«اق جول» دەموكراتيالىق پارتياسىنىڭ كوشباسشىسى ازات پەرۋاشەۆ قازاقستاندىق جەمقورلاردىڭ وفشورلىق ايماقتاعى قاراجاتىن ەلگە قايتارۋ بويىنشا ءماجىلىستىڭ جانە ەۋروپارلامەنتتىڭ بىرلەسكەن جۇمىس توبىن قۇرۋدى ۇسىندى.

بۇل ۇسىنىستى 10-مامىردا پارلامەنت ماجىلىسىندە وتكەن «قازاقستان رەسپۋبليكاسى-ەۋروپالىق وداق» پارلامەنتتىك ىنتىماقتاستىق كوميتەتىنىڭ XV وتىرىسى اياسىندا ەۋروپالىق پارلامەنت دەلەگاتسياسىمەن كەزدەسۋ بارىسىندا مالىمدەدى.

ازات پەرۋاشەۆ 2015 جىلدىڭ 25 قىركۇيەگىندە كوميتەتتىڭ XIII وتىرىسىندا ەۋروپارلامەنت دەلەگاتسياسىنا ەۋروپاعا قاشقان سىبايلاس جەمقور شەنەۋنىكتەردىڭ قاراجاتىن ىزدەستىرۋ جانە قازاقستانعا قايتارۋ جونىندەگى بىرلەسكەن كوميسسيا قۇرۋ تۋرالى ۇسىنىس جاساعانىن دا ەسكە سالا كەتتى.

«سول كەزدە ءبىز ەۋروپارلامەنت دەپۋتاتتارىنان حالىقتان ۇرلانعان اقشانى انىقتاۋعا جانە ونى قايتارۋعا كومەك كورسەتۋىن سۇرادىق. ءبىز قۇقىق قورعاۋ ورگاندارىنىڭ قىزمەتىن قايتالاۋدى ۇسىنبايمىز. قىلمىستىق قۋدالاۋ - ولاردىڭ مىندەتى. الايدا، ۇرلانعان اقشانى قايتارۋ جونىندەگى جۇمىستىڭ ناتيجەسى وتە از، ماردىمسىز ەكەنىن كورىپ وتىرمىز.

سوندىقتان دا، قازاقستانعا جەمقور شەنەۋنىكتەر ۇرلاپ كەتكەن اقشانى قايتارۋ ەۋروپارلامەنتپەن ءوزارا ىنتىماقتاستىقىمىزدىڭ ماڭىزدى مىندەتىنە اينالماق. بۇل ءۇشىن زاڭنامالىق كەدەرگىلەر بولسا - ولارمەن بىرلەسە وتىرىپ جۇمىس ىستەيىك»، - دەپ اتاپ ءوتتى دەپۋتات.

پەرۋاشەۆ ەۋروپالىق تاجىريبەدە سىبايلاس جەمقورلارمەن زاڭسىز ۇرلانعان نەمەسە سالىق سالۋدان جاسىرىنعان قاراجاتتى ەلگە قايتارۋ مىسالدارى بار ەكەنىن دە تىلگە تيەك ەتتى.

«بۇگىندە ءبىز ينۆەستيتسيا، ەكونوميكالىق جانە الەۋمەتتىك دامۋ تۋرالى، بايلار مەن كەدەيلەر اراسىنداعى الشاقتىقتى قىسقارتۋ ماسەلەلەرى تۋرالى ايتىپ جاتىرمىز. ۇلتتىق بانكتىڭ باسشىلىعى بەرگەن مالىمەتتەرگە سايكەس -100 ميلليارد دوللارعا جۋىق قاراجات، ال حالىقارالىق ساراپشىلاردىڭ باعالاۋى بويىنشا - 140 ميلليارد دوللار كولەمىندە قاراجات قازاقستاننان زاڭسىز شەتەلگە شىعارىلعان. مىنە، مۇندا ينۆەستيتسيا، ەكونوميكا جانە كەدەيلىكپەن كۇرەسۋ دەگەننىڭ تۇپكى  نەگىزى وسىندا جاتىر»، - دەدى پەرۋاشەۆ.

«مەنىڭ ويىمشا، قازاقستان بۇل ماسەلەدە ەۋروپارلامەنتتىڭ كومەگىنە سەنىم ارتۋعا قۇقىلى. ەكى جىلدان استام ۋاقىت ءوتتى، بىراق ءبىزدىڭ باستامامىزعا ءالى كۇنگە دەيىن جاۋاپ جوق. سوندىقتان مەن تاعى دا جەمقور شەنەۋنىكتەر ۇرلاعان قاراجاتتى ەلگە قايتارۋ تۋرالى قازاقستان پارلامەنتىنىڭ جانە ەۋروپالىق وداقتىڭ بىرلەسكەن جۇمىس توبىن قۇرۋدى ۇسىنامىن جانە بۇگىنگى وتىرىستىڭ حاتتاماسىنا وسى ۇسىنىستى قوسۋدى سۇرايمىن »، - دەپ ءوز ءسوزىن ءتامامدادى «اق جول» كوشباسشىسى.

Abai.kz