مەملەكەتتىك سىيلىققا قاتىستى دۋلات يسابەكوۆ پەن بيبىگۇل يمانعازينا اراسىندا "جاس الاش" گازەتىندە ۇلكەن داۋ بولعانىن كوپ وقىرمان بىلەدى. وتكەندە دۋلات اعانىڭ "ادەبيەت - ارىزدىڭ ەمەس، اردىڭ ءىسى" اتتى ماقالاسى جاريالاندى. سول ماقالاعا قارسى تاراپ تاعى جاۋاپ جازىپ، ءبىزدىڭ پورتالعا جولداعان ەكەن. ءبىز اتالمىش حاتتى وقىرمانعا ۇسىنا وتىرىپ، تىزگىندى تەڭ ۇستايتىنىمىزدى، دۋلات يسابەكوۆتىڭ دە ايتارى بولسا، وعان دا پورتالىمىزدان ورىن بەرەتىنىمىزدى ەسكەرتەمىز. 

Abai.kz اقپاراتتىق پورتالى

26 ماۋسىم كۇنگى "جاس الاش" گازەتىندە  جارىق كورگەن ماقالاما دۋلات يسابەكوۆ "ادەبيەت - ارىزدىڭ ەمەس، اردىڭ ءىسى" دەگەن قارسى ماقالا جازىپتى.

دۋلات!

سەنەن مەنىڭ ايىرماشىلىعىم، مەن  تەك قانا زاڭعا جۇگىنىپ سويلەيتىن اداممىن.      

يمانعازينانىڭ "تاۋقىمەت" اتتى كىتابى مەملەكەتتىك سىيلىقتىڭ كوميسسياسىنىڭ تالقىلاۋىنا تۇسپەگەن. سەبەبى، يۋريستىك ساراپتامادان وتپەي قالدى دەپسىڭ. بۇل شىندىققا جاناسپايدى.

ايتىپ وتىرعان يۋريستەرىڭ مەنىڭ مەملەكەتتىك سىيلىققا ۇسىنىلىپ وتىرعان 2016 جىلى اياقتالعان "تاۋقىمەتىم" مەن 1995 جىلعى اياقتالماعان، سوڭىندا "جالعاسى بار" دەگەن "تاۋقىمەتىمدى" وقىعاندارىنا مەنىڭ كوزىمدى جەتكىزە الار ما ەكەن؟! سەن ەڭ بولماسا سول كوميسسيادا وتىرعان وزىڭنەن باسقا 18 ادامنان ۇيالساڭشى، سەن عوي سولاردىڭ كوزىنشە ايتقان سوزىڭنەن اينىپ وتىرعان. الدە ەشۋاقىتتا مەملەكەتتىك سىيلىقتىڭ اينالاسىنداعى اڭگىمە باياعىداي شاشاۋ شىقپاعان كۇيىندە قالاتىنىنا سەنىمىڭ مول ما؟!

حالىقتىڭ اۋزىنا قاقپاق قويا المايسىڭ! مەملەكەتتىك سىيلىقتىڭ اينالاسىنداعى قاڭقۋ سوزدەر ەشۋاقىتتا تيىلعان ەمەس. شيقاننىڭ دا ءبىر جارىلاتىن كەزى بولادى عوي...

ء"وزىن-ءوزى ماقتاۋدان تۇراتىن، ءتىپتى "قۇبىلىس", "ياۆلەنيە", "مات تەرەزا" دەپ كۇلكى تۋدىراتىن" دەپ، مەنى مۇقاتقىڭ كەلەدى.

مەنىڭ"تاۋقىمەتىم" مەنىڭ ءومىرىم.

مەنىڭ ءۇش بولىمنەن تۇراتىن "تاۋقىمەتىمنىڭ" ءۇشىنشى ءبولىمى "سەن ايەل ەمەسسىڭ، قۇبىلىسسىڭ" دەپ اتالادى. بۇل مەنىڭ العاشقى ماحابباتىمنىڭ سوڭعى كەزدەسۋىمىزدە ماعان جىلاپ تۇرىپ ايتقان ءسوزى.

