نۇرسۇلتان نازارباەۆ جۋرناليستەرگە ارنالعان سوزىندە ەكى ەلدىڭ بۇكىل قارىم-قاتىناستارى تاريحىندا مەملەكەتتەر باسشىلارى اراسىندا سەنىمدىلىك سيپاتىنداعى ديالوگ ورنىققانىن اتاپ ءوتتى. - دەپ حابارلايدى اباي-اقپارات اقوردانىڭ ءباسپاسوز قىزمەتىنە سىلتەمە جاساپ.

– قىتاي حالىق رەسپۋبليكاسىنىڭ توراعاسى سي تسزينپينمەن بىرگە ءوزارا سەنىمدى جانە دوستىق قاتىناستارىمىزدى نىعايتا بەرەمىز. ەلدەرىمىز اراسىندا شەشىمىن تاپپاعان ماسەلە جوق، كەرىسىنشە، ودان ءارى دامۋ ءۇشىن جولىمىز اشىق، – دەدى مەملەكەت باسشىسى.

قازاقستان پرەزيدەنتى ۇلتتىق ەكونوميكانىڭ شيكىزاتتىق ەمەس سەكتورلارىن دامىتۋدىڭ ماڭىزدىلىعىن اتاپ ءوتىپ، بىرلەسكەن يندۋستريالدى-يننوۆاتسيالىق جوبالاردى جۇزەگە اسىرۋ ماسەلەسىنە توقتالدى.

– ءبىز 51 جوباعا قاتىستى ۋاعدالاستىققا قول جەتكىزدىك. يندۋستريالدى-يننوۆاتسيالىق باعدارلامانى جۇزەگە اسىرىپ جاتىرمىز. سونىڭ اياسىندا 1200 كاسىپورىن اشتىق. ءبىزدىڭ مىندەتىمىز – شيكىزات رەسۋرستارىنا تاۋەلسىز ەكىنشى بالامالى ەكونوميكا قالىپتاستىرۋ، – دەدى نۇرسۇلتان نازارباەۆ.

بريفينگ بارىسىندا ءوزارا تيىمدىلىكتى قامتاماسىز ەتۋ قاعيداتى نەگىزىندە  قازاقستاننىڭ قىتايمەن ەكونوميكالىق ىنتىماقتاستىقتى دامىتىپ كەلە جاتقانى جونىندە ايتىلدى. ەكى جاقتى قارىم-قاتىناستار ستراتەگيالىق مىندەتتەر جانە قازاقستان ەكونوميكاسىن دامىتۋدىڭ باسىمدىقتارى تۇرعىسىنان قالىپتاسىپ كەلەدى. اتاپ ايتقاندا، حيميا ونەركاسىبىندەگى، تاۋ-كەن-مەتاللۋرگيا كەشەنىندەگى، ماشينا جاساۋ، ەنەرگەتيكا، اگروونەركاسىپ كەشەنى جانە ەكونوميكانىڭ باسقا دا سالارىنداعى يندۋستريالدى-يننوۆاتسيالىق جوبالاردى جۇزەگە اسىرۋ كوزدەلىپ وتىر. بىرلەسكەن جوبالاردى ىسكە اسىرۋ ناتيجەسىندە ەكسپورتقا باعىتتالعان ءارى جوعارى قوسىمشا قۇنى بار جوعارى تەحنولوگيالى وتاندىق ءونىم وندىرەتىن كاسىپورىندار قۇرىلادى.

سونىمەن قاتار، قازاقستان-قىتاي ىسكەرلىك كەڭەسى وتىرىسىنىڭ ناتيجەلەرى دە اتاپ ءوتىلدى. سونىڭ بارىسىندا ەكى ەلدىڭ بيزنەسمەندەرى جالپى سوماسى شامامەن 13 ميلليارد تەڭگە بولاتىن 40 قۇجاتقا قول قويدى.

نۇرسۇلتان نازارباەۆ ىسكەرلىك توپتار مەن جوبالاردى جۇزەگە اسىرۋعا اتسالىساتىن شارۋاشىلىق سۋبەكتىلەر قىتاي حالىق رەسپۋبليكاسىمەن ينۆەستيتسيالىق ىنتىماقتاستىقتى ىلگەرىلەتۋدىڭ نەگىزگى درايۆەرلەرى بولىپ سانالاتىنىنا نازار اۋداردى. بۇل ۇدەرىستە جوبالىق قارجىلاندىرۋ تەتىكتەرى بەلسەندى پايدالانىلادى. سوعان سايكەس جوبانىڭ ءوزى كەپىلدەمەلىك قامتاماسىز ەتۋشى بولىپ سانالادى.

سونىمەن قاتار، نۇرسۇلتان نازارباەۆ ەلدىڭ كولىك-ترانزيت الەۋەتىن ارتتىرۋعا باعىتتالعان ينفراقۇرىلىمدىق جوبالاردى ورىنداۋ ماسەلەلەرىنە توقتالدى.

مەملەكەت باسشىسى اگروونەركاسىپ كەشەنىندەگى ىنتىماقتاستىقتى تەرەڭدەتۋگە قىتايدىڭ مۇددەلىلىك تانىتىپ وتىرعانىن دا اتاپ ءوتتى.

قازاقستان پرەزيدەنتى شانحاي ىنتىماقتاستىق ۇيىمى اياسىندا ۇلتتىق ۆاليۋتالارمەن ءوزارا ەسەپ ايىرىسۋ جونىندە ۇسىنىس بىلدىرگەنى تۋرالى تولىق اڭگىمەلەپ، قىتاي حالىق رەسپۋبليكاسىنىڭ توراعاسى سي تسزينپينمەن بولعان كەلىسسوزدەر بارىسىنا توقتالدى.

– سەنىم بولعان كەزدە بارلىق ماسەلە شەشىلەدى. كەز كەلگەن جاعدايدا ءوز ەلىڭنىڭ مۇددەسىن ەسكەرۋ كەرەك. كەلىسسوز جۇرگىزۋ قاشان دا قيىن، سول سەبەپتى بۇعان مۇقيات دايىندالامىن. بۇل – حالقىمنىڭ ماعان جۇكتەگەن جاۋاپكەرشىلىگى، – دەدى نۇرسۇلتان نازارباەۆ.

Abai.kz