قازاق پەن-كلۋبى الەم جازۋشىلارىن الماتىعا جينادى. الىس-جاقىن 16 ەلدەن كەلگەن "سەن تۇر، مەن اتايىن" جازۋشىلار الەمدەگى زاماناۋي ادەبيەتتىڭ ماسەلەسىن تالقىلاپ جاتىر. تالقىلادى دەگەن اتى! ءبىزدىڭ ءتىل دەپ جىلاعاندا ەتەگى جاسقا تولاتىن شاحانوۆ باستاعان تولاعاي تۇلعالارىمىز قازاق ءتىلىن جەرلەپ، ورىسشا بايانداما جاسادى.

مۇحتار شاحانوۆ قازىر قازاق قوعامىنداعى - ء"نان-تۇلعا"! ونىڭ ءتىل ماسەلەسىندەگى سانسىز باتىرلىعى تۋرالى جۇزدەگەن اڭىز اۋىزدان-اۋىزعا تاراپ، تالايلاردىڭ تاڭدايىن قاقتىرعان. "ۇلت پەن ءتىلدىڭ مايدانىندا بىزبەن بىرگە بولمادى" دەپ قازاق ەلىندەگى بار قالامگەردى كىنالاپ، ورايى كەلسە، "تابان جالاعىش" ەتە سالاتىنى دا بار. راس. جەلتوقسانشىلاردىڭ جايىن مۇقاڭداي كوتەرگەن ازامات جوق. راس، ارال تەڭىزىنىڭ ماسەلەسىن الەمگە ايگىلەگەن وسى كىسى. تەك ماعاۋينمەن قاقتىعىسىپ، ءوزى بىلمەيتىن تاريحقا تۇمسىق تىعىپ، شىڭعىسحانمەن الىسقانى عانا ۇيات بولعان ەدى. ەندى، مىنە، پەن كلۋبتىڭ جيىنىندا ءوزى تۋ ەتكەن قازاق ءتىلىن ءبىر شەتكە ىسىرىپ تاستاپ، بايىرعى قوجاسىنىڭ تىلىندە سارناپ شىعا كەلدى. بۇل نە؟

شاحانوۆتى جالعىز كىنالامايىق. قازاقتىڭ باسىنا قارا بۇلت ءۇيىرىلىپ تۇرعