كۇنى كەشە عانا «Abai.kz» اقپاراتتىق پورتالىندا «ماسقارا! الماتى اۋەجايى. شەكارالىق باقىلاۋ قىزمەتى جۇكتى ايەلدى كەرى قايتاردى» اتتى ماقالا جاريا بولدى. وندا نۇرسەيىت تولەگەنۇلى ەسىمدى قازاقستان ازاماتىنىڭ ەكىقابات ايەلىن الماتى اۋەجايىنداعى شەكارالىق باقىلاۋ قىزمەتىنىڭ ەلدەن دەپورتاتسيالاعانى باياندالدى.

وقيعانىڭ قىسقاشا مازمۇنى بىلاي: 2 مامىر كۇنى تاڭعى 03:20 شاماسىندا نۇرسەيىت تولەگەنۇلى، ايەلى جايناگۇل عاجاپقىزى جانە 1,5 جاسار ۇلى مىسىردان الماتى اۋەجايىنا كەلىپ قونادى. جايناگۇل قحر ازاماتشاسى. قازاقستاندى ءجۇرىپ-تۇرۋى ءۇشىن بەرىلگەن ىقتيارحاتى بار. ىقتيارحاتتىڭ جارامدىلىق مەرزىمى 2021 جىلى اياقتالۋى ءتيىس بولعان. الايدا بۇلار قازاقستان اۋماعىندا 183 كۇننىن ارتىق ۋاقىت بولماعاندىقتان، جايناگۇلدىڭ ىقتيارحاتى اۆتوماتتى تۇردە جارامسىز دەپ تانىلعان. اۋەجايداعى شەكارا قىزمەتى سولاي دەپ تۇسىندىرگەن. وسىلايشا نۇرسەيىتتىڭ ءوزىن جانە 1,5 جاسار ۇلىن ەلدە قالدىرىپ، جۇكتى ايەلىن سول كۇنى مىسىرعا قايتارىپ جىبەرگەن. بۇل جايلى مىنا سىلتەمەدەن تولىق وقي الاسىزدار. http://abai.kz/post/69884

نۇرسەيىتتىڭ باسىنا تۇسكەن اۋىر جاعدايدى تولىق بايانداعان ماقالا «Abai.kz» اقپاراتتىق پورتالىنا جاريالاندى. ىلە-شالا بۇل ماسەلە قوعامدىق پىكىر تۋدىرىپ، باسقا دا اقپارات قۇرالدارى اتالعان ماقالانى جاريالاپ باستى. اتاپ ايتساق، «qazaquni.kz»، «dalanews.kz»، «kaz.365info.kz»، «talqy.kz»، «minber.kz»، «adyrna.kz» سايتتارى نۇرسەيىتتىڭ ماسەلەسىن قوعام تالقىسىنا ۇسىندى.

سونداي-اق، بۇل ماسەلەگە الەۋمەتتىك جەلى قولدانۋشىلارى دا ءۇن قوسىپ، تالقى جاسادى. ماتەريالدى بولىسكەن جۇرتتىڭ قاراسى كوپ.

بۇگىن الماتى حالىقارالىق اۋەجايىندا ورنالاسقان كەدەن قىزمەتىنە حابارلاستىق. اۋەجايداعى كەدەندىك قىزمەت مامانى ەرمەك بولاتبەكۇلى دەگەن ازامات، بۇل ىسكە كەدەن قىزمەتىنىڭ قاتىسى جوق ەكەنىن ايتتى.

«بۇل ىسكە كەدەن قىزمەتىنىڭ تۇك قاتىسى جوق. جەكەلەگەن ادامدارمەن اينالىسپايمىز. ول كىسى شەكارالىق تەكسەرىستەن ءوتۋ كەزىندە ۇستالعان عوي. شەكارا قىزمەتكەرلەرى ادامداردىڭ قۇجاتتارىن تەكسەرەدى. سولار بىلەدى بۇل ءىستىڭ ءمان-جايىن»، - دەپ جاۋاپ قايىردى.

ەرمەك بولاتبەكۇلى ۇسىنعان كونتاكتى بويىنشا الماتى اۋەجايىنداعى شەكارا قىزمەتىنە حابارلاستىق. تەلەفون تۇتقاسىن ورىس تىلىندە سويلەيتىن ءبىر كەلىنشەك كوتەردى. اۋەجايدىڭ شەكارا قىزمەتى تەلەفون ارقىلى كەڭەس، اقپارات بەرمەيتىنىن ايتتى.

«ءبىز تەلەفون ارقىلى اقپارات نەمەسە كەڭەس بەرمەيمىز. ءبىز 24 ساعات بويى جۇمىس جاسايمىز. الماتى حالىقارالىق اۋەجايىنىڭ 2 قاباتىنداعى حالقارالىق ۇشۋ بەكەتىندە ورنالاسقانبىز. سول جەرگە كەلىپ، وزىڭىزگە كەرەك تىلدە اقپارات الا الاسىز»، - دەپ قىسقا قايىردى.

