كەشە UEFA ۇلتتار ليگاسى اياسىندا قازاقستان قۇراماسى ءوز الاڭىندا گرۋزيا فۋتبولشىلارىن قابىلداپ، 0:2 ەسەبىمەن جەڭىلىپ قالدى.

قۇراما تىزگىنىن ستانيمير ستويلوۆ ۇستاعالى كوماندالىق ويىن تۇزەلگەندەي كورىنگەن. ءۇش جولداستىق كەزدەسۋدە ءساتتى ونەر كورسەتكەن فۋتبولشىلاردان وتاندىق جانكۇيەرلەر ۇلكەن ءۇمىت كۇتكەن ەدى. الايدا، ماقتاۋلى ماماننىڭ ءوزى العاشقى سىناقتان ءسۇرىنىپ وتىر.

جولداستىق كەزدەسۋ مەن رەسمي ويننىڭ ءباسى ءبىر ەمەس ەكەنىن ءبىز كەشە كوردىك. كوكتەمدە جولداستىق ماتچتا ۆەنگريانى جەڭىپ (3:2), بولگاريادان جەڭىلگەن (1:2) قازاقستان قۇراماسى جازدا ءازىربايجان فۋتبولشىلارىن قارسىلاس قۇرلى كورمەگەن ەدى(3:0). الايدا، ءبىزدىڭ قۇراما بولگاريالىق ماماننىڭ جەتەكشىلىگىمەن وتكەن العاشقى رەسمي ويىندا ۆلاديمير ۆايسس باستاعان گرۋزين فۋتبولشىلارىنا قارسى قاۋقار تانىتا المادى. ۇپاي تۇگىلى گول سوعۋدىڭ دا ءساتى تۇسكەن جوق.

نەگىزگى قوس قۇرامانىڭ قۋاتى قارايلاس بولاتىن. ماماندار كەشەگى ويىندا قاي قۇرامانىڭ جەڭىسكە دەگەن جىگەرى باسىم بولسا سول ءۇش ۇپاي ولجالاۋى مۇمكىن دەپ مەجەلەگەن. بۇعان قازاقستان قۇراماسىنىڭ ءوز الاڭىندا ونەر كورسەتىپ جاتقانى قوسىلىپ، تارازىنىڭ ءبىزدىڭ جىگىتتەر جاعى ءسال باسىپ تۇرعاداي كورىنگەن. بىراق، ماتچ ناتيجەسى مۇلدە باسقاشا بولدى. 90 مينۋت بويى قازاقستاندىق فۋتبولشىلاردان جەڭىسكە دەگەن تالپىنىستى بايقاي المادىق. وسىنىڭ الدىنداعى ءۇش جولداستىق كەزدەسۋدە كورسەتكەن تاماشا ويىننىڭ تەڭ جارتىسىن دا ورتاعا سالا المادى.

مىقتى موتيۆاتور سانالاتىن بولگاريالىق مامان ستانيمير ستويلوۆ تا ءبىزدىڭ جىگىتتەردىڭ جىگەرىن جاني المادى. ءبىرىنشى تايمداعى تەڭ ويىننان كەيىن، ۇزىلىستە ستويلوۆ باپكەر شاكىرتتەرىن الاڭعا قايراپ شىعارار دەگەنبىز. بىراق، كەرىسىنشە قوناقتار ەكىنشى تايمدا ۇزدىك ونەر كورسەتتى. كەزىندە "قايرات" كومانداسىن باپتاپ، قازاق فۋتبولىنىڭ قىر-سىرىنا قانىققان سلوۆاكيالىق مامان قازاقستان قۇراماسىن وڭاي ۇتىپ كەتتى.

ۇلتتار ليگاسى. D ليگاسى

قازاقستان - گرۋزيا - 0:2

گول سوققاندار:  0:1 - 69' چاكۆەتادزە، 0:2 - 74' مالىي ء(وز قاقپاسىنا)

قازاقستان: ەريچ، مالىي، پوستنيكوۆ، قۋات (تۇرىسبەك), مۋجيكوۆ، يسلامحان (زەينۋتدينوۆ), جۋكوۆ، ششەتكين، مۋرتازاەۆ (سەيداحمەت) ، شومكو، بەيسەبەكوۆ;

گرۋزيا: لوريا، كاكابادزە، كاشيا، كۆەركۆەليا، كۆەكۆەسكيري، كانكاۆا، كازايشۆيلي، كۆيليتايا، مەرەباشۆيلي، چاكۆەتادزە، ناۆالوۆسكي

قۋانىش قاپپاس

Abai.kz