مەنىڭ قۇبىلىس ەكەنىمدى سەنىڭ ءالى مويىنداماسقا امالىڭ قالمايتىن كەز دە كەلەر!

"مات تەرەزا!" مەن مۇگەدەك انالاردىڭ قوعامىن قۇرماي تۇرىپ "يا زاۆيدۋيۋ تولكو ماتەري تەرەزە" دەگەن ماقالا جازدىم. مەنىڭ تەرەزا انانىڭ جولىمەن مۇگەدەك انالار مەن جەتىم-جەسىرلەردىڭ جالشىسى بولىپ كەلە جاتقانىما ولەڭدەر ارناپ جاتقان اقىن دا، جازۋشىلار دا از ەمەس.

حالىقتىڭ اۋزىن تيۋعا ءالىڭ كەلسە تىرىسىپ كور!

"تاۋقىمەتتى" جاستانىپ وقيتىن وقىرماندارىم جەتىپ ارتىلادى. مەن سولاردىڭ ءبارىن ساتىپ العان جوقپىن.

دۋلات!

مەملەكەتتىك سىيلىقتىڭ كوميسسيا مۇشەلەرىنە "مەن بۇل كىتاپتى 1995 جىلى "جازۋشى" باسپاسىندا ديرەكتور بولىپ وتىرعاندا شىعارىپ بەرگەنمىن" دەگەن ءسوزىڭدى جوققا شىعارا المايسىڭ. كوميسسيادا وتىرعان جازۋشىلار سەنىڭ ءبىر ۋاقىتتا "جازۋشى" باسپاسىنىڭ ديرەكتورى بولعانىڭدى ۇمىتقان جوق، سوندىقتان ولار اڭ-تاڭ بولىپ قالعان. سەن تاعى دا مەنى "يمانعازينا سىرتىن عانا وزگەرتىپ، شيرەك عاسىر بۇرىن جازىلعان "تاۋقىمەتتى" ۇسىنىپ وتىر" دەۋمەن سەن مەنى "سۇرقيا" ەتىپ كورسەتكىڭ كەلدى.

ايتىپ وتىرعانىڭداي، سەن "جازۋشى" باسپاسىنان باسقا جۇمىسقا اۋىسقانىڭ ءۇشىن كەتكەن جوقسىڭ، مەنىڭ كىتابىم شىعارىلۋ ءۇشىن اۋدارىلعان اقشانى تالان-تاراجعا سالعانىڭ ءۇشىن كەتتىڭ. كىتاپتى سەنىڭ ورنىڭا ديرەكتور بولىپ كەلگەن ەسەنعالي راۋشانوۆ شىعاردى. سەنىڭ ايتۋىڭا قاراعاندا مەن سوندا وتىز جىل بويى ەشتەمە جازباعانىم با؟! سەكسەنىنشى جىلدارى جازىلعان "تاۋقىمەتتى" باسپاعا تاپسىرعانىمدا ەلىمىز ەگەمەندىك تە  الماعان بولاتىن.

ەلىمىزدەگى قاپتاعان جەمقورلىقتىڭ وسۋىنە ءبىزدىڭ جالپاقشەشەيلىگىمىزدىڭ بىردەن ءبىر سەبەپشى ەكەنىن بۇگىن مويىنداپ وتىرمىن.

ۇياتتىڭ ءبارىن جيىپ قويىپ، الدەقاشان دۇنيەدەن وتكەن ءۇش ازاماتتىڭ اتىن اتاپ وتىر ەكەنسىڭ، ارۋاقتان قورىقپايتىن سەنەن نە ءۇمىت، نە قايىر؟! وقىرمانداردى اداستىرۋ ءۇشىن  ۇش ازاماتتىڭ ۇشەۋىنىڭ دە مارقۇم بولىپ كەتكەنىن اۋزىڭا دا الماي وتىرسىڭ.

