استانا. 21 قاڭتار. قازتاگ – ەلەنا پرەوبراجەنسكايا. قازاقستانداعى وزدىگىنەن كاسىپپەن اينالىساتىن 2,7 ملن ادامنىڭ ىشىندە 60% ايەلدەر، دەپ حابارلادى ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىحالىقوۆا.

«وزدىگىنەن كاسىپپەن اينالىساتىندار جايىندا جاقسى جۇمىس جۇرگىزىلگەن (ستاتيستيكا دەرەكتەرىن جيناۋ بويىنشا – قازتاگ), وزدىگىنەن كاسىپپەن اينالىساتىندار كىم، ولاردىڭ سانى قانشا دەگەن ءتارىزدى كاتەگوريالار بويىنشا جاقسى مونيتورينگ جاسالعان. رەسپۋبليكاداعى وزدىگىنەن كاسىپپەن اينالىساتىندار سانى 2,7 ملن ادام. ونىڭ ىشىندە ايەلدەر شامامەن 60%»، -دەدى گ.ابدىحالىقوۆا قازاقستان ىسكەر ايەلدەر قاۋىمداستىعىنىڭ جۇما كۇنى وتكەن رەسپۋبليكالىق كونفەرەنتسياسى بارىسىندا.

ونىڭ ايتۋىنشا، قازىرگى ۋاقىتتا مينيسترلىك وزدىگىنەن كاسىپپەن اينالىساتىن تۇرعىنداردىڭ پروبلەمالارى تۋرالى ۇسىنىستاردى ازىرلەۋدە.

مىسالى، قازتاگ-تىڭ دەرەك كوزدەرى بويىنشا، بيىلعى جىلدىڭ اقپان ايىندا ۇكىمەت وزدىگىنەن كاسىپپەن اينالىساتىن اياعى اۋىر ايەلدەردى الەۋمەتتىك قولداۋ تۋرالى شەشىم قابىلداۋدى جوسپارلاۋدا. بالانىڭ دۇنيەگە كەلۋىنە بايلانىستى جاردەماقىنى تەك جۇمىس ىستەيتىن عانا ەمەس، سونىمەن بىرگە وزدىگىنەن كاسىپپەن اينالىساتىن اياعى اۋىر ايەلدەر دە الادى دەپ جوسپارلانۋدا.

گ.ابدىحالىقوۆا بۇل دەرەكتەردى راستاعان دا، جوققا شىعارعان دا جوق. تەك بۇل اقپارات اقپان ايىنىڭ باسىندا، قازاقستان پرەمەر-ءمينيسترى كارىم ءماسىموۆتىڭ قاتىسۋىمەن وتەتىن مينيسترلىكتىڭ القا ماجىلىسىندە عانا بەلگىلى بولادى دەدى.

ەستەرىڭىزگە سالا كەتسەك، وتكەن جىلدىڭ سوڭىندا پرەزيدەنت ۇكىمەتكە وزدىگىنەن كاسىپپەن اينالىساتىن حالىقتىڭ پروبلەماسىن شەشۋدى تاپسىرعان.

ءوز كەزەگىندە، ك.ءماسىموۆ سەنات دەپۋتاتتارىنا مەملەكەت باسشىسىنىڭ بۇل تاپسىرماسىن ۇكىمەت وتىرىستارىنىڭ بىرىندە تالقىلايتىنىن ايتقان.