قىرعىز پرەزيدەنتى ساۋرانباي جيەنبەكوۆ 30 شىلدەدەن باستاپ ءبىر اپتاعا قىسقا مەرزىمدى ەڭبەك دەمالىسىنا  شىقتى. بۇل تۋرالى پرەزيدەنتتىڭ سايتىندا: “مەملەكەت باسشىسى ەڭبەك دەمالىسىن ىستىقكولدە وتكىزەدى” دەپ حابارلادى. 

قىرعىز باسشىسى وسىلايشا وتاندىق ءتۋريزمنىڭ دامۋىنا ءوزى باستاماشى بولىپ، ۇلەس قوسپاقشى ەكەن.

بۇل - قيت ەتسە شەت ەل اساتىن ءبىزدىڭ شەنەۋنىكتەرگە جاقسى ۇلگى بولساشى. سەبەبى، ءبىزدىڭ شەنەۋنىكتەر ءوز ەلىمىزدى اسا مەنسىنە قويمايتىنى ءجيى ايتىلىپ ءجۇر. كەيبىر اتى دارداي شەندىلەردىڭ تەك شەت ەلدە عانا دەمالاتىندارىن باق ءجيى جازىپ كەلەدى. ولاردىڭ باسىم كوپشىلىگى دەمالۋ ءۇشىن تاي ەلى مەن مىسىردى تاڭدايتىنى، ال، كەيبىرى  گرەكيا، تۇركيا، مالايزيانى بەتكە الاتىنى ەشكىمگە جاسىرىن ەمەس.ءبىزدىڭ شەندىلەر ءويتىپ-ءبۇيتىپ تاپقان  اقشاسىن وزگە ەلگە شاشىپ جاتقاندا الاكول مەن بۋراباي سياقتى وتاندىق تۋريزم ورتالىقتارى قارجى تاپپاي تۇرالاپ تۇرادى.

شەندىلەردىڭ ايتۋلارىنشا: “ەلىمىزدە تۋريستەرگە جاقسى جاعداي جاسالماعان-مىس”.

تۋريستەرگە جاعدايدى جاسايتىن كىم؟

ارينە، شەنەۋنىكتەر.

"وتاندىق كولىككە مىنىڭدەر؟" دەپ ەلباسى قانشا رەت ايتتى. قۇلاققا ىلگەن شەندى بار ما؟

"وتاندىق كيىم كيىپ، وتاندىق ساعات تاق" دەپ، تاعى دا پرەزيدەنتىمىز ۇلگى كورسەسەتتى.

انشەيىندە ەلباسىعا جاعىمپازدانۋدا الدىعا جان سالمايتىندار بۇ جولى دا ءۇنسىز قالدى.

ەندى، نۇرسۇلتان ءابىشۇلىنىڭ ءوزى الاكولگە بارىپ دەمالىپ، شەنەۋنىكتەردىڭ كوزىن اشۋى كەرەك پە؟.

كۇيىنگەننەن وسىنداي ءسوزدى ايتۋعا تۋرا كەلەدى. كىشكەنتاي عانا قىرعىزدىڭ پرەزيدەنتى ويلاعاندى بىزدىكىلەر نەگە ويلامايدى؟ "الاكول تۇرعاندا تۇركيا مەن تاي ەلىن قايتەسىڭ، شەنەۋنىك؟" دەيتىن ءبىر دۋالى اۋىزدىڭ بولماي تۇرعانىنا ناليسىڭ! امال نە؟

نۇربيكە بەكسۇلتانقىزى

Abai.kz