اقشا دۋلات يسابەكوۆ ايتقانداي 1990 جىل ەمەس،1991 جىلدىڭ 27 قاراشاسىندا "جازۋشى" باسپاسىنا اۋدارىلدى. وندا ديرەكتور مارقۇم قالداربەك نايمانباەۆ بولاتىن. كەلىسىم-شارتتا دا نايمانباەۆتىڭ قولى مەن "جازۋشى" باسپاسىنىڭ ءمورى تۇر. كوپ ۇزاماي، مارقۇم نايمانباەۆ سەن ايتىپ وتىرعانداي دۇنيەجۇزى قازاقتارى قاۋىمداستىعىنىڭ توراعاسى ەمەس، قازاقستان جازۋشىلار وداعىنىڭ ءبىرىنشى حاتشىسى بولىپ سايلانىپ، ول جەردە 1996 جىلعا شەيىن وتىردى. كەتەرىندە سەنى ءوزىنىڭ ورنىنا "جازۋشى" باسپاسىنىڭ ديرەكتورى بولىپ قالدىردى. اقشا 1990 جىلى اۋدارىلعان دەيسىڭ، سوعان قاراعاندا سەن  كەلىسىم-شارتتى دا كورمەگەن بولۋىڭ كەرەك. مەنى سەن زاڭ جونىندە، تسيفر جونىندە جاڭىلىستىرا المايسىڭ.

مەن نايمانباەۆ باسقا جۇمىسقا اۋىسقان بويدا كىتابىمنىڭ جاعدايىن ءبىلۋ ءۇشىن ساعان باردىم عوي، سوندا سەن "بىلەمىن، اقشا ورنىندا، ازىرشە قاعاز كەلمەي جاتىر" دەدىڭ. ءارى قاراي دا سول سوزىڭنەن تايمادىڭ. ەندى قاعازدى ءوزىمىز ىزدەي باستادىق. گرۋزيادان كەلگەن ءبىر جىگىتتى تاپتىق، ونى ابدەن تەكسەردىك. سوسىن سول قاعاز تاباتىن جىگىتتى تاپقانىمىزدى ايتىپ، ساعان تەلەفون سوعىپ ەدىك، سەن ء"وزىمىز دە تاۋىپ جاتىرمىز، جاقىندا ەكى ۆاگون قاعاز كەلەدى" دەپ، ول جىگىتپەن كەزدەسۋدەن باس تارتتىڭ. تاعى دا ءبىرشاما ۋاقىت ءوتتى. نايمانباەۆقا بارىپ ەدىم، ول "مەن باسپانى كوتەرىپ كەتكەن جوقپىن، بارلىعىن تاپسىرىپ كەتتىم عوي" دەدى دە، سەنىڭ تەلەفونىڭدى تەردى. "الدىمدا بيەكەڭ وتىر، انا كىتابىن تەزدەتسەڭشى، وبال بولدى عوي" دەگەنىن مەن ەستىپ وتىردىم. تەلەفوننىڭ تۇتقاسىن قويىپ "ەندى ءسال شىداڭىز، ءبىر جاقتان قاعاز كۇتىپ وتىر ەكەن" دەدى نايمانباەۆ. سەن ءبىر رەت تە سوتتا نايمانباەۆتىڭ فاميلياسىن ايتقان جوقسىڭ عوي. دەمەك، سەن سول "جازۋشى" باسپاسىنا ديرەكتور بولعانىڭا ءماز بولىپ، ءوزىڭدى باسقارىپ وتىرعان ادامنىڭ فاميلياسىن ايتۋعا قورىقتىڭ عوي. ەگەر نايمانباەۆ كىنالى بولسا سول كەزدە نەگە نايمانباەۆتى سوتقا سۇيرەپ كەلمەدىڭ؟! ساعان سوتتىڭ ء"سىز ديرەكتور بولساڭىز مىنا كەلىسىم-شارتتىڭ ءتۇپ نۇسقاسى مەن كوشىرمەسىن ايىرا المايسىز با؟ يمانعازينا بىزگە مىنە، تۇپنۇسقاسىن بەرىپ وتىر" دەگەنى ەسىمدە. كەلىسىم-شارتتىڭ ءتۇپ نۇسقاسىن وزدەرىڭ قۇرتىپ جىبەرىپ، ەندى مەنىڭ قولىمداعى كەلىسىم-شارتقا جابىسىپ وتىرسىڭ، ساۋاتسىز ەكەنىڭدى بۇرىن دا بايقاۋشى ەدىم، تاعى دا كوزىم جەتىپ وتىر. مەنىڭ  قولىمداعى كەلىسىم-شارت قولمەن جازىلماعان. مەنىڭ ءبىر ەمەس ەكى قورعاۋشىم بولدى، ولار زاڭدى سەن ەكەۋمىزدەن جاقسى بىلەتىن ادامدار. ەشۋاقىتتا ولار سوتقا قولمەن جازىلعان كەلىسىم-شارتتى ۇسىنا الماس ەدى.

