جەڭىس مەرەكەسى قارساڭىندا كوكسۋ اۋدانى اۋماعىندا «بالپىق بي» اۆتوماتتاندىرىلعان تاز تاراتۋ ستانساسى جۇمىسىن باستادى، دەپ حابارلايدى الماتى وبلىسى اكىمدىگىنىڭ رەسمي سايتى.

ونىڭ رەسمي اشىلۋ سالتاناتىنا وبلىس اكىمىنىڭ ورىنباسارى ايداربەك بايجانوۆ قاتىسىپ، اۋىل تۇرعىندارىن قۋانىشتارىمەن قۇتتىقتادى.

ايداربەك بايجانوۆ الدىمەن جامبىل اۋىلىنا كەلىپ، مۇندا ولار اۆتوماتتى تۇردە گاز تاراتاتىن ستانسا جۇمىستارىنا نازار اۋداردى. بۇل جەردە جۇيەنىڭ جاڭا مۇمكىندىكتەرىمەن جانە اتقارىلىپ جاتقان جۇمىستارمەن «جەتىسۋوبلگاز» جشس باس ديرەكتورى ۆلاديمير توحتاسۋنوۆ تانىستىرىپ، كوكسۋ اۋدانىن گازداندىرۋ ءىسى جايلى كەڭىنەن اڭگىمەلەدى. جالپى، بۇل ستانسا قۇرىلىسى 2016 جىلدىڭ سوڭىندا اياقتالعان. وعان جەرگىلىكتى بيۋدجەت ەسەبىنەن 753,97 ميلليون تەڭگە كولەمىندە قاراجات بولىنگەن بولاتىن. قۇرىلىس مونتاج جۇمىستارى دا ءوز مەرزىمىندە ءبىتىپ وتىر.

بۇدان سوڭ بالپىق بي اۋىلىندا كوگىلدىر وتىننىڭ العاشقى الاۋى سالتاناتتى تۇردە جاعىلدى. كوپشىلىكتى قۇتتىقتاعان ا. بايجانوۆ:

– قۇرمەتتى جەرلەستەر! وبلىستى كوگىلدىر وتىنمەن تولىق قامتاماسىز ەتۋ جۇمىستارى ەلباسى نۇرسۇلتان نازارباەۆتىڭ تاپسىرماسىنا سايكەس جانە «الماتى وبلىسى كەشەندى گازداندىرۋ ايماقتىق باعدارلاماسى» اياسىندا ىسكە اسىرىلۋدا. وسى باعدارلاما شەڭبەرىندە سالتاناتتى تۇردە كوگىلدىر وتىن الاۋىن جاعۋعا كۋا بولىپ وتىرسىزدار. گاز سالاسىنىڭ ماماندارى كوكسۋلىقتارعا تازا گاز سىيلاپ، ءوڭىردىڭ ەكولوگيالىق جاعدايىن جاقسارتۋعا مۇمكىندىك تۋعىزۋدا. گاز جەكە تۇرعىن ۇيلەر مەن الەۋمەتتىك نىسانداردى جىلىتادى. سونداي-اق، شاعىن جانە ورتا كاسىپكەرلىكتىڭ دامۋىنا دا ىقپال ەتەدى، - دەدى ايداربەك ەستەبەكۇلى.

اتالعان سالاعا جاۋاپتى ماماندار مەن اۋىل اقساقالدارى دا اق تىلەكتەرىن ارنادى. جينالعاندار بالپىق بي اۋىلىنىڭ تۇرعىنى ەربول جاپاروۆتىڭ ۇيىندە جاعىلعان گازعا كۋا بولدى.

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە، مىنا پاراقشاعا جازىپ قالدىرىڭىز!

Abai.kz