتىپ، جازاسىن بارىنشا جەڭىلدەتۋدى سۇرادى.

توقمادي تاعىلعان ايىپتارمەن "كەلىسەتىنىن", "كامەلەتكە تولماعان بالالارى بارىن ەسكەرۋدى جانە پروتسەسسۋالدىق كەلىسىم جاساسقانىن" ايتىپ، جەڭىل جازا تاعايىنداۋدى سۇرادى.

سوت ۇكىمى 16 ناۋرىزدا جاريالانباق.

ناۋرىزدىڭ 8-ءى كۇنى كەشكە مۇراتحان توقماديدىڭ "جامبىل وبلىستىق اۋرۋحاناسىنان قاشىپ كەتكەنى" حابارلانعان ەدى. 9 ناۋرىز كۇنى ۇقك توقماديدىڭ ۇستالعانىن مالىمدەگەن.

تەرگەۋ بولجامى بويىنشا، توقماديگە ادام ولتىرۋگە تاپسىرىستى تاتىشەۆ قازاعا ۇشىراعان سوڭ بىرنەشە ايدان كەيىن "تۇرانالەم بانك" باسشىلىعىنا كەلگەن مۇحتار ءابليازوۆ بەرگەن دەلىنەدى. 2009 جىلى بتا بانكتى (بۇرىنعى "تۇرانالەم بانك") مەملەكەت قاراماعىنا العاننان كەيىن شەتەلگە كەتىپ قالعان وپپوزيتسيالىق تۇلعا، بۇرىنعى بانكير مۇحتار ءابليازوۆ بۇل ايىپتاۋلاردى "شىلعي وتىرىك" دەپ اتاپ جوققا شىعارادى جانە ءوزىن قازاقستان پرەزيدەنتى نۇرسۇلتان نازارباەۆ ساياسي سەبەپپەن قۋعىنداپ جاتىر دەپ سانايدى. ءابليازوۆ ءوزىن "بانكتەن ميللياردتاعان دوللار ۇرلاعان" دەپ سىرتتاي 20 جىلعا سوتتاعانقازاقستان بيلىگىنىڭ تاققان ايىبىن دا تەرىسكە شىعارىپ، پرەزيدەنت نازارباەۆتى ۇنەمى سىناپ كەلەدى.

2017 جىلعى كۇزگە دەيىن ەرجان تاتىشەۆتىڭ قازاسى سول كەزدە جۇرگىزىلگەن رەسمي تەرگەۋ قورىتىندىسى نەگىزىندە "اڭشىلىق كەزىندەگى جازاتايىم وقيعا" دەپ سانالىپ كەلگەن. ال بىلتىر جازدا اۋەلى تۇتقىندالىپ، كەيىن بيزنەس-ارىپتەسىنەن "اقشا بوپسالاعان" جانە "زاڭسىز قارۋ ساقتاعان" دەگەن ايىپتار بويىنشا ءۇش جىلعا سوتتالعان سوڭ تۇرمەدە وتىرعان توقماديدىڭ وسىدان 13 جىل بۇرىنعى "تاپسىرىسپەن ادام ءولتىرۋ" قىلمىسىن موينىنا العانى تۋرالى اقپارات تاراعان. رەسپۋبليكالىق تەلەارنا ەفيرىنەن بەرىلگەن فيلمدە توقمادي تاتىشەۆتىڭ قازاسى "قاساقانا جاسالعان قىلمىس ەكەنىن مويىندايتىنى" تۋرالىمالىمدەمە جاساعان. كەيىن قازاقستان بيلىگى "بايقاۋسىزدا ادام ءولتىرىپ الۋ" تۋرالى ءىس بويىنشا شىعارىلعان ۇكىمنىڭ كۇشىن جويىپ، جاڭادان تەرگەۋ باستاعان.

Abai.kz