سەن كەلىسىم-شارتتى وقىعاندا "نە دەگەن سۇمدىق؟! 50 باسپا تاباق، تارالىمى 50.000, استاپىراللا" دەپ تاڭدانىپسىڭ. اقىسى تولەنىپ جاتسا ماعان دەسە 100 باسپا تاباق بولسىن. باسپانىڭ شىعارىپ بەرگەن باعاسى 600.000 (التى ءجۇز مىڭ) سوم بولدى. سوت ۇستىندە مەن "نايمانباەۆتى شاقىرتساڭىزدار" دەگەن ءوتىنىش جاساعان ەدىم، سوت "جازۋشى" باسپاسىنىڭ جۇمىسىن قابىلداپ العان ادام جاۋاپكەرشىلىكتى موينىنا الىپ تۇر عوي" دەدى. سەن سوتتا ءبىر رەت تە نايمانباەۆتى كىنالاعان ەمەسسىڭ، ەندى سۋدىر سوزدەرىمەن دەپ، ءولىپ قالعان ادامدى كىنالاپ وتىرسىڭ.

مەنىڭ قولىمدا تەك قانا سوۆەت اۋدانىنىڭ سوتىنىڭ شەشىمى ەمەس، جوعارعى سوت پەن باس پروكۋراتۋرانىڭ دا شىعارعان شەشىمدەرى بار.

نايمانباەۆقا ول كەزدە مەن ەمەس، سەن جاقىن بولدىڭ. ەكەۋىڭ ءبىر رۋدان، ءبىر ەلدەن، ۇندەرىڭ ءبىر، اعالى-ءىنلى بولعاندارىڭدى قاۋىم جۇرت بىلەدى.

مارقۇم "جاقسىلىق ارزىمبەتوۆ سارى-اعاشتا اكىم بولىپ تۇرعاندا باسپاعا اقشا  اۋدارعانىڭ راس پا؟" دەپ سۇرادىم دەيسىڭ. مۇنىڭ دا شىلي وتىرىك!

