سوڭعى 2-3 كۇننەن بەرى الەۋمەتتىك جەلىدە قازاقستان مەن قىتاي اراسىندا ۆيزاسىز بايلانىس ورناتىلادى دەگەن قاۋەسەت تارادى. ءتىپتى، قىتاي ەلشىلىگى الدىندا ۇزىن-سونار كەزەكتە تۇرعان قىتايلاردىڭ بەينەجازباسى پايدا بولدى.

وسىعان بايلانىستى قازاقستاننىڭ سىرتقى ىستەر مينيسترلىگى جاۋاپ بەردى. جاۋاپ بەرگەندە دە - ەكى ەل اراسىنداعى ۆيزاسىز قارىم-قاتىناس ورناتۋ تۋرالى اقپاراتتىڭ جالعان ەكەنى ايتىلدى.

"قازاقستان قىتايمەن ارادا ۆيزاسىز رەجىم ەنگىزۋ تۋرالى ەشقانداي كەلىسسوزدەر جۇرگىزىپ جاتقان جوق. قىتاي ازاماتتارى ءبىزدىڭ ەلگە ۆيزاسىز كىرە الادى ەكەن دەگەن اقپارات شىندىققا جاناسپايدى. جالعان اقپارات. ءتىپتى پروۆوكاتسيالىق اقپارات", - دەدى ءسىم.

دەگەنمەن، سىرتقى ىستەر مينيسترلىگى ترانزيت ارقىلى ۇشىپ بارا جاتقان  قىتاي ازاماتتارىنا اۋەجايدا ۆيزاسىز بولۋ ۋاقىتىن  24 ساعاتتان 72 ساعاتقا دەيىن ۇزارتۋ جونىندە كەلىسسوزدەر ءجۇرىپ جاتقانىن راستادى.

ياعني، قازاقستان مەن قىتاي ءوزارا كەلىسسوزدەر جۇرگىزىپ جاتىر. ول بويىنشا - قىتايدىڭ حالىقارالىق اۋەجايلارى ءۇشىن، ترانزيت ارقىلى ۇشاتىندارعا قازاقستان اۋماعىندا ۆيزاسىز بولۋ ۋاقىتىن 24 ساعاتتان 72 ساعاتقا دەيىن ۇزارتۋعا مۇمكىندىك بەرەدى. سونداي-اق، قازاقستاندىقتار ءۇشىن جەكەلەگەن ۆيزا تۇرلەرىن بەرۋ ماسەلەسى دە قامتىلعان.