ايىرقالپاق اعايىندار ات شاپتىرىپ توي جاساپ، دۇنيەجۇزىلىك كوشپەندىلەر ويىنىن ءۇشىنشى مارتە وتكىزگەنى بەلگىلى. اتالعان شاراداعى سپورتتىق جارىستاردىڭ ءبىرى، ءبىرى ەمەس-اۋ، ەل-جۇرت ەلەڭدەپ كۇتكەن ەڭ قىزىعى - كوكپار بولدى. وعان ءبىزدىڭ قازاقستاننىڭ قۇراماسى دا بارىپ قاتىستى. قاتىستى دەگەن ءجاي اتى، وڭباي ۇتىلىپ كەلدى. جارىس قورىتىندىسى بويىنشا جارتىلاي فينالدا ءومىرى كوكپار تارتىپ كورمەگەن وزبەكتەرگە ەسە جىبەردى. ءۇشىنشى ورىن ءۇشىن رەسەيمەن تالاسىپ، ايتەۋىر ابىروي بولعاندا ۇتتى.

قويشى، نەسىن سۇرايسىز، ىرى مەن جىرى كوپ... قازاقستان قۇراماسىنىڭ قىلىعىنا ءبىز تۇگىلى قىرعىز تۋعاندار قاپالاندى. ويتكەنى، الاتاۋدىڭ تەرىسكەيى مەن كۇنگەيىن تەل جايلاعان قازاق پەن قىرعىز عوي. بۇل كوكپاردى قازاق پەن قىرعىز تارتادى، اۋەلدەن. كەيىنگى جىلدارى ەكى ەلدىڭ ۇلتتىق سپورت فەدەراتسيالارى از-كەم داۋلاسىپ، اقىرى ءار تاراپ ءوز ەرەجەلەرىن بەكىتكەن. ءسويتىپ، كوكپار تارتىپ تا ءجۇردى. ەندى مىنە، قىرعىزعا بارعان قازاق جىگىتتەرى جەر شۇقىپ قايتتى.

قىرعىز كوكپارشىسىنىڭ قازاقستان قۇراماسىنىڭ جىگىتتەرىنە قاراتا سويلەگەن ءسوزى الەۋمەتتىك جەلىدە تارادى. "وزبەكتىڭ استىنا جاتىپ بەرگەندەڭە ۇيالمايسىڭدار ما" دەگەندە ءبىزدىڭ كوكپارشىلار، ء"لام-ميم" دەمەدى. قىرعىز كوكپارشىسىنىڭ ساي سۇيەكتى سىرقىراتىپ ايتقانىنا ءبىزدىڭ كوماندانىڭ ءبىر جىگىتى عانا ءۇن قاتتى. ء"بىز قولىمىزدان كەلگەنىن جاسادىق. سىزدەر دۇعا قىلىڭىزدار" دەۋمەن شەكتەلدى.

سودان "Abai.kz" اقپاراتتىق پورتالىندا "وزبەكتەن جەڭىلۋىمىز قىرعىزعا كورسەتكەن قىرىمىز با، بەكبولات قانايۇلى!" اتتى ماقالا جاريا بولدى. كۇنى كەشە عانا. ونى 23 مىڭنان اسا ادام وقىدى.

ءيا، ءبىز بەكبولات تىلەۋحاننىڭ اتىن اتاپ، ءتۇسىن تۇستەپ جازدىق. سەبەبى، بەكبولات قانايۇلى بىزدە قر ۇلتتىق سپورت تۇرلەرى قاۋىمداستىعىن باسقاراتىن ادام. پرەزيدەنت دەگەن دارداي اتى بار. ءبىر بىلسە سول كىسى بىلەر دەدىك. ءبىر اۋىز پىكىرىن ايتار دەدىك. اتتەڭ... بەكبولات قانايۇلى "قىڭق" دەگەن جوق.

ءا، داۋ از-كەم شۋلاپ، ارتى تىنىشتالار دەپ ەدىك. جوق، اۋەلدە تاراعان بەينە جازباداعى قازاق كوكپارشىلارىنا جەكىپ تۇرعان جىگىت قىرعىزستاننىڭ ءىرى تەلە ارنالارىنىڭ ءبىرى "نتس-كە" سۇحبات بەرىپتى.