ەكەۋمىز سوتتاسىپ جاتقان 1994 جىلى جاقسىلىق وسى الماتىدا قازاقستان رەسپۋبليكاسىنىڭ جوعارعى كەڭەسىندە دەپۋتات بولاتىن، سارى-اعاشقا ول كەيىننەن اكىم بولدى. سوتتىڭ شەشىمى شىققاننان كەيىن الدىڭا جاقسىلىقتى سالىپ مەنىڭ كابينەتىمە كەلگەنىڭدى ارينە، ۇمىتقان جوقسىڭ. جاقسىلىقتىڭ "دوسىم، سەن ەكەۋمىز كىمگە جاقسىلىق جاساماي جاتىرمىز، مەن جىگىتتەرمەن كەلىستىم، كەشىرەيىك. بۇلار ەندى بەس باسپانى ساتسا دا بىزدەن قۇتىلا المايتىندارىن مويىنداپ وتىر، كىتابىڭ شىعادى" دەدى. "مەن تەك قانا مىنا يسابەكوۆ جۇمىستان كەتسە عانا كەشىرەمىن" دەگەنىمدى ەستىپ، قاپ-قارا بوپ تۇتىگىپ، باسىڭدى كوتەرمەي وتىرعانىڭ مىنا مەنىڭ وسى كۇنگە شەيىن كوز الدىمدا.

"ايداپ وتىرىپ سول كەزدەگى مينيستر التىنبەك سارسەنباەۆقا باردىم" دەيسىڭ.

سەن"جازۋشى"باسپاسىنا 1992 جىلى كەلدىڭ، التىنبەك  1993 جىلدىڭ قاڭتارىندا مينيستر بولدى. التىنبەككە مەن دە باردىم. باسىنان باستاپ ايتايىن.

ءبىر بارعانىمدا يسابەكوۆتىڭ الدىندا تەمەكىسىن بۇرقىراتىپ وتىرعان كەلىنشەك ماعان دۇرسە قويا بەردى.

- تاعى كەلدىڭىز بە؟ قاعاز جوق، ال، قاعازدى تاباتىن مىنا مەن، ماعان عانا تەلەفون سوعىپ تۇرىڭىز. بۇلارعا قانشا ايتساڭ دا تۇسىنبەيدى، - دەپ كەرگىدى.

- مەن ءسىزدى تانىمايمىن؟!

- مەن وسى باسپانىڭ فينانسىن باسقارامىن، اقشانى تاباتىن دا، جۇمسايتىن دا مەن!

ەكەۋمىز ءبىراز جەرگە بارىستىق، ءبىر ۋاقىتتا الگى كەلىنشەك، كوگەرەڭدەپ:

- بوجە، يا ابايا نە چيتايۋ، ۆاس تەم بولەە، - دەگەنى.

 مەن ۇشىپ تۇردىم دا:

- ابايدىڭ ارۋاعى ۇرسىن سەنى، دۋلات، ابايدى تىلدەپ وتىرعان ادامنىڭ قولتىعىنا كىرىپ وتىرعان ءتۇرىڭ مىناۋ، سەنى دە ابايدىڭ ارۋاعى ۇرسىن، - دەدىم.

شىعا سالا مەن دە ايداپ وتىرىپ مينيسترگە باردىم. التىنبەك ورنىنان تۇرىپ قارسى الدى، جاعدايىمدى سۇرادى. مەنى تىڭداي وتىرىپ، مەنىڭ وزىنە ۇسىنعان قۇجاتتارىمدى مۇقيات قاراپ شىعىپ:

- مىنا كەلىسىم-شارتپەن كەمىندە ون ميلليون ۇتاسىز، سوتقا بەرىڭىز. اقشانى تاپسىن، نايمانباەۆتى سوتقا شاقىرتسىن، - دەدى.

ورنىمنان تۇرا بەرىپ، قايتا وتىردىم دا، الگىندەگى باسپانىڭ كوممەرتسيالىق ديرەكتورىنىڭ سوزدەرىن اينا-قاتەسىز ايتىپ بايانداپ:

- سول ابايدى وقىمايتىن كەلىنشەكتى دۋلات يسابەكوۆ قازاقستاننىڭ ەڭبەك سىڭىرگەن قايراتكەرى دەگەن اتاققا ۇسىنىپ جاتىر ەكەن، - دەدىم.

