قۇلقىن سارىدەن مىرزان دوسىم كەنجەباي ماعان بىرنەشە رەت تەلەفون شالعان ەكەن، مەن سونىڭ سوڭعىسىن عانا كورىپ قالىپ، تەلەفون تۇتقاسىن كوتەرگەنىم سول ەدى، القىن-جۇلقىن مىرزان دوسىم:

-ءاي، كوكبورى، بۇل نە ۇيقى؟!. - دەدى.

-تىنىشتىق پا، دوسىم-اۋ؟- دەپ ەدىم، مىرزان:

-سەنىڭ جاتىسىڭ مىناۋ. بۇكىل قازاق سەن سياقتى ۇيقىدا. مىنا جۇرت 20 ميلليارد اقشا ءبولىپ، استانانى دۇرىلدەتىپ كۇندىز-ءتۇنى تويلاپ جاتىر. بۇل ەلگە تويدان باسقا ەشتەڭە دە كەرەك ەمەس وسى،-دەپ كەيىدى. مەن ونىڭ ءسوزىن ءبولىپ ەدىم، ماعان رەنجىپ قالعان مىرزان:

-وسى سەن ءسوزدى نەگە اياعىنا دەيىن تىڭدامايسىڭ؟ - دەپ رەنجىدى.

-ءول دەيسىڭ بە ەندى، تىڭداپ تۇرمىن عوي،-دەپ ەدىم ول تاعى:

-مىنا تويدان شارشامايتىن قازاق توي جاساپ جاتقاندا انا باتىس قازاقستاننىڭ كازتالوۆكا اۋدانىنا رەسەيدىڭ راكەتاسى قۇلىپ، پالەنباي ءجۇز مىڭ گەكتار جەر ورتكە ورانىپتى. ءبىزدىڭ ساناسىزدار تاپ ءبىر ەشتەڭە بولماعانداي، دۇرىلدەتكەننىڭ ۇستىنە دۇرىلدەتىپ تويلاپ جاتىر.

-دوسىم-اۋ، مەن نە ىستەيمىن سوندا؟

-مىنە، بىردەڭە ايتساڭ ءبىزدىڭ قازاق ءوستىپ كەرى تارتادى...- دەپ ول تەلەفون تۇتقاسىن ءۇزىپ جىبەردى.

مەن بولسام، نە دەرىمدى بىلمەي ءۇنسىز قالدىم...

جۇماش كوكبورى

Abai.kz