رەسەيدىڭ ورتالىق سايلاۋ كوميسسياسىنىڭ باسشىسى ەللا پامفيلوۆا ناۋرىزدىڭ 19-ىندا بيۋللەتەندەر تۇگەلگە جۋىق سانالىپ بىتكەندە ءپۋتيننىڭ جەتى باسەكەلەسىن سوڭىندا قالدىرىپ، 76.7 پايىز داۋىس جيناعانىن مالىمدەگەن. بۇل - سوۆەت وداعى قۇلاعالى بەرى رەسەي جەتەكشىلەرى جەتكەن ەڭ جوعارى كورسەتكىش. سايلاۋشىلاردىڭ 67 پايىزى داۋىس بەرگەنى حابارلانعان.

داۋىس بەرۋ كەزىندە جاشىككە توپتاپ بيۋللەتەن سالۋ مەن وزگە دە زاڭسىزدىقتار تۋرالى ۆيدەولار مەن شاعىمدار الەۋمەتتىك جەلىلەردە كەڭ تاراعانىنا قاراماستان پۋتين ستاليننەن كەيىنگى رەسەيدى ەڭ ۇزاق بيلەۋشى ەكىنشى ساياسي جەتەكشى اتانۋعا بەت الدى.

ەقىۇ-نىڭ ەۋروپاداعى قىسقا مەرزىمدى باقىلاۋشىلار ميسسياسىنىڭ ارنايى ۇيلەستىرۋشى وكىلى مايكل لينك دۇيسەنبىدە ماسكەۋدە وتكەن ءباسپاسوز-ءماسليحاتىندا:

- بۇل ەلدە كورگەن شىنايى باسەكەسىز تاڭداۋ - شىن تاڭداۋ ەمەس. فۋندامەنتالدىق بوستاندىقتى زاڭ تەتىكتەرى شەكتەيتىن جانە ناتيجەگە كۇمان تۋمايتىن جەردە سايلاۋدىڭ ءمانى جوعالادى. ول ءمان - جەتەكشىسىن سايلاۋ ءۇشىن حالىققا ەرىك بەرۋ، - دەدى.

ال پامفيلوۆا داۋىس بەرۋ ناتيجەلەرىنىڭ بەس سايلاۋ وكرۋگىندا ەسەپكە الىنباعانىن ايتقان. بىراق داۋىس بەرۋ پروتسەسى كەزىندە "ورەسكەل تۇردە زاڭ بۇزىلدى" دەگەن ايىپتاۋلاردى تەرىسكەن شىعارعان. ورتالىق سايلاۋ كوميسسياسىنىڭ باسشىسى 2012 جىلمەن سالىستىرعاندا "ەكى ەسە از زاڭ بۇزۋشىلىق بولعانىن" مالىمدەگەن.

رەسەيدەگى سايلاۋعا 500-دەن استام باقىلاۋشى جىبەرگەن ەقىۇ (ەۋروپاداعى قاۋىپسىزدىك پەن ىنتىماقتاستىق ۇيىمى) داۋىس بەرۋدىڭ زاڭدىق جانە تەحنيكالىق اسپەكتىلەرى جاقسى ۇيىمداستىرىلعانىن اتاپ ءوتتى. بىراق حالىقارالىق ۇيىم: "باق-تا ءبىر عانا ادامدى پرەزيدەنت رەتىندە جان-جاقتى كورسەتۋ ادىلەتسىز ساياسي مايدان قالىپتاستىردى" دەپ تۇجىرىم جاسادى.

Abai.kz