التىنبەك الدىنداعى تەلەفوندى كوتەرىپ:

- "جازۋشى "باسپاسى ماراپاتقا ۇسىنىپ جاتقانداردىڭ ءتىزىمىن الىپ كەلشى، -دەدى. - فاميلياسى كىم؟

مەن فاميلياسىن بىلمەيتىنىمدى، تەك قانا ول كەلىنشەكتىڭ باسپانىڭ فينانس جاعىن باسقاراتىنىن ايتتىم.

اقسارى، الاسا بويلى جىگىت اكەلگەن ءتىزىمدى قولىنا العان التىنبەك، قىزىل كارانداشپەن بىرنەشە رەت سىزدى دا، ءتىزىمدى قايتادان ورىنباسارىنىڭ قولىنا بەردى.

مينيستر دە شاراسىز ەدى، اقشا جوق، قاعاز جوق دەگەندى ءبىر ەمەس ماقالاڭدا بىرنەشە رەت جازىپ وتىرسىڭ.

مەنىڭ سەنىڭ ءار وتىرىگىڭە دالەلدەرىم بار.

ءبىر كۇنى ء"داۋىر"باسپاسىنان قىزدار ماعان تەلەفون سوعىپ "اپاي، ءسىزدىڭ كىتابىڭىز شىعارىلاتىن بولدى، جەتەرلىكتەي قاعاز كەلدى" دەدى. ارادا ءبىر جەتى وتپەي الگى قىزدار "اپاي، سىزگە قالاي ايتارىمىزدى بىلمەي وتىرمىز، يسابەكوۆ ءسىزدىڭ قاعازىڭىزعا ءوزىنىڭ ەكى تومدىعىن شىعارتىپ جاتىر" دەدى. مەن سول كۇنى سەنىمەن سوتتاسۋعا بەل بۋعانمىن. بۇل 1992 جىل بولاتىن.

تالاي مەكتەپتەردە "تاۋىقمەت" تالقىلانىپ جاتىر. كونفەرەنتسيالارداعى وقىرماندارىمنىڭ وي-پىكىرىن جيناپ قويىپ جاتىرمىن. مەنىڭ "جاس الاشقا" ماقالام شىققاننان بەرى تەلەفونعا تىنىشتىق جوق. ءبارىنىڭ ايتاتىنى "يسابەكوۆتى بۇل جولى اياماڭىز،سوتقا بەرىڭىز!","مەملەكەتتىك سىيلىقتىڭ" كوميسسياسىنان شىعارىلۋىن تالاپ ەتىڭىز"دەپ جاتىر. 

ەي، دۋلات، سەن سياقتى ادامدى قالاي جەر كوتەرىپ ءجۇر ەكەن؟!

"بيبىگۇلدىڭ ءوزى قۇپيا ءبىر شىندىقتى جاسىرىپ وتىرعان سياقتى" دەيسىڭ!

ول قانداي قۇپيالىق؟! نايمانباەۆ قازاقستان جازۋشىلار وداعىنىڭ توراعاسى بولىپ بارا جاتىپ، "جازۋشى" باسپاسىنىڭ ديرەكتورى ەتىپ مەنى ەمەس، سەنى وتىرعىزىپ كەتتى عوي. دەمەك، بار قۇپيا نايمانباەۆ ەكەۋىڭدە بولىپ تۇر عوي. سول كەزدە مەنىڭ سەنىمەن سوتتاسىپ جاتقانىمدى ەستىگەن جۇرتتىڭ "وي،نايمانباەۆ پەن يسابەكوۆ بىرىگىپ وتىرعانى بەلگىلى عوي، ول ەكەۋىن جەڭە المايسىڭ" دەگەندەرى دە بولعان. ولگەن ادامعا قيانات ايتقىم كەلمەيدى، سەن ارۋاقتان قورىقپاعانمەن مەن قورقامىن، اۋزىما الۋعا ءماجبۇر بولىپ وتىرعانىم ءۇشىن ارۋاعىنان كەشىرىم سۇرايمىن.

