وندا جەرگىلىكتى "قۇقىققورعاۋشى ۇيىمداردىڭ ساراپتامالىق كەڭەسى" حالىقارالىق Amnesty International ۇيىمى مەن ەۋروپا كەڭەسى پارلامەنتتىك اسسامبلەياسى ولشەمدەرى نەگىزىندە ءساۋىردىڭ 4-ءى كۇنى قابىلداعان "قازاقستانداعى ساياسي تۇتقىنداردىڭ" جاڭارتىلعان ءتىزىمى بار.
بۇل تىزىمگە 2016 جىلى سوتتالعان قۇقىققورعاۋشىلار ماكس بوقاەۆ، تالعان ايان; 2017 جىلى سوتتالعان كاسىپوداق ليدەرلەرى ءامين ەلەۋسىنوۆ، نۇربەك قۇشاقباەۆ; 2017 جىلى سوتتالعان ماحامبەت ءابجان، سانات بوكەنوۆ سەكىلدى قۇقىققورعاۋشىلار مەن جۋرناليستەر ت.ب. قوعام بەلسەندىلەرى كىرگەن.
قازاقستانداعى ساياسي تۇتقىنداردىڭ جاڭارتىلعان تىزىمىندە جەرگىلىكتى قۇقىققورعاۋشىلار بۇعان دەيىن دە ساياسي تۇتقىن نەمەسە ار-وجدان تۇتقىنى دەپ تانىعان ادامدار: 18 جىلعا سوتتالعان اقىن ءارى ديسسيدەنت ارون اتابەك (2006 جىلدان بەرى تۇرمەدە وتىر); 2009 جىلى 14 جىلعا سوتتالعان "قازاتومونەركاسىبى" ۇلتتىق كومپانياسىنىڭ بۇرىنعى پرەزيدەنتى مۇحتار جاكىشەۆ; 2012 جىلى 12 جىلعا باس بوستاندىعىنان ايىرىلعان قۇقىققورعاۋشىۆاديم كۋرامشين; 2015 جىلى ء"دىني الاۋىزدىق قوزدىرعان" دەگەن ايىپپەن 4 جىل 8 ايعا سوتتالعان ساكەن تۇلباەۆ بار.
ساراپتامالىق كەڭەسكە قاتىسقان قۇقىققورعاۋشى امانگەلدى شورمانباەۆتىڭ ايتۋىنشا، كەڭەس وتىرىسى ءساۋىردىڭ 4-ءى كۇنى قازاقستاننىڭ ادام قۇقىعىن قورعاۋ جونىندەگى بيۋروسىنىڭ كەڭسەسىندە وتكەن. شورمانباەۆ قازاقستانداعى ساياسي تۇتقىندار ءتىزىمىن تۇزگەن كەزدە حالىقارالىق قۇقىققورعاۋ ۇيىمدارىنىڭ ولشەمدەرى ەسەپكە الىنعانىن قۇقىققورعاۋشى رەتىندە عانا ەمەس، سونىمەن بىرگە زاڭگەر رەتىندە راستايتىنىن ايتتى.
Abai.kz
