ستاتيستيكا مالىمەتتەرىنە كوز جۇگىرتسەك، الەمدە ءار مينۋت سايىن 1 ادام وكپە وبرىنان قازا تابادى. جىل سايىن قازاقستاندا قاتەرلى ىسىكپەن اۋىراتىن 30 مىڭعا جۋىق ناۋقاس انىقتالادى ەكەن. ونكولوگ دارىگەر رايىمقۇل قاراقۇلوۆتىڭ بولجامى بويىنشا، الەمدە 2020-دەيىن 2,5-3 ملن ادام وبىر دەرتىنە شالدىعادى. قازاقستاندا قازىر 300-356 مىڭ ناۋقاس ەسەپتە تۇر. جىلىنا 35-36 مىڭ ادام ەسەپكە الىنادى، تاعى.

دەمەك، قازىرگى تاڭدا قوعام بوپ كۇرەسەتىن قاتەرلى اۋرۋدى جەڭىپ، وزگەلەرگە سەنىم سىيلاپ جاتقان جانداردىڭ الار ورنى بولەك. ەندەشە، ەرەكشە رۋح پەن قايسارلىعىنىڭ ارقاسىندا اۋرۋدى جەڭىپ شىققان جاندار دا بار. ءبىز بۇگىن سوزگە تارتقان جۇلدىز وڭداش تا وسى ساپتان. ءوزىنىڭ باسىنان كەشكەن وقيعاسىن ول بىزگە بايانداپ بەرگەن ەدى.

جۇلدىزدىڭ اڭگىمەسى: «مەن راكتى قالاي جەڭىپ شىقتىم؟..»

9 سىنىپتى بىتىرگەن سوڭ، اتا-انام مەنى كوللەدجگە وقۋعا ءتۇسىردى. سوندا ءجۇرىپ ۋنيۆەرسيتەتتە وقۋدى قاتتى ارماندادىم. سول ارمانىم ورىندالىپ، كەيىن ۋنيۆەرسيتەتكە ءتۇستىم. قيىن بولسا دا اۋەس-كە ءتۇستىم. راديوتەحنيكا ماماندىعىنا، مەملەكەتتىك گرانتتا وقىدىم. ۋنيۆەرسيتەتتە جۇرگەن كەزدە كوپ قيىنشىلىقتار بولا قويمادى. الايدا، مەنىڭ اناممەن قارىم - قاتىناسىم جاقسى بولمادى. ماماممەن 10 مينۋتتان ارتىق سويلەسسەك، ەكەۋىمىز ۇرىسىپ قالامىز. اراداعى بايلانىس الىستاپ كەتتى. مىسالعا، كوپتەگەن قىزدار كۇنىنە 1-2 رەت بولسىن ماماسىمەن سويلەسەدى عوي. مەن بولسام، ەكى اپتادا ءبىر سويلەسەم، ونىڭ وزىندە اسا ءتىل تابىسا المادىق.

كەيىن ماگيستراتۋراعا تۇسكەن كەزدە قاتتى قينالدىم. ساباقتارىم دا قيىن بولدى. وعان قوسا جۇمىس جاسادىم.  ەمتيحاننان قۇلاپ قالدىم، ۇيالى تەلەفونىمدى جوعالتىم الدىم. تۇسىنىكسىز جاعدايلار كوبەيە باستادى. ءوز-وزىمنەن جىلاي بەرەمىن. اتتەگىدەي نامازىمدى دا دۇرىس وقي المادىم. كەيىن، گەرمانياعا دا باردىم. ول جاقتا جاقسى قىدىرىپ كەلدىم. بىراق، كۇشتى اسەر الا المادىم. گەرمانيادان كەلگەن سوڭ قاتتى اۋىرا باستادىم. جوتەلە بەرەم، السىزدىك پايدا بولدى. ەنتىگىپ قالامىن. وعان قوسا تۇندە ۇيىقتاي المايتىندى شىعاردىم. ۋنيۆەرسيتەتكە بارىپ كەلگەن كەزدە اياعىم ءىسىپ كەلەتىن بولدى. باسىم اۋىرىپ، قۇلاي بەرەمىن.

ءبىر كۇنى گرۋپپالاستارىممەن بارىپ، بارلىعىمىز فليۋراعا تۇستىك. ناتيجەسى دۇرىس شىقپادى.  دارىگەر ماعان نەگە كورىنبەيسىڭ دەپ ۇرىستى. مەن سول كەزدە ءۇش اي بويى جوتەلىپ جۇرگەن ەدىم. سودان ءبىر اي بويى تەكسەرىلدىم. كەيىن كومپيۋتەرلىك توموگرافياعا ءتۇستىم. ءبارى جاقسى دەپ جازىپ بەردى. بىراق، استىڭعى جاعىنا ونكولوگتىڭ كەڭەسى كەرەك دەپ جازىپ بەرگەن ەكەن. الايدا مەن ونى بايقاماعان بولىپ شىقتىم. ونكولوگتىڭ نە ەكەنىن دە بىلمەدىم عوي. سودان وعان نازار اۋدارمادىم. شىققان قورىتىندىنى دارىگەرگە اكەلىپ بەرىپ، ەش الاڭسىز جۇرە بەردىم.