سەن ماقالاڭدى "مەن ساعان جاۋ ەمەسىپ، جوق جەردەن جاۋ ىزدەمە، بيبىگۇل! ول كەزدە 50 باسپا تاباق ءبىر روماندى 50.000 تيراجبەن "اتا جاۋىڭ" مەن تۇگىل، تۋعان باۋىرىڭ دا شىعارا الماس ەدى" دەپ اياقتاپسىڭ.

سەن مەنىڭ جاۋىمسىڭ، ول ءسوزسىز!

سەن سياقتى مەن كىمنىڭ ۇزەڭگىسى كوتەرىلسە سونىڭ جانىنان تابىلاتىن، ۇزەڭگىسى تومەن ادامنان قاشىپ جۇرەتىن جان ەمەسپىن.

وسى قاسيەتىمە ءوزىم كۇندە باسىمدى يەمىن!

سەن ء"وزىڭنىڭ اتىڭدى ءوزىڭ شىعارىپ ءجۇرسىڭ" دەيسىڭ. قولىڭنان كەلسە سەن دە قاراپايىم حالىقتىڭ ماحابباتىنا  يە بول. ءبىر كول مەن ءشولدى بىرنەشە بەتكە سوزىپ سۋرەتتەيتىن جازۋشىنى بۇگىندە ەشكىم وقىمايدى، ول انىق! "روماننىڭ اتام زاماندا شىققانىن ايتتىم" دەپ وتىرسىڭ عوي، ەندى سەن وسىنى  دالەلدەپ بەرمەسەڭ مەن سەنى سوتقا بەرەمىن دە سول كەزدە كەشىرىپ جىبەرگەن ون ميلليوندى مورالدىق شىعىن رەتىندە سەنەن قايتىپ الامىن.

جىلاپ جۇرگەندەردىڭ كوز جاسىن قۇرعاتاتىن، وكشەسى قيسايىپ جۇرگەندەرگە وي سالاتىن، رۋحتى "تاۋقىمەتىم" ءۇشىن ماقتانامىن. تاريحتا سەنىڭ ەمەس، مەنىڭ كىتاپتارىم قالاتىنى ايدان انىق!

مەملەكەتتىك سىيلىقتىڭ كوميسسياسىندا ەڭ باستىسى ادىلەتشىل ادامدار وتىرۋى كەرەك بولسا، سەن سياقتى ادام ول جەردەن كەتۋى كەرەك.

ادىلدىكتى ىزدەگەن ادامنىڭ كۇنى قاراڭ بولاتىنىنا مەنىڭ كوزىم الدەقاشان جەتكەن. بىراق، يسابەكوۆ جاعىپ وتىرعان كۇيەدەن تازارمايىنشا تاڭىم اتىپ، كۇنىم باتپايتىنى وزىمە ايان.

يسابەكوۆ ايتىپ وتىرعان يۋريستەردەن 1995 جىلى شىققان "تاۋقىمەت" پەن  2016 جىلى شىققان"تاۋقىمەتتى"سالىستىرىپ وقىعاندارىن جازباشا دالەلدەۋلەرىن تالاپ ەتەمىن.

"جوق جەردەن جاۋ ىزدەمە" دەيسىڭ. سەنىڭ "تاۋقىمەتكە" جاۋىپ جاتقان جالاڭدى ەستىسىمەن مەن ساعان تەلەفون سوعىپ "سەنى قالاي جەر كوتەرىپ ءجۇر؟!" دەگەنىمدە سەن "الدەقاشان ءوتىپ كەتكەندى نەعىپ ەسكە الا بەرەسىڭدەر" دەدىڭ. نە دەيىن... ساعان داۋا جوق ەكەن...

بيبىگۇل يمانعازينا، جازۋشى، قازاقستاننىڭ ەڭبەك سىڭىرگەن قايراتكەرى

Abai.kz