ەسىم-سويى تالاس بەگاليەۆ ەكەن. ءوزى قىرعىزدىڭ تالاس وبلىسىنداعى "كوك ءبورى" فەدەراتسياسىنىڭ وكىلى ەكەن. قازاقستان مەن وزبەكستان اراسىنداعى كوكپارعا قاتىستى پىكىر ايتىپتى. ءبىز بەگاليەۆتىڭ پىكىرىن قىرعىزشادان قوتارىپ بەرگەندى ءجون كوردىك.

"بۇنىڭ بارلىعى اششى شىندىق. بىلتىر استاناعا قىرعىزستان قۇراماسىن جەتەكتەپ، ءوزىم بارىپ كەلگەنمىن. ول جەردە ولاردىڭ ءار ءتۇرلى وزدەرىنىڭ ويىن ەرەجەلەرىنە ماقۇل بولىپ ويناپ كەلگەنبىز. ەكسپو اياسىندا وتكەن. بۇل بيىلعى رەۆانش دەسەك تە بولادى. بىزگە كەلىپ، "كوك بورىدە" بەتتەسەتىن ۋاقىتتا، ولاردىڭ وزبەكستان كومانداسىمەن ويناعان ويىنىنا كوڭىلىمىز تولعان جوق. ءبىر-بىرىمەنەن ۇرىسىپ ءجۇردى. "ويناماڭدار، گول سالماڭدار" دەپ جۇرگەندەرىن ەستىدىك. بىزدە سول ۆيدەولار دا بار. سوعان اشۋلانىپ، الگى ۆيدەودا ءوز ويىمدى ايتقان ەدىم", - دەيدى بەگاليەۆ.

ءارى قاراي تالاس بەگاليەۆ وزبەكستان قۇراماسىنىڭ كوكپارشىلارىنىڭ قارقىنى جايلى ءوز ويىن بىلاي جالعايدى:

"كوك بورىگە" ارالاسىپ جۇرگەن كىسىلەردىڭ بارلىعى بۇنى جاقسى ءتۇسىنىپ وتىر. فينالدا بەتتەسسەك بولار ەدى. قازاق تۋعاندار بىزبەنەن جاقسى ويىن كورسەتىپ، وسى كوشپەندىلەر ويىنىنىڭ داڭقىن اسىرىپ، ناعىز فينالدىق ويىن كورسەتۋى كەرەك ەدى. بىراق، قانداي دا ءبىر سەبەپتەرمەن، بۇلار قىرعىزستان كومانداسىمەن كەزدەسكىسى كەلگەن جوق تا، وسىنداي شەشىمگە باردى. ءبىزدىڭ وسىعان كوڭىلىمىز تولمادى", - دەيدى تالاس.

اۋەلدە، وسى كوكپار باستالاردا قازاقستان قۇراماسى اتسىز بارىپ، ات جوق دەپ، الاتايداي ءبۇلىنىپ ەدىك. ەندى، مىنە، كىرەرگە تەسىك تاپپاي قالدىق. تالاس بەگەليەۆ بۇل تۋرالى دا ءوز ويىن ايتىپتى.

ء"بىزدىڭ فەدەراتسيا شەشىمىمەن، قازاقستان قۇراماسى جارىسقا كىرگىزىلدى عوي. ول شەشىمگە مەن كىرىسە المايمىن. بىراق، ء"بىز قازاندىقسىز وينايتىن ەدىك" دەپ ءبىر جول كەتىسىپ بارىپ، قايتىپ كەلگەنى شىندىق. بارلىق سەبەپتەرى بەلگىلى. قىرعىزستان قۇراماسىمەن كەزدەسكىسى كەلمەگەنى ايدان انىق بولىپ تۇر. بۇنى سپورت قۇرلى ساناماي، بىرەسە كەتىپ، بىرەسە كەلىپ جۇرگەنى، وسى "كوكبورى" مەن كوكپاردىڭ ەرەجەسىمەن ويناپ جۇرەمىز. نە دەسەك تە، قازاق تۋعاندار بىلتىر ءبىر رەت ۇتىپ الىپ، ەندى قايتا بەتتەسۋدەن قاشىپ وتىر. ءبارىمىزدىڭ ويىمىز وسى. قازاقستان قۇراماسى اتتارىن وسىنداي جەرگە الىپ كەلمەسە، قازاقستاننىڭ نامىسىن قالاي قورعايدى؟ "اتىمىز جوق. بىزگە ات بەرىڭدەر. سەندەردىڭ اتتارىڭمەن شابامىز" دەپ، ودان ءبىزدىڭ اتتارعا كوڭىلى تولاماعانى بۇل وتە تۇسىنىكسىز. كوكپارشى دەگەن جىگىتتىڭ استىندا اتى بولۋى كەرەك. اتى جوق بولسا، نەسىنە "كوك ءبورى" وينايمىن دەپ كەلەدى؟! باسىنان باستاپ، تۋعانداردىڭ كەلىسى بىزگە ۇناعان جوق", - دەدى قىرعىز كوكپارشىسى.