ماقۇل ءبىز بارامىز. كەرەكتى اقپاراتتى الامىز. ال مىسىرعا قايتارىلعان جايناگۇلدىڭ ەندىگى تاعدىرى نە بولماق؟ ءبىز تەك بولجاپ ايتا الامىز. ارينە، مىسىرعا جەتكەن جايناگۇلدىڭ تۇرعىلىقتى تىركەۋى قىتايدا. ونى قىتايعا جىبەرەدى. ال قىتايدا جايناگۇلدى ءسوزسىز «وقۋ-ۇيرەتۋ لاگەرى» نەمەسە تۇرمە كۇتىپ تۇرعانى انىق.

ايتپاقشى، «Abai.kz» اقپاراتتىق پورتالىندا اتالعان جاريا بولىسىمەن، المانياداعى قانداسىمىز ءومىرحان التىن حابارلاستى، رەداكتسيامىزعا. داۋسىندا ءدىرىل بار.  اتالعان ماسەلەگە قاتىستى ءوزىنىڭ پىكىرىن ءبىلدىردى.

ءومىرحان التىن، المانياداعى قازاق:

- «Abai.kz-تەن» اناۋ ەگيپەتكە قايتارىپ جىبەرگەن ەكىقابات ايەلدىڭ جاعدايىن وقىپ، قانىم باسىما شاپشىپ تۇر. باۋىرىم، ىزادان قان قۇسىپ وتىرمىن. مىناۋ نەتكەن ماسقارا جاعداي! بۇل بارىپ تۇرعان ساتقىندىق، قازاققا جاسالعان قيانات قوي. قازاقتار ەل بولىپ، جۇرت بولىپ، قىتايدىڭ قىسىمىنان قاشىپ، ەلىم دەپ كەلگەندە، كىشكەنتاي سابيىنەن، جولداسىنان ايىرىلىپ، ءوز اتامەكەنىنەن قۋىلعان اناۋ ەكىقابات ايەلدى، قانى قازاق ءبىر ادامدى ءوز وتانىنا دەرەۋ قايتارۋ كەرەك. قازاقستاننىڭ سىرتقى ىستەر مينيسترلىگى ءبىر شارا قولدانۋى كەرەك. ونسىز دا قىتايدىڭ قىسىمىنان قاشىپ كەلگەن از قازاقتى قاشانعى قۋالاي بەرمەك؟

بۇعان كىم جاۋاپكەر؟ سول ادامدار انىقتالۋى جانە جازالانۋى ءتيىس. ول اتامەكەنىنە كەلدى. ونى كەۋدەسىنەن يتەرىپ، جاۋ كورگەندەي كەلگەن بەتىمەن كەرى قۋىپ جىبەرۋ ۇياتتىڭ ۇياتى عوي.

ءابدىراشيت باكىرۇلى، فيلوسوف:

- ماسقارانى وقىپ شىقتىم. شەكارا قىزمەتكەرلەرى ءوز قۇقىن اسىرا پايدالانىپ جىبەرگەن سىڭايلى. جايناگۇل ەلگە كونتورباندالىق تاۋار اكەلىپ جاتسا، اڭگىمە ءبىر بولەك. مەنى ويلاندىرعانى، نەگە ءبىزدىڭ اەروپورتتا ميگراتسيالىق پوليتسياسىنىڭ وكىلى جوق؟ بار بولسا، ىسكە سول ارالاسىپ، ىقتيار حات شارتى بۇزىلعانى جونىندە حاتتاما تولتىرىپ، شەشىم قابىلداۋى كەرەك ەدى.

ونىڭ ۇستىنە، جايناگۇلدىڭ قازاقستان ازاماتىمەن تۇرعان نەكە كۋالىگىنە، ودان تۋعان بالانىڭ پاسپورتىنا، دارىگەرلەردىڭ انىقتاماسىنا قالايشا نازار اۋدارىلماعانىنا تاڭ قالاسىڭ.

جالپى، وسىنداي جاعدايدا، اەروپورت ايماعىندا ونداي ازاماتتاردىڭ قۇقىقتىق ماسەلەسى شەشىلگەنشە ولاردى وقشاۋلاپ ۇستايتىن ارنايى «شەگارالىق ايماق» بولۋى كەرەك سياقتى. بىردەن قايتارىپ جىبەرگەندەرى دۇرىس بولمادى. ۇشاققا تولەگەن اقشاعا جايناگۇلدى اەروپورت ايماعىندا، ماسەلە انىقتالعانشا ۇستاۋعا بولاتىن ەدى. ەندى، شەكاراشىلاردىڭ قىزمەتى قاتە ەكەنى انىقتالسا، وندا وسىعان كەتكەن شىعىندى شەكارا قىزمەتى تولەي مە، الدە، قاتەلىك جىبەرگەن شەكاراشى ءوز قالتاسىنان تولەي مە؟ قىزىقتىڭ كوكەسى سوندا بولايىن دەپ تۇر! حالىقتىڭ اقشاسىن ءاربىر ساۋاتسىز شەنەۋنىكتىڭ قاتەلىگىن جابۋ ءۇشىن جۇمساي بەرسەك - قازاقستان بيۋدجەتىنەن كوك تيىن قالمايتىن شىعار...

نۇرگەلدى ابدىعانيۇلى

Abai.kz