«جەتىنشى تەلەارنانىڭ» كرەاتيۆتى ديرەكتورى، مەديا ساراپشى ەۆگەني پەرەۆەرزەۆ ەلىمىزدەگى كوممەرتسيالىق راديولاردىڭ نەلىكتەن دامىماي وتىرعانىن ايتتى، دەپ حابارلايدى Baq.kz ءتىلشىسى.

ونىڭ پىكىرىنشە، ەلىمىزدەگى قازاقستاندىق راديولاردى دامىتۋ ءۇشىن ءالى دە جۇمىس جۇرگىزۋ قاجەت.

«وتاندىق راديو نارىقتى جەكە اتاپ ءوتۋ كەرەك. سەبەبى، قازاقستاندىق راديوستانتسيالاردى تىڭداپ، تەلەارنالاردى كورگەن كەزدە اسەر المايسىڭ. نەگە ءبىزدىڭ پوپ جۇلدىزدار الەمدىك دەڭگەيدە تانىمال ەمەس؟ سەبەبى، ءبىز ءالى شىڭدالعان جوقپىز. ءبىز تەك كوشىرىپ باسۋ ءادىسى بويىنشا جۇمىس ىستەۋدەمىز»، - دەدى ول Radio Asia 2018 حالىقارالىق كونفەرەنتسياسىنىڭ كۋلۋارىندا.

پەرەۆەرزەۆتىڭ ايتۋىنشا، قازاقستاندا راديو نارىق تولىق قالىپتاسپاعان.

«ەلىمىزدەگى راديوستانتسيالاردىڭ سانى ساۋساقپەن سانارلىق قانا. ەلىمىزدە كوممەرتسيالىق راديولاردىڭ تاريحى 1990 جىلدان باستالعانىمەن، ولار ءالى دامىماعان. بىزگە ءالى كوپ نارسەگە ۇيرەنۋ كەرەك. قازاقستان اۋماعىندا FM فورماتىنداعى ستانتسيالارعا نەمقۇرايلى قارايدى. ەلىمىزدە ءالى كۇنگە دەيىن تولىعىمىن اشىق اڭگىمە فورماتىنا نەگىزدەلگەن راديو جوق. بىزدەگى راديوستانتسيالار مۋزىكالىق-اقپاراتتىق باعىتتا جۇمىس ىستەيدى. ءتىپتى اقپاراتتىق-مۋزىكالىق باعىتتا جۇمىس ىستەيتىن ستانتسيالار از. ونىڭ قاتارىنا تەك «قازاق راديوسىن» جاتقىزۋعا بولادى»، - دەدى ساراپشى.

ەلىمىزدەگى مەديا نارىقتا 20 جىلدان استام ۋاقىت جۇمىس ىستەپ جۇرگەن ساراپشى وتاندىق راديولار مۋزىكالىق پلەەرعا اينالىپ كەتكەنىن اشىق ايتتى.

«ستانتسيالاردا تەك مۋزىكا وينايدى. راديو مۋزىكالىق پلەەرگە اينالىپ بارا جاتىر. مۇندا ساۋاتتى جۇرگىزۋشىلەر جوق. ال ولار قالاي پايدا بولادى؟ ەگەر ەلىمىزدە اشىق اڭگىمە فورماتىنداعى راديولار از بولسا. قازىرگى تاڭدا ءبىز راديوعا تەك ادەمى مۋزىكانى قويۋدى عانا ۇيرەندىك»، - دەدى ديرەكتور.

ءسوز سوڭىندا ەۆگەني پەرەۆەرزەۆ الداعى ۋاقىتتا راديو نارىقتاعى باسەكە كۇشەيە تۇسەتىنىن مالىمدەدى.

«قازىرگى تاڭدا كوپتەگەن ازامات راديونى ينتەرنەتتەن تىڭدايدى. ءبىزدىڭ راديوستانتسيالار اۆستراليا مەن اقش-تىڭ ستانتسيالارىمەن باسەكەگە ءتۇستى. سونىمەن قاتار قازاقستاندىقتار اعىلشىن ءتىلىن ۇيرەنىپ جاتىر. سوندىقتان الداعى ۋاقىتتا اعىلشىنتىلدى ستانتسيالار ءبىزدى (راديولاردى – اۆتور) نارىقتان ىعىستىرا باستاۋى مۇمكىن»، - دەپ تۇيىندەدى ءسوزىن ول.

Abai.kz