بۇل ساپارعا تۇركيا پرەزيدەنتىمەن بىرگە، زايىبى ءامينا ەردوعان جانە وزبەكستان پرەزيدەنتى شاۆكات ميرزياەۆپەن بىرگە، زايىبى زيرواتحون حاشيموۆا دا ەرىپ بارعان.
جوعارى لاۋازىمدى قوناقتار باحاۋددين ناكشباند كەسەنەسىنە بارعان. بۇل مەشىت 1544 جىلى بۇحارلىق ءامىر ابدۋلازيزحون يبن ۋبايدۋللوحوننىڭ بۇيرىعىمەن تۇرعىزىلعان. وندا حازىرەت باحاۋددين مەن ونىڭ اناسىنىڭ سۇيەگى جاتىر. انادولى تۇرىك اگەنتتىگىنىڭ حابارلاۋىنشا، تۇركيانىڭ ءدىن ىستەرى جونىندەگى باسقارما باسشىسى ءالي ەرباش كەسەنە الدىندا قۇران اياتتارىن وقىپ، دۇعا باعىشتاعان.
ودان كەيىن تۇركيا پرەزيدەنتى مەن ەرىپ كەلگەن قوناقتار كەشەن اۋماعىنداعى مەدرەسەگە باس سۇعىپ، ەجەلگى «ارك» قامالىنا جانە «پوي-كالون» ارحيتەكتۋرالىق كەشەنىنە بارعان. مۇنان بولەك ليابي حاۋز تاريحي عيماراتىن دا تاماشالاعان.
بۇحارادان كەيىن تۇركيا پرەزيدەنتىنىڭ وزبەكستانعا ءۇش كۇندىك ساپارى اياقتالعان.
Abai.kz