ءبىر كەزدە مامام حابارلاسىپ، الماتىعا كەلەمىن، ەكەۋمىز بىرگە تەكسەرىلەيىك دەدى.  كەيىننەن مامام كەلىپ، ارتىنان ءسىڭىلىم كەلدى. سونىمەن، ءبىر اي بويى تەكسەرىلگەن قاعازدارىمدى جيناستىرىپ، ونكولوگياعا باردىق. ول جەردەگى دارىگەرلەر «جۇلدىز، سەن ءومىر ءسۇرىپ كەتەسىڭ، ءبارى جاقسى بولادى»-دەپ جاتىر. مەن نە بولعانىن مۇلدە تۇسىنبەي جاتىرمىن. نەگە بۇلاي ايتىپ جاتىر دەپ ويلادىم. مۇلدە ەشتەنە تۇسىنە المادىم. بارلىعىنىڭ مەننەن ءبىر نارسەنى جاسىرىپ جاتقاندارى انىق بولدى...

سوسىن، ەكى اپتا وپەراتسياعا دايىندالدىم. تاپسىرىپ جاتقان اناليزدەرىم دە جاقسى بولمادى. ەكى اپتانىڭ ىشىندە اجەم كەلدى، تۋىستارىم كەلدى. مەن بولسام قاتتى ۋايىمداپ، ارىقتاپ كەتتىم. قانشا ۋايىمداماۋعا تىرىسساڭ دا بولمايدى ەكەن عوي...

كەيىن ونكولوگياعا كىرگەن كەزدە ءارتۇرلى اۋىر جاعدايداعى ادامداردى كوردىم. ىشىمنەن «مەن نەگە بۇنداي جەردەمىن، نەگە وسىلاي بولىپ جاتىر؟» دەگەن ءتۇرلى ويلار مازالاي باستادى. وپەراتسياعا كىرەر كەزدە مامامنان كەشىرىم سۇرادىم...

اللادان ماعان تاعى ءومىر بەرسە، اتا-اناممەن جاقسى بولۋشى ەدىم، ولاردى رەنجىتپەۋشى ەدىم دەپ ويلاپ جاتتىم. نەگىزى ءومىرىمنىڭ ءبارى جاقسى عوي، بىراق سول نارسەدەن قينالىپ جاتتىم. ءسويتىپ، 9 ساعاتتىق وپەراتسيادان شىقتىم. وپەراتسيا جاقسى بولىپ ءبىتتى، بىراق قاتتى قيىن بولعان ەدى. ەكىنشى كۇنى پالاتاعا شىقتىم.  ءبىر اي سارعايىپ سوندا جاتتىم.  سوندا دا جىگەرىم جاسىمادى، جاقسى كوڭىل كۇيدە بولدىم. ءسويتىپ كۇننەن-كۇنگە جاقسارىپ كەلە جاتتىم.  ءبىر ايدان سوڭ شىعىپ، شەكسىز قاتتى قۋاندىم.

اۋرۋحانادان شىققان سوڭ قىزىلورداعا بارىپ 1 اي دەمالدىم. ءبىر ايدان سوڭ اناليزدەرىمنىڭ ءبارى جاقسى ەمەس، اۋرۋدىڭ تارالىپ كەتۋى مۇمكىن  ەكەنى بەلگىلى بولدى. ىسىكتى العان، بىراق اتى جامان، باسقا جەرگە شىعاتىن قاۋىپتى تۇرىنە جاتادى ەكەن. سودان كەيىن مامام ناقتى ءاناليزدى ماعان ايتا المادى. سەبەبى، بۇل دەگەنىمىز - ولەدى دەگەن ءسوز عوي. ونى ءوزىم ىشتەي ءبىلدىم...

ءسويتىپ، قايتا الماتىعا كەلدىك. ءبىراز جەرگە بارىپ كوردىك. ءبارى ەمدەي المايمىز دەدى. امال جوق، حيمياعا كىردىم. راك دەگەن نارسە ءالى تۇردى. سوسىن، اۋىر جاعدايمەن حيميا-تەراپياعا كىردىم. كىرگەن كەزدە، 3 كۇننەن سوڭ شاشىم ءتۇسىپ قالدى، كىرپىك-قاسىم جوق. قاتتى قينالدىم. ادامداردىڭ ءبارى ءولىپ قالاتىن شىعار دەپ ويلادى. سەبەبى، مەن تاماق تا سۋ دا ىشپەدىم. ءدال سول ۋاقىتتا مامام ناماز وقىپ باستاپ، دۇعا تىلەپ، ماعان قاتتى قولداۋ بولدى.

