عىلىم اكادەمياسى پرەزيدەنتى ومىرزاق سۇلتانعازين جانە عارىشكەر توقتار اۋباكىروۆ

قوستاناي توپىراعى وبلىستىڭ عانا ەمەس، بۇكىل قازاق ەلىن الەمگە تانىتقان تالانتى ۇل-قىزدارىنان كەندە ەمەس. تەك ءبىر اتتەگەن-ايى سولاردىڭ قادىرىنە جەتىپ، ەسىمدەرىن اسپەتتەۋگە كەلگەندە بوتەندەردەن ۇياتتى بولعان جايىمىز بار. اتاقتى عالىم ماناش قوزىباەۆ بۇل ومىردەن وتكەندە ونىڭ ەسىمىن ەستە قالدىرۋ جونىندە ۇزاق-سونار اڭگىمە ەتىپ جۇرگەنىمىزدە، ونى سولتۇستىك قازاقستان وبلىسى يەمدەنىپ كەتتى. قىزىلجارلىقتار جەدەل قيمىلداپ، ەلىمىزگە بەلگىلى وسى اكادەميك اعامىزدىڭ اتىن پەدينستيتۋتقا بەرىپ، قوستانايلىقتارعا ۇلگى كورسەتتى.

ءوڭىرىمىزدىڭ ماقتان تۇتار ۇلدارىنىڭ ءبىرى، اتاقتى عالىم، كەزىندى ەلىمىزدە عانا، بۇكىل وداقتا ساۋساقپەن سانارلىقتاي ماتەماتيكتەردىڭ ءبىرى ومىرزاق سۇلتانعازين ومىردەن وتكەندە دە «ەشتەڭە تىندىرا المادىق-اۋ» دەگەن وي سانامىزدى سان مارتە وسقىلاپ وتكەن-ءدى. الايدا «ەشتەن كەش جاقسى» دەگەندەي، جاقىندا جاقسى حابار ەسىتىپ، كوڭىلىمىزدىڭ ءبىر سەرپىلىپ قالعانىن جاسىرا المادىق. ومىرزاق ماحمۇتۇلىنىڭ ەسىمى ەندى وسىندا ماڭدايىمىزعا بىتكەن جالعىز قوستاناي مەملەكەتتىك پەداگوگيكالىق ۋنيۆەرسيتەتكە بەرىلەتىن بولدى.

- ۋنيۆەرسيتەتتىڭ ۇجىمى بىزگە ومىرزاق سۇلتانعازيننىڭ ەسىمىن بەرۋ تۋرالى ماسەلەنى سوناۋ 2015 جىلى كوتەرگەن,  - دەيدى اتالمىش وقۋ ورنىنىڭ رەكتورى ەركىن ءابىل بىزبەن بولعان اڭگىمەسىندە. - عالىم كەڭەسىنىڭ ارنايى وتىرىسى دا ءوتتى. ەندى جاقىندا عانا  وسى ماسەلەدە رەسپۋبليكالىق ونوماستيكا كوميسسياسىنان قولداۋ تاپتىق.

الايدا ءبىر وكىنىشتىسى بۇل قارقىن كەيىن تومەندەپ قالعان. وعان سەبەپ، وسى وقۋ ورنىنىڭ ينستيتۋتتان ۋنيۆەرسيتەتكە اينالۋ جونىندەگى زاڭدىق قۇجاتتاردى ازىرلەۋ سەكىلدى جۇمىستىڭ اسەرى ەدى.

- ەندى بۇل جۇمىستى ودان ءارى جانداندىرامىز، - دەيدى رەكتور. - قازىر ءبىز ءبىلىم جانە عىلىم مينيسترلىگىمەن بىرلەسە جۇمىس اتقارىپ جاتىرمىز. اماندىق بولسا، اتاقتى اكادەميكتىڭ ەسىمىن بەرۋ جونىندەگى ماسەلە دە ءوزىنىڭ لايىقتى شەشىمىن تاباتىنىنا تولىق سەنىمدەمىز.

ءبىز دە وسىعان تىلەكتەسپىز.

جايبەرگەن بولاتوۆ، قوستاناي

Abai.kz