مسق جىل باسىنان بەرى مەملەكەتتىك تاپسىرىس شەڭبەرىندە حالىققا تەگىن قىزمەت كورسەتكەن مەديتسينا ۇيىمدارىنا 444,6 ملرد تەڭگە تولەدى، - دەپ حابارلايدى اباي-اقپارات.

«الەۋمەتتىك مەديتسينالىق ساقتاندىرۋ قورى» كەاق جىل باسىنان بەرى قازاقستانداعى مەديتسينا ۇيىمدارىنا 444,6 ملرد تەڭگە كولەمىندە قارجى ءبولدى. بۇل تۋرالى قوردىڭ باسقارما توراعاسى بوتاگوز جاقسەلەكوۆا حابارلادى.

ايتۋىنشا، 3 تامىزعا دەيىن مسق مەملەكەتتىك تاپسىرىس شەڭبەرىندە قىزمەت كورسەتكەن ەمدەۋ ۇيىمدارىنا 444,6 ملرد تەڭگە اۋداردى. «بۇل - كەپىلدەندىرىلگەن تەگىن مەديتسينالىق كومەك (تمككك) شەڭبەرىندە بەكىتىلگەن كەلىسىمشارتتاردىڭ جالپى سوماسىنىڭ 63 پايىزى»، - دەدى مسق باسقارما توراعاسىنىڭ ورىنباسارى بوتاگوز جاقسەلەكوۆا.

تمككك جانە ءمامس پاكەتتەرىنىڭ قارجىلىق وپەراتورى بولىپ سانالاتىن قور ەمدەۋ مەكەمەلەرىمەن تمككك پاكەتى شەڭبەرىندە حالىققا تەگىن كومەك كورسەتۋ جونىندە كەلىسىمشارتتار بەكىتكەن بولاتىن. بەكىتىلگەن كەلىسىمشارتتاردىڭ جالپى سوماسى 708,6 ملرد تەڭگە.

«جۇمىس كەستەگە ساي، مەديتسينالىق قىزمەت ساپاسىن باقىلاۋدىڭ جاڭا تالاپتارىنا سايكەس ءجۇرىپ جاتىر. بولىنگەن قاراجات مەديتسينا مەكەمەلەرىنىڭ وپەراتسيالىق شىعىندارىن وتەۋگە جەتكىلىكتى»، - دەدى ب.جاقسەلەكوۆا.

ەستەرىڭىزگە سالا كەتسەك، بۇگىنگى تاڭدا قور مەملەكەتتىك تاپسىرىس بويىنشا قىزمەت كورسەتۋگە نيەت بىلدىرگەن 1352 مەديتسينا ۇيىمىمەن كەلىسىمشارت بەكىتكەن. ونىڭ 603-ءى – جەكە مەنشىك كلينيكالار. بيىل جەكە كلينيكالار سانى 2017 جىلمەن سالىستىرعاندا 138-گە كوبەيگەن. ال، ولارمەن بەكىتىلگەن كەلىسىمشارت سوماسى وتكەن جىلعىدان 2 ەسە ارتىپ، 102,4  ملرد تەڭگەنى قۇرادى.  

Abai.kz