"نۇر وتان" پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى ەلىمىزدەگى پارتيالىق قۇرىلىمداردىڭ ماسەلەسىنە توقتالىپ، "نۇر وتاننىڭ" ناقتى ىستەردىڭ پارتياسىنا اينالعانىن ەرەكشە اتاپ ءوتتى.

– بۇگىن ءبىز پارتيامىز ءۇشىن ەڭ وزەكتى ماسەلەلەردى تالقىلادىق. قازىرگى تاڭدا "نۇر وتان" تەك ساياسي عانا ەمەس، سونىمەن قاتار ناقتى ىستەردىڭ پارتياسىنا اينالدى", – دەدى مەملەكەت باسشىسى.

ەلباسى، پارتيا توراعاسى ن.ءا.نازارباەۆ 2017 جىلدىڭ قاراشاسىندا پارتيا جۇمىسىن جانداندىرۋ مەن جاڭعىرتۋعا قاتىستى بىرقاتار ناقتى تاپسىرمالار بەرگەن بولاتىن. وسىعان وراي بۇگىنگى وتكەن كەلەلى كەڭەستە پارتيا قىزمەتىن جۇيەلى تۇردە جاڭعىرتۋ ماسەلەسى قارالىپ، پارتيا توراعاسى ءبىرىنشى ورىنباسارىنىڭ ەسەبى تىڭدالدى.

ءوز سوزىندە ماۋلەن اشىمباەۆ «نۇر وتاندا» پارتيالىق جاڭعىرۋ اياسىندا زاماناۋي ساياسي تەحنولوگيالاردىڭ جاڭا تاسىلدەرى ەنگىزىلىپ جاتقانىن اتاپ ءوتتى. ونىڭ ايتۋىنشا، پارتيادا بۇگىنگى تاڭدا الەمدە كەڭىنەن قولدانىلاتىن جوبالىق باسقارۋ جۇيەسىنە كوشۋ ءىسى قولعا الىنعان.

– بۇل باعىتتا جوبالىق باسقارۋدىڭ PRINCE 2 بريتاندىق ءادىسى ەنگىزىلىپ، نۇروتاندىقتارعا جاڭاشا جۇمىس جاساۋدىڭ ءتاسىلى ۇيرەتىلۋدە، – دەدى پارتيا توراعاسىنىڭ ءبىرىنشى ورىنباسارى.

سونىمەن قاتار وتىرىستا پرەزيدەنتتىڭ بەس الەۋمەتتىك باستاماسىنىڭ ىسكە اسىرىلۋىنا قوعامدىق باقىلاۋدى ۇيىمداستىرۋ ماسەلەلەرى قارالدى.

ءىس-شارا سوڭىندا ەلباسى "نۇر وتاننىڭ" بارلىق تىڭ باستامالارىنا قولداۋ ءبىلدىرىپ، ۇكىمەت پەن اكىمدىكتەرگە ولاردى ءتيىمدى جۇزەگە اسىرۋعا بەلسەنە قاتىسۋدى تاپسىردى. سونداي-اق مەملەكەت باسشىسى پارتيا قىزمەتىن ودان ءارى جانداندىرۋ جونىندە بىرقاتار ناقتى تاپسىرمالار بەردى.

بۇگىنگى وتكەن ءىس-شاراعا ساياسي كەڭەس مۇشەلەرى – ۇكىمەتتىڭ، پارلامەنتتىڭ، پرەزيدەنت اكىمشىلىگىنىڭ باسشىلىعى، مەملەكەتتىك حاتشى، «نۇر وتان» پارتياسىنىڭ ماجىلىستەگى فراكتسياسىنىڭ دەپۋتاتتارى، ورتالىق جانە جەرگىلىكتى مەملەكەتتىك ورگانداردىڭ باسشىلارى، وبلىستىق اكىمدىكتەر مەن پارتيا فيليالدارىنىڭ وكىلدەرى قاتىستى.

ەلباسىنىڭ ەلىمىزدەگى پارتيالىق قۇرىلىمدار ماسەلەسىنە دەن قويىپ، وسىلاي باعالاۋ جاساۋى وزگە پارتيالاردى دا ويلاندىرسا دەپ تىلەيمىز.

Abai.kz