قاراعاندى. 22 قاڭتار. قازتاگ – «ارسەلورميتتال تەمىرتاۋ» قاراعاندى وبلىسىنىڭ اكىمدىگىمەن جاسالعان مەموراندۋم اياسىندا ايماقتاعى الەۋمەتتىك جوبالاردى ىسكە اسىرۋعا ت1,7 ملرد-تان استام قاراجات بولەدى. بۇل تۋرالى جۇما كۇنى كەشكىسىن وبلىس اكىمدىگىندە مەموراندۋمعا قول قويۋ راسىمىندە ءمالىم ەتىلدى.

«بۇل وتە ماڭىزدى قۇجات. مەموراندۋمدار – بۇل ەڭ الدىمەن ايماقتىڭ ينفراقۇرىلىمىن دامىتۋعا قاجەت قوسىمشا قاراجات تارتۋ تەتىگى. ءبىز بۇگىن «ارسەلورميتتال تەمىرتاۋمەن» قول قويىپ وتىرعان مەموراندۋمنىڭ جالپى سوماسى ت1,7 ملرد. بۇل قاراجاتتار تەمىرتاۋ، شاحتينسك، اباي، ساراڭ جانە قاراجال قالالارىنداعى بىرقاتار الەۋمەتتىك جوبالارعا باعىتتالادى»، - دەدى وبلىس اكىمى سەرىك احمەتوۆ. ايماق باسشىسى كومپانياعا كورسەتىپ وتىرعان قولادۋى ءۇشىن العىسىن ءبىلدىردى.

ونىڭ مالىمەتتەرىنشە، قاراجال كەنىشتەرىندە مينەرالدىق-شيكىزات بازاسىن دامىتۋ بويىنشا ۇلكەن جوسپارى بار «ارسەلورميتتال تەمىرتاۋ»، وسى ايماقتى قولداپ 2011-ءشى جىلى ت100 ملن بولەدى. «بۇل قاراجات اششىلىدان ءۇش سۋ الۋ ۇڭعىلارىن بۇرعىلاۋعا باعىتتالادى. سونداي-اق ءۇش سورعىش ستانسا، سۋ قۇبىرى جانە كاناليزاتسيالىق جەلىلەر جوندەلىپ، كوممۋنالدىق شارۋاشىلىق كاسىپورىندارىنا جاڭا تەحنيكا ساتىپ الىنادى. قالانى اباتتاندىرۋ شارالارى قاراستىرىلعان»، - دەپ مالىمدەدى س. احمەتوۆ.

مەموراندۋمعا ساي، «ارسەلور ميتتال تەمىرتاۋ» بۇرىنعىداي ۇلى وتان سوعىسىنىڭ ارداگەرلەرىنە، مۇگەدەكتەرگە، فۋتبولشىلار مەن وليمپيادالىق سپورتشىلارعا كومەگىن جالعاستىرا بەرەدى. ودان باسقا، شەتەلدىك وقۋ ورىندارىندا وقيتىن قاراعاندىلىق ستۋدەنتتەرگە گرانت ءبولىنۋ جالعاساتىن بولادى.

«بىلتىرعى مەموراندۋم مىندەتتەرىن «ارسەلورميتتال تەمىرتاۋ» كومپانياسى تولىعىمەن ورىندادى. 2010-شى جىلى كومپانيا قاراجاتىنا وبلىستا 20 الەۋمەتتىك جوبا ت1,6 ملرد سوماعا ىسكە اسىرىلدى»، - دەپ اتاپ ءوتتى اكىم.

«ءبىز ءوزىمىزدىڭ كاسىپورىندار ورنالاسقان ءۇش ءوڭىر تۇعىندارىنىڭ الدىندا جاۋاپكەرشىلىگىمىز بار، - دەدى مەموراندۋمعا قول قويۋ راسىمىندە «ارسەلورميتتال تەمىرتاۋ» اق باس ديرەكتورى دوكتور فرانك پاننير. – ءبىز وبلىس اكىمدىگىمەن سوڭعى ءتورت جىلدا جاساپ وتىرعان مەموراندۋم جاقسى داستۇرگە اينالدى. ول قوعاممەن تىعىز قارىم-قاتىناس ورناتۋعا سەپتىگىن تيگىزەدى». كومپانيا الدا دا ايماقتىڭ الەۋمەتتىك سالاسىن دامىتۋعا قاتىسا بەرەدى، دەپ سەندىردى كومپانيا باسشىسى.

«4 جىلدا كومپانيا ايماقتىڭ الەۋمەتتىك سالاسىن دامىتۋعا ت6 ملرد سالدى»، - دەپ اتاپ ءوتتى ف. پاننير.

«ارسەلورميتتال تەمىرتاۋ» ترانسۇلتتىق ArcelorMittalكومپانياسىنىڭ قازاقستانداعى بولىمشەسى. ەلىمىزدىڭ تاۋ-مەتاللۋرگيالىق سەكتورىنىڭ اسا ءىرى كاسىپورنى. كاسىپورىن ءوزىنىڭ كومىر كەنىشى، تەرمىر كەنى جانە قۋات بازاسى بار ينتەگرالدانعان تاۋ-مەتاللۋرگيالىق كەشەن بولىپ تابىلادى. «ارسەلورميتتال تەمىرتاۋ» قۇرامىندا تەمىرتاۋ قالاسىنداعى مەتاللۋرگيالىق كومبينات، قاراعاندى وبلىسىندا 8 كومىر شاحتاسى، قاراعاندى، اقمولا جانە قوستاناي وبلىستارىندا تەمىر وندىرەتىن 4 كەنىشى بار. كومپانيادا 40 مىڭداي ادام جۇمىس ىستەيدى.