سۇلەيمەنوۆتەر قازاقشا قاقپاي جۇرگەندە اندرەيلەر بەتاشار جاساي باستادى
قىزىق قوي، نەگىزى. تاۋەلسىزدىك العان 27 جىلدا قازاقشاعا قايرىلماعان استاناداعى اق جاعالىلاردى ءجيى ايتامىز. جون-تەرىسى سىپىرىلعانشا سىبايمىز. سەبەپ بار، ويتكەنى. قازاقستاننىڭ قازاقىلانعانىن استانا جاقتاعىلار عانا مويىندامايدى. ءاسىلى مويىنداعىسى كەلمەيدى. ايتپەسە، قازاقستاننىڭ 18 ميلليوننان اسىپ-جىعىلاتىن حالقىنىڭ 83 پايىزى قازاق ءتىلىن ەركىن مەڭگەرگەنىن بىلمەيدى دەيسىز بە؟ بىلەدى. بىلە-تۇرا، جۇرتتى - ءبىر، وزدەرىن - ەكى اقىماق كورەدى. ءجا، بۇل جايلى سالدەن سوڭ كەڭەيتىپ جازارمىز.
ەندى، مىنا قىزىققا قاراڭىز. الەۋمەتتىك جەلىدە جاپپاي تارالىپ جاتقان بەينە جازبا جەلدەي جەلىپ، بىزگە دە جەتتى.
بۇل تۇركىستان وبلىسىنا قاراستى، وتىرار اۋدانىنىڭ ورتالىعى شاۋىلدىردە بولعان توي. ءجاي توي ەمەس، ورىستاردىڭ تويى. ۇيلەنىپ وتىرعان جىگىت اندرەي بولۋى كەرەك. اندرەيگە تۇرمىسقا شىققان كەلىنشەكتىڭ دە سويى - ورىس.
وڭتۇستىكتىڭ عۇرىپىندا كەلىن تۇسكەن كۇنى ونىڭ بەتاشارى جاسالادى. مىنە، جاڭاعى اندرەيىمىز ۇيىندە بەتاشار جاساپ جاتىر ەكەن. قازاقتىڭ سالتىمەن، العان جارىنىڭ بەتىن اشىپ، اعايىن-تۋىستارىنا سالەم سالعىزۋدا. بەتاشاردى ايتقان سايىن، اتى اتالعان ۆيكا، ميشا، جەنيا، وليالار كورىمدىكتەرىن بەرۋدە.
;feature=youtu.beبۇل نە؟ بۇل قازاقتىڭ سالت-داستۇرىنە، عۇرىپ-جورالعىلارىنا ءۇش قايناسا سورپاسى قوسىلمايتىن ورىس ەتنوسىنىڭ، ءبىزدىڭ سالتقا قۇرمەتى مە؟ جوق الدە پيار ما؟
ءبىزدىڭ ويىمىزشا، بۇل جوعارىدا ايتقانىمىزداي، قازاقستان حالقىنىڭ (ونىڭ قۇرامىنا كىرەتىن 100-دەن اسا دياسپورانىڭ) قازاقىلانعانىنىڭ كورىنىسى، ايقىن دالەلى.
ەندى، اڭگىمەمىزدىڭ اۋانىن اندرەيدىڭ بەتاشارىنان، ءارى قاراي استانا جاققا بۇرايىق.
قازاقشاسىن ۇمىتىپ قالعان تيمۋر سۇلەيمەنوۆ
استاناداعى كەيبىر اق جاعالىلار اندرەي قۇرلى قازاقشا بەتاشار ايتپاق تۇگىلى، قازاق ءتىلىن ۇمىتىپ قالعانىن ۇيالماي ايتىپ ءجۇر. "5 جىل باسقا ەلدە تۇردىم، انا ءتىلىمدى ۇمىتىپ قالدىم" دەپ قاعىنان جەرىگەن تيمۋر سۇلەيمەنوۆتەردى ايتىپ وتىرمىز. سۇلەيمەنوۆتىڭ سۋايتتىعىن تاعى ءسوز ەتەلىك. سول سۇلەيمەنوۆ "6 ايدا قازاق ءتىلىن ۇيرەنىپ الامىن" دەپ انت-سۋ ىشكەن. "سويلەپ" جۇرگەنىن كورىپ ءجۇرمىز عوي.
سۇيكىمى كەتكەن سۇلەيمەنوۆ سياقتىلار ۇكىمەت پەن پارلامەنتتە قۇجىناپ ءجۇر. قايسىبىرىن ءسوز ەتەيىك. بەكەتاەۆ، ساعاديەۆ، سۇلەيمەنوۆ، قاسىموۆ ت.ب. كابميننىڭ تىزىمىندە قازاقشا سويلەيتىندەر بولسا دا، از.
مىنە، جاڭاعى اندرەي سەكىلدى قازاق تىلىنە، ءدىلى مەن سالت-داستۇرىنە قۇرمەتپەن قارايتىنداردىڭ قاس-جاۋى دا وسىلار. اندرەي سەكىلدىلەردىڭ بەتىن قايتارىپ، نيەتىن بۇزاتىندار دا وسىلار.
قازاقستان حالقىنىڭ 83,1 پايىزى قازاق ءتىلىن ەركىن مەڭگەرگەن. بۇل 2017 جىلدىڭ قورىتىندىسى بويىنشا كورسەتكىش. قر مادەنيەت جانە سپورت ءمينيسترى ارىستانبەك مۇحامەديۇلىنىڭ اۋزىنان شىققان بۇلتارتپاس فاكت.
ال 2020 جىلى قازاقستان حالقىنىڭ 95 پايىزى قازاقشا سويلەيتىن بولادى. بۇنى باسقا-باسقا ەمەس، ەلباسىنىڭ ءوزى ايتتى.
ول از دەسەڭىز، مىنە دەرەك. 18 ميلليون قازاقستاندىقتىڭ 71 پايىزىن قازاق ۇلتىنىڭ وكىلدەرى قۇرايدى. بۇعان قوسا، 83 پايىزدان استام اۋديتوريا قازاق ءتىلدى ەكەنىن ەسەپكە الىڭىز. 83 پايىز دەگەن قازاق ءتىلىن ەركىن مەڭگەرگەن، سول تىلدە سويلەيتىن جۇرت. ءسويتىپ، ستاتيستيكا قازاقستاندا ءابسوليۋتتى دومينانت ءتىل – قازاق ءتىلى، باسىم ۇلت – قازاق بولدى دەگەندى انىق ايتىپ تۇر.
ءتۇيىن. وسىنى مويىنداعىسى كەلمەيتىندەر - سۇلەيمەنوۆتەر عانا. قىزىق ءيا. سۇلەيمەنوۆ دەگەندە تيمۋردى مەڭزەپ ەم. ءسىز الجاستى، وي كەشىرىڭىز ولجاستى ويلادىڭىز. دەگەنمەن، ەكەۋى دە سۇلەيمەنوۆ قوي.
اينالايىن، ۇكىمەت! اندرەي دە، مەن دە قازاقشا سويلەيمىز. قازاق سالت-ءداستۇرىن ۇستانامىز. قازاقستانداعى مەملەكەتتى قۇراۋشى ۇلت - قازاق ەكەنىن بىلەمىز. قازاقستاننىڭ بولاشاعى قازاق تىلىندە ەكەنىن جاقسى تۇسىنەمىز. ال سەن شە؟
نۇرگەلدى ابدىعانيۇلى
Abai.kz
