ءماجىلىس سپيكەرى نۇرلان نىعماتۋليننىڭ توراعالىعىمەن پارلامەنت پالاتالارىنىڭ بىرلەسكەن وتىرىسى ءوتتى. كۇن تارتىبىندە ءبىر عانا سۇراق. ول التىنشى سايلانعان قازاقستان رەسپۋبليكاسى پارلامەنتى ءۇشىنشى سەسسياسىنىڭ جابىلۋى جانە پارلامەنتتىك كانيكۋل تۋرالى.

بىرلەسكەن وتىرىستا ءماجىلىس توراعاسى التىنشى سايلانعان پارلامەنتتىڭ ءۇشىنشى سەسسياسى وتە ماڭىزدى جانە تاريحي كەزەڭدە وتكەنىن ايتىپ، ەلىمىزدىڭ بۇۇ قاۋىپسىزدىك كەڭەسىنە توراعا بولعانىن، سونداي-اق، وتكەن جىلى «ەكسپو» حالىقارالىق كورمەسى ۇيىمداستىرىلعانىن، ەلوردامىزدا سيريا جاعدايى بويىنشا «استانا پروتسەسى» ءوتىپ، قازاقستاننىڭ الەمدىك دەڭگەيدەگى كەلىسسوزدەر الاڭىنا اينالعانىنا توقتالدى.

«وسى بارلىق شارالار ەلباسىمىز نۇرسۇلتان ءابىشۇلى نازارباەۆتىڭ حالىقارالىق بيىك بەدەلىنىڭ، ىشكى جانە سىرتقى ساياساتتاعى ەرەن ەڭبەگىنىڭ ناقتى كورسەتكىشى. سونىمەن بىرگە، ءۇشىنشى سەسسيا كەزىندە ەلىمىزدە تاعى ءبىر تاريحي وقيعا بولدى. پرەزيدەنتىمىز وسى پارلامەنتتە ءوزىنىڭ بەس الەۋمەتتىك باستاماسىن جاريالادى. بۇل حالقىمىزدىڭ جاعدايىن كۇشەيتۋگە ارنالعان تەڭدەسى جوق، ەرەكشە قادامدار. دەپۋتاتتارىمىز وسى باستامالاردى زاڭ جاعىنان قولداۋعا، ارينە، بەلسەنە ارالاستى. ەلباسىمىزدىڭ باسقا دا تاپسىرمالارىن جوعارى دەڭگەيدە، ساپالى زاڭدارمەن قامتاماسىز ەتۋ - پارلامەنتتىڭ وسى سەسسياداعى ەڭ نەگىزگى، ەڭ جاۋاپتى مىندەتى بولدى» - دەدى، پالاتا سپيكەرى ن. نىعماتۋلين.

پالاتا توراعاسى اتاپ وتكەن ساندى مالىمەتتەرگە توقتالساق، وتكەن سەسسيادا مەملەكەت باسشىسىنىڭ تاپسىرمالارىن ىسكە اسىرۋ بارىسىندا قوس پالاتانىڭ 4 بىرلەسكەن وتىرىسى، ءماجىلىستىڭ 38, سەناتتىڭ 25 جالپى وتىرىستارى ءوتىپ، وندا 400-گە جۋىق ماڭىزدى ماسەلەلەر قارالعان.

ءۇشىنشى سەسسيا باستالعاندا ەكى پالاتانىڭ قاراۋىندا 129 زاڭ جوباسى بولسا، بۇگىندە ولاردىڭ 84-ءى قابىلدانىپ، 65 زاڭ جوباسىنا ەلباسىنىڭ قولى قويىلىپ، ءوز كۇشىنە ەنگەن.

ماڭىزدى زاڭ جوبالارىنىڭ قاتارىندا ەلىمىزدىڭ باستى قارجى قۇجاتى رەسپۋبليكالىق بيۋدجەت تۋرالى زاڭدى اتاپ ءوتۋ كەرەك.

وسى زاڭعا دەپۋتاتتار ەنگىزگەن ۇسىنىستاردىڭ ناتيجەسىندە – بيۋدجەتتىڭ الەۋمەتتىك باعىتى ودان ءارى كۇشەيتىلىپ، ءبىلىم بەرۋ، دەنساۋلىق ساقتاۋ، مادەنيەت جانە سپورت نىساندارىنا ءتيىستى قاراجاتتار بولىنگەن.

وسى قاتاردا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» جانە «كەدەندىك رەتتەۋ تۋرالى» كودەكستەر مەن «كاسىپكەرلىك قىزمەتتى رەتتەۋدى جەتىلدىرۋ ماسەلەلەرى جونىندە» زاڭدى، سونداي-اق، «ستاندارتتاۋ تۋرالى» جانە «ۆەنچۋرلىك قارجىلاندىرۋ» تۋرالى زاڭداردى اتاپ وتۋگە بولادى.

پارلامەنت وسى سەسسيادا مەملەكەت قۇرىلىسىن جانە ازاماتتىق قوعامدى دامىتۋ باعىتىندا «قازاقستان حالقى اسسامبلەياسى تۋرالى» زاڭعا، «اقپارات جانە كوممۋنيكاتسيالار» تۋرالى، ال الەۋمەتتىك - گۋمانيتارلىق باعىتتا «تۇرعىن ءۇي قاتىناستارى ماسەلەلەرى» جانە «جۇمىسپەن قامتۋ جانە حالىقتىڭ كوشى-قونى ماسەلەلەرىنە ارنالعان تاعى دا كوپتەگەن زاڭداردى قابىلدادى.