مامام تۇسىمدە اتامدى كورىپتى. اتام مەنى جازىلىپ كەتەدى، ءبارى جاقسى بولادى دەپ ايتتى. ول كەزدە اتامنىڭ قايتىس بولعانىن ءالى بىلمەگەن ەدىم. مامام حابارلاسىپ، ءبارى جاقسى بولاتىنىنا سەندىردى. وسىدان-اق ەكىنشى كىرگەن حيميا-تەراپيا دا جاقسى بولدى. وزىمنەن-ءوزىم جاتا بەرەتىن ەدىم. ءبىر كۇش پايدا بولدى. تىرىلە باستادىم. جايمەن ءجۇرىپ، تۇنىمەن قۇلشىلىعىمدى جاسادىم.

كۇلە باستادىم، قاسىمداعى ادامدارمەن دە جاقسى سويلەسە باستادىم. سودان كەيىن اناليزدەرىمنىڭ ءبارى جاقساردى. دوستارىمدى شاقىرىپ، بىرگە قىدىرىپ، جاقسى جەرلەرگە تاماقتانۋعا بارىپ تۇراتىن بولدىق. ومىرگە دەگەن قۇلشىنىسىم دا ارتا ءتۇستى. ءۇشىنشى حيميادان سوڭ، اناليزدەرىمنىڭ ءبارى جاقسى شىقتى. ءسويتىپ، التى اي ۋاقىت وتكەن سوڭ تەكسەرىلدىم. سول كەزدە راك جوق دەپ ايتتى...

نەگىزى ومىرلىك سىناقتاردىڭ بارلىعى دەرلىك، كىشكەنتاي كەزىڭدە قانداي بولعانىنا بايلانىستى تۋىندايدى جانە بالا سوعان بايلانىستى ومىردە كەزدەسەتىن كەدەرگىلەردى جەڭىپ شىعادى. مەنىڭ كىشكەنتاي كەزىم وتە كەرەمەت ءوتتى. ەركە بولعانمىن، اشىق بولعانمىن جانە پوزيتيۆ بولعانمىن. بەتىمدى ەشكىم قايتارماعان. 12 بالانىڭ ىشىندە مەنى اتام ەرەكشە جاقسى كورەتىن ەدى. مەن ەڭ ءبىرىنشى نەمەرە بولعاندىقتان دا بارلىق نازار ماعان اۋدارىلعان ەدى. الايدا ەركە بولىپ وسكەن بالا كىشكەنتاي قيىندىقتاردى ەسەيگەندە ەسەلەپ قابىلدايدى ەكەن. مەن دە ءسويتتىم. ايتسە دە، مەن راكتى جەڭىپ شىعۋىما بىردەن-ءبىر سەبەپكەر بولعان  نارسە: كىشكەنتاي كەزىمدە ەركە بولعانىم، ەشكىم بەتىمدى قايتارماعان، بارلىعى جاقسى كورىپ قولپاشتاۋىنىڭ ارقاسى دەپ ويلايمىن. بۇنىڭ بارلىعى ادامنىڭ ميىندا جازىلادى جانە سونىمەن ءومىر سۇرەدى. كەيبىر ادامعا پسيحولوگيالىق تۇرعىدان قانشا پوزيتيۆ بەرسەڭ دە، قانشا ءدارى بەرسەڭ دە جازىلمايدى. ءومىرى دەپرەسسياعا ءتۇسىپ كەتۋى مۇمكىن. مەندە ءبارى كەرىسىنشە بولدى. مەندە جەڭىپ شىعامىن دەگەن سەنىم باسىمىراق بولدى. نەگىزى، ءار ادامدا ەنەرگيا تولىق بولۋى كەرەك. سول كەزدە ادامنىڭ يممۋنيتتەتىك سيستەماسى تەز ىسكە قوسىلادى. كوڭىل-كۇيىڭ كۇشتى بولعان كەزدە دەنەدە باقىت گارموندارى بولىنەدى، ول كوبەيگەن كەزدە يممۋنيتەتتىڭ كۇشتى بولۋىنا كومەكتەسەدى. ال راك بولىپ اۋىرعان كەزدە يممۋنيتەت پەن راك كلەتكالارى تالاسقاندا ول مىندەتتى تۇردە راكتى جەڭەدى.

ادام اۋىرعان كەزدە ءوز-وزىنە سۇراقتار قويۋ كەرەك. مەن نەگە وسىنداي جاعدايعا تاپ بولدىم دەپ. مەن ءوز-وزىمە كوپ-كوپ سۇراقتار قويدىم. اتا-انانىڭ قادىرىن ءبىلۋ كەرەك.

جازىپ العان كوگەرشىن تىلەگەن 

Abai.kz