قازاقستان كومانداسى بۇل جارىسقا ۇلتتىق قۇرامانىڭ ەكىنشى قۇرامىن اپارىپتى دەگەن اڭگىمەلەر ايتىلدى.

"شىندىعىندا جاس بالالار كەلدى. ەكىنشى قۇرامى كەلدى. ەكىنشى كوماندانىڭ قۇرامى دا وسال ەمەس. بىلتىر موڭعوليادا ويناعان جىگىتتەر ءجۇر. باسقاسىن ايتپايىن. ءارى بارساق، ساياسات بولىپ كەتەدى", - دەپ تۇيىندەيدى تالاس بەگاليەۆ ءوز ءسوزىن. كورەمىن دەگەن كىسىگە مىنە تۇپنۇسقا بەينە جازبا.

ءتۇيىن. جوعارىدا ايتقانىمىزداي، بەگاليەۆتىڭ قازاقستان قۇراماسى جىگىتتەرىنە جەكىپ تۇرعان ءسوزى الەمجەلىدە جاريا بولعاندا-اق، "Abai.kz" اقپاراتتىق پورتالى ماقالا جازدى. ونى قازىردىڭ وزىندە 23 مىڭنان اسا ادام وقىدى. ءبىز بولعان جايدىڭ ەگجەي-تەگجەيىن ءتۇسىندىرىپ بەرۋدى قر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات قانايۇلىنان سۇراعان ەدىك. بەكبولات تىلەۋحان مىرزا ءبىر اۋىز ءسوز ايتقان جوق.

جوعارىدا قىرعىز كوكپارشىسى، "كوك ءبورى" فەدەراتسياسىنىڭ وكىلى تالاس بەگاليەۆ ەسىمدى ازاماتتىڭ اشىق پىكىرىن جاريالاپ وتىرمىز. قىرعىز اعايىندار نارازى. قازاقستان قۇراماسى قىرعىزستان قۇراماسىمەن كەزدەسپەۋدىڭ امالىن جاسادى دەپ وتىر. كوكپارشى بولسا، كوكپارعا اتسىز كەلە مە دەپ وتىر.

بۇعان بەكبولات قانايۇلى نە دەر ەكەن؟ قر ۇلتتىق سپورت تۇرلەرى قاۋىمداستىعىنىڭ تىزگىنىن ۇستاپ وتىرعان ازامات رەتىندە ءبىر اۋىز ءسوز ايتار دەگەن ءۇمىتىمىز ءالى جوق ەمەس...

ايتپاقشى، ءالى داۋلى جارتىلاي فينالدا قازاقستان قۇراماسى وزبەكستانعا ەسە جىبەردى دەدىك. ەسەپ 4:5 بولعان. كەيىن فينالدا وزبەكتەر مەن قىرعىزدار جولىقتى. قازاق كوكپارشىلارى 5 سالىم سالا الماعان وزبەكتەردىڭ قازاندىعىنا قىرعىزدار 32 سالىم سالدى. قورىتىندى ەسەپ - 32:9. قىرعىزدار چەمپيون اتاندى.

ال ءۇشىنشى ورىن ءۇشىن تالاسقان قازاقستان مەن رەسەي قۇرامالارى بولدى. قورىتىندى ەسەپ 17:1. ەسەپ قازاقستان پايداسىنا شەشىلدى.

نۇرگەلدى ابدىعانيۇلى

Abai.kz