ءسىز قالا سىرتىندا بەيمارال ءجۇرسىز. اعاڭىز حابارلاسىپ، تەز جەتۋدى ءوتىندى. ىرعالىپ-جىرعالىپ جۇرەتىن ۋاقىت از. تىم اسىعىسسىز، كيگەنىڭىز شورتى، اياعىڭىزدا سۇيرەتپە. قول بۇلعاپ، تاكسي توقتاتتىڭىز. بارار باعىتتى ۇعىندىرىپ، باعاسىن كەلىسىپ، شۇعىل اپارۋدى ءوتىندىڭىز. سوسىن، سوسىن ارينە تەلەفونعا شۇقشيدىڭىز. مەجەلى ورىنعا جەتىپ، كولىكتەن ءتۇسىپ قالدىڭىز...
ماسەلە شەشىلگەننەن كەيىن ۇيگە جەتتىڭىز. شايىنىپ، ءوز-وزىڭىزگە كەلگەن سوڭ ءبىر زاتىڭىزدى تاكسيدە قالدىرعانىڭىز ەسكە ءتۇستى... 

وكىندىڭىز، نومىرىنەن بۇرىن مىنگەن تاكسيدىڭ ءتۇسى دە ەسىڭىزدە جوق. تەك ماركاسى مەن سالونىنىڭ جاعىمدى ءيىسى عانا جادىڭىزدا. شوپىردىڭ ءتۇرىن ۆووبششە سۇراماي اق قويىڭىز... نە ىستەيسىز؟ ارينە، الدىمەن اڭعالدىعىڭا وكىنەسىڭ. سوسىن ءوز-ءوزىڭدى اقتاۋ پروتسەسىنە ءوتىپ، شوپىر بايقۇستى ءبىراز جەرگە دەيىن «جەتكىزىپ» سالاسىڭ... سوڭىندا امال جوق «قۋعان جەتپەس، بۇيىرعان كەتپەس» دەپ ماقال ايتىپ قوياسىڭ (ماقالىڭا ساقالىم). 

قۋ دۇنيە اي تۇنىمەن ۇيىقتاي المايسىڭ. قۇلاعىڭنىڭ تۇبىندە جەكە داۋىستا «ءان سالىپ»، جانى جاي تاپقان ىشكى ويىڭ تۇندە «بەك-ۆوكالمەن» قوسىلا ىڭىرسىپ، تاڭعا جۋىق «كۆارتەت» قۇرىپ العان عوي... 

سۇيرەتىلىپ، جۇرتتى جاقتىرماي، جانىڭنان ارى-بەرى وتكەن كولىكتىڭ بارىنە كۇدىكپەن قاراپ جۇمىسىڭا كەلەسىڭ. تيپا كۇلىمدەپ ءجۇرسىڭ. بىراق ءتۇرىڭ اعىپ كەتكەن. ارا-اراسىندا جوعالعان زاتىڭدى ويلاپ قىنجىلىپ قوياسىڭ تاعى... اتاسىنا نالەتى قۋ دۇنيە اي...

تۇسكە تامان كەشە ۇيىنە بارعان اعام حابارلاسىپ: 

– ءامىر، سەن كەشە بىزگە تاكسيمەن كەلدىڭ بە؟ – دەيدى عوي.

– ءيا، دەيسىڭ كۇمىلجىپ...

– سول تاكسيست جىگىت ءبىر زاتتى اكەپ تۇر. بۇل سەنىكى مە؟

– ءيا، ءيا، ءيا دەي بەرەسىڭ عوي قۋانىپ ء(تىل كەتىپ قالعان ۋجە).

– ءيالاي بەرمەي ءجونىن ايت. ءما، مىنا جىگىتپەن ءوزىڭ سويلەس، دەپ ترۋبكانى كەشەگى تاكسيستكە بەرەدى عوي...

– الوۋ، الوۋ، الوۋ...

سەندە ءتىل جوق قوي.

– قانشا بەرەيىن؟

– ەندى ابايلاپ ءجۇر. اقشاڭ كەرەك ەمەس. بۇل مەن ءۇشىن سىناق بولدى. قايتا ساعان راحمەت! ءبىراز شايتانداردى شىعارىپ سالىپ، ناپسىمە ءناپىل ناماز وقىتتىم دەپ كۇلىپ قويادى. 

ءسوزدىڭ قىسقاسى، جاقسى ادامنىڭ اتىن ايتايىن دەسەم، مىنا پاقىر: «ءيا، ءيا، ءيا، قانشا بەرەيىن؟» دەگەننەن باسقا ول اعانىڭ اتىن دا سۇراماپتى. 

سالونىنىڭ ءيىسى دە ءوزى دە جاقسى، جاقسى «اۋدي ا4» مىنگەن جاقسى اعا، ءوزىڭىز ايتپاقشى سىزگە دە اللا رازى بولسىن! ەكى دۇنيەنىڭ جاقسىلىعىن كورىڭىز!

ءامىرحان قاراتايدىڭ Facebook-تەگى پاراقشاسىنان

Abai.kz