قۇسمۇرىن تۇرمەسىندە ءتورت تۇتقىن قايتىس بولعان
![](http://abai.kz/content/uploads/2018/03/28121014-B98A-45B7-B075-70210AA95DA3_w1023_r1_s.jpg)
قوستاناي وبلىسى قۇسمۇرىن كەنتىندەگى كولونيادا سوت ۇكىمى بويىنشا جازاسىن وتەپ جاتقان ءتورت ازامات ۋلانىپ قايتىس بولىپ، تاعى تورتەۋى زارداپ شەككەن دەپ حابارلادى جەرگىلىكتى باسىلىمدار.
قازاقستان ىشكى ىستەر مينيسترلىگىنىڭ قىلمىستىق-اتقارۋ جۇيەسى كوميتەتى ءباسپاسوز قىزمەتى تاراتقان اقپاراتتا توتەنشە وقيعانىڭ ناۋرىزدىڭ 20-سى ۋك-161/4 ورتاشا قاۋىپسىز مەكەمەسىندە تىركەلگەنى ايتىلعان.
"سوتتالعانداردىڭ ءبىر توبى كەشكى مەزگىلدە كولونيانىڭ وندىرىستىك ايماعىندا ورنالاسقان جۇمىس ورنىندا قۇرامىندا سپيرت بار حيميالىق زات (646-ەرىتكىش) تۇتىنىپ، قاتتى ۋلانىپ قالعان", - دەلىنگەن اقپاراتتا.
اۋليەكول اۋداندىق ورتالىق اۋرۋحاناسىنا جەتكىزىلگەن سەگىز ادامنىڭ تورتەۋى قايتىس بولعان. رەانيماتسيا بولىمىنە جاتقىزىلعان تاعى ءتورت ادامنىڭ بىرەۋىن دارىگەرلەر ناۋرىزدىڭ 23-ءى كۇنى ارنايى پالاتاعا اۋىستىرعان.
اۋليەكول اۋداندىق پوليتسياسى بۇل وقيعا بويىنشا سوتقا دەيىنگى تەرگەۋ امالدارىن باستاعان.
ءىىم قىلمىستىق-اتقارۋ كوميتەتى سوتتالعانداردى ۇستاۋعا ارنالعان كولونياداعى توتەنشە وقيعاعا بايلانىستى قىزمەتتىك تەكسەرۋ ءجۇرىپ جاتقانى تۋرالى حابارلاعان.
Abai.kz