ال ەلباسىنىڭ «ۇلت جوسپارى – 100 ناقتى قادام» باعدارلاماسىن ىسكە اسىرۋ بويىنشا پارلامەنت قابىلداعان زاڭداردىڭ ىشىندە «جەر قويناۋى جانە جەر قويناۋىن پايدالانۋ تۋرالى» كودەكستىڭ ورنى ەرەكشە. وندا وسى سالاداعى قاتىناستاردى رەتتەيتىن بارلىق نورمالار العاشقى رەت ءبىر عانا زاڭنامالىق قۇجاتقا جيناقتالىپ، جەردى پايدالانۋشىلار ءۇشىن دە، ينۆەستورلار ءۇشىن دە قولايلى جاسالعان.

ن. نىعماتۋلين پارلامەنت ءوزىنىڭ نەگىزگى مىندەتى سانالاتىن زاڭدار شىعارۋمەن قاتار، قوعامدىق ينستيتۋتتارمەن جانە حالىقپەن ءوزارا جۇمىستاردى دا تابىستى جۇزەگە اسىرعانىن ايرىقشا اتاپ ءوتتى.

وسى رەتتە پارلامەنتتە 18 - ۇكىمەت ساعاتى، 6 - پارلامەنتتىك تىڭداۋ، 27 - «دوڭگەلەك ۇستەل»، كوميتەتتەردىڭ 44 - كوشپەلى وتىرىسى جانە 3 - حالىقارالىق كونفەرەنتسيا ۇيىمداستىرىلدى. بۇلاردىڭ بارلىعى ماڭىزدى ەكونوميكالىق جانە الەۋمەتتىك ماسەلەلەرگە ارنالدى.

وسى جولدا «نۇر وتان»، «اق جول»، «حالىق كوممۋنيستەرى» پارلامەنتتىك فراكتسيالارى جانە قازاقستان حالقى اسسامبلەياسىنىڭ دەپۋتاتتىق توبى بىرلەسە جۇمىس اتقاردى.

الداعى سەسسيادا دا تالقىلاناتىن ماسەلەلەر، قابىلداناتىن زاڭدار، بىرلەسىپ اتقاراتىن شارالار دا وتە كوپ ەكەنىن اتاپ وتكەن ن. نىعماتۋلين: -

كەلەسى، ءتورتىنشى سەسسيادا پارلامەنت ەلباسىنىڭ جولداۋى مەن بەس الەۋمەتتىك باستامانى ىسكە اسىرۋعا ارنالعان جۇمىستاردى ودان ءارى جالعاستىراتىن بولادى. دەپۋتاتتىق كورپۋس - ۇكىمەتپەن تىعىز بايلانىس جاساي وتىرىپ، وتاندىق ەكونوميكانى كۇشەيتۋگە، كاسىپكەرلىكتى قولداۋعا، الەۋمەتتىك كەپىلدىكتەردى ساقتاۋعا، ەلىمىزدى ودان ءارى نىعايتۋعا جانە دەموكراتيانى دامىتۋعا باعىتتالعان زاڭدار قابىلدايتىن بولادى»، - دەدى.

قازىرگى ۋاقىتتا پارلامەنت قاراۋىندا 45 زاڭ جوباسى، اتاپ ايتقاندا، «ارنايى ەكونوميكالىق جانە يندۋستريالىق ايماقتار» تۋرالى، «مەملەكەتتىك ستاتيستيكا»، «مەملەكەتتىك ساتىپ الۋ» ماسەلەلەرى جونىندەگى جانە «اگروونەركاسىپتىك كەشەندى رەتتەۋ»، «كينەماتوگرافيا» تۋرالى زاڭ جوبالارى بار.

پالاتا سپيكەرى ءوز سوزىندە دەپۋتاتتاردىڭ زاڭ شىعارۋ باستاماشىلىعىن، قوعامدىق جانە حالىقارالىق باعىتتاعى جۇمىستارىن، ايماقتارعا ءىس-ساپارلارىن جان-جاقتى اتاپ ءوتتى.

سونداي-اق، ءماجىلىس توراعاسى جاڭا سەسسيا باستالعاننان كەيىن، قازان ايىندا استانا قالاسىندا «ينۆەستيتسيا - جاستارعا» دەگەن حالىقارالىق كونفەرەنتسيا ۇيىمداستىرۋعا باستاماشى بولاتىنىن ايتىپ، بىرلەسكەن وتىرىسقا قاتىسۋشىلاردى ەلوردامىز استانانىڭ 20 جىلدىق مەرەيتويىمەن قۇتتىقتادى.

«حالقىمىزدا «كەمەگە مىنگەن، تەڭىزگە شىعادى»،-دەگەن قاناتتى ءسوز بار. 20 جىل بۇرىن ەلباسى نۇرسۇلتان ءابىشۇلى نازارباەۆتىڭ دەپۋتاتتار الدىندا جاريالاعان تاريحي يدەياسى - بۇگىندە بارشا قازاقستاندىقتاردىڭ ماقتانىشى بولىپ تابىلادى. بۇگىن استانا – ەلباسىنىڭ ەرەن ەرلىگى. بۇگىن استانا – ەلباسىنىڭ تاريحي جەڭىسى. بۇگىن استانا – ەلباسىنىڭ ورىندالعان ارمانى»، - دەدى.

ءسوزىن قورىتىندىلاي كەلە، ءماجىلىس توراعاسى سەسسيا جۇمىسىنىڭ ناتيجەسى سەنات پەن ءماجىلىستىڭ جانە ۇكىمەتپەن، بارلىق مەملەكەتتىك ورگاندارمەن، قوعامدىق ۇيىمدارمەن، اقپارات قۇرالدارىمەن بىرلەسىپ، اتقارعان ەلەۋلى ەڭبەكتەرىنىڭ جەمىسى ەكەنىن ايتىپ، العىسىن جەتكىزدى.

Abai.kz