رەداكتسيادان: "تاۋەلسىزدىكتىڭ 25 جىلدان استام ۋاقى­تىندا ەكونوميكانىڭ وسۋىنە بايلانىستى، سارابدال ساياساتتىڭ جۇرگىزىلۋىنىڭ ارقاسىندا كوپ ازاماتتارىمىز ءال-اۋقات جيىپ، باي ادام­دارعا اينالدى. ءبىزدىڭ ەلدە باي ادامدار كوبىرەك بولۋى ءتيىس. ولار مەملەكەتكە قولداۋ كورسەتۋى قاجەت. بۇگىن ولاردىڭ بارلىعى­نا ۇندەۋ تاستايمىن. ءبىز كەزىندە وزگە ەلدەر­دەن قازاق جەرىنە كۇشتەپ كوشىرىلگەن حالىقتار­­عا قۇشاق جايدىق، قورعان بولدىق. ءدال وسىن­­­داي قامقورلىقتى ەندى شەتتەن كەلەتىن ءوز قانداس­تارىمىزعا كورسەتۋىمىز ابزال. بيزنەسمەن­دەردى وسى قورعا وزىندىك ۇلەس قوسۋعا شاقىرامىن". بۇل پرەزيدەنت نۇرسۇلتان ءابىشۇلى نازارباەۆتىڭ شەتتەگى قازاقتارعا قاراتا ايتقانى. دۇنيەجۇزى قازاقتارىنىڭ V قۇ­رىل­تايىندا سويلەدى. 

ەلباسىنىڭ وسى ءبىر سارابدال ساياساتىنا ءۇن قوسۋ ءۇشىن  الەم قازاقتارىنا ۇندەۋ جولداندى. ونى بەلگىلى اقىن قۇل-كەرىم ەلەمەس جازىپ، رەداكتسيامىزعا جولداپتى.

ءبيسميللاھير راحمانير راحيم!

ۋا، بوتەن ەلدە ءتۇتىن تۇتەتكەن، قازاعىم!

قىتايداعىداي باسىڭا قارا بۇلت ۇيىرىلمەي تۇرعاندا، وتانىڭا ورال!

"جات جارىلقامايدى، ءوز ولتىرمەيدى"...

الەم مەملەكەت ەكەنىن مويىنداعان تاۋەلسىز ەلىڭ بار...

قانداس قاۋىمىڭ، حالقىڭ بار...

وتانىڭدا سەنىڭ دە، ۇرپاعىڭنىڭ دا جەر يەلەنۋگە، وقىپ ءبىلىم الۋعا، لاۋازىمدى قىزمەت اتقارۋعا قاقىسى دا، ەنشىسى دە بار...

ادامدىق، ازاماتتىق،تەڭدىك، وزگەگە تاۋەلسىزدىك جاعىنان قاقىڭ بار...

جۇرگەن ەلىڭدە ەكىنشىسىڭ... ءتۇرلى مامىلەدە، بارىندە ەكىنشىسىڭ...

سول ەلدىڭ تىلىندە سويلەپ، سول ەلدىڭ ءداستۇر-سالتىن قابىلداۋعا ءماجبۇرسىڭ...

ءسوزسىز سول ەلدىڭ ازاماتى بولىپ قالا بەرەسىڭ...

بارا-بارا ءسوزسىز سول ۇلتتىڭ ءبىر مۇشەسى بولۋعا ءماجبۇرسىڭ...

سەن ءوز تىلىڭدە سويلەي المايسىڭ. ءداستۇرىڭ دارىپتەلمەيدى. سەنىڭ تىلىڭدەگى مەكتەپ، گازەت، جۋرنال بولسا، جابىلادى...

ول ەلدىڭ ءار ازاماتى ساعان جات كوزبەن قارايدى...

جات ەلدە ءۇرىم-بۇتاعىڭ جات بولىپ، سول ەلگە تۇبەگەيلى  سىڭىپ، جوعالادى...

انا تىلىڭنەن، سالت-داستۇرىڭنەن ايىرىلىپ، باسقانىڭ سالت-ءداستۇرىن قابىلدايسىڭ...

مىنەز قۇلقىڭ، ءتۇر-تۇرپاتىڭ تۇبەگەيلى وزگەرەدى...

سول ەلدىڭ جىرىن جىرلايسىڭ...

ىشتەي ءوز وتانىڭدى، سىرتتاي سول وتانىڭدى سۇيەتىن بولاسىڭ...

بارا-بارا ءوز وتانىڭدى ءبىر بەلگىسىز حالمەن جەككورەتىن بولاسىڭ... بىراق، سەنى ءسويتتى ەكەن دەپ، ول ەلدىڭ حالقى سەنى ىشىنە تولىق تارتپايدى...

نەگىزگى، اسا ماڭىزدى ورىندارعا سەنى (ۇرپاعىڭدى) استە وتىرعىزبايدى...

قاندەننىڭ "كۇشىك" اتى قالمايتىنى سياقتى، سەنىڭ "كىرمە، سىڭبە" اتىڭ قالمايدى...

وتانىڭنىڭ ساعان ەسىگى دە، قۇشاعى دا اشىق...

سەنى (ۇرپاعىڭدى) مۇندا ءوز ورنىڭ كۇتىپ تۇر...

وزگە ەلدە سۇلتان بولساڭ دا، ءوز ەلىڭدە ۇلتان بولعانىڭا ەش دارەجە جەتپەيدى...

باسقا ۇيدە - باعجاڭسىڭ. ءوز ۇيىڭدە - شولجاڭسىڭ...

("ەنەسى تەپكەننىڭ ەتى اۋىرمايدى"...)

جالپى قاي ەلدە بولساڭ دا، سول ەلگە قوسىلۋىڭ كەرەك.

وتانىڭ سەنى 27 جىلدان بەرى شاقىرىپ كەلەدى...

"شاقىرعاندا كەلمەسەڭ، شاقىرعانعا زار بولاسىڭ!"

قۇل-كەرىم ەلەمەس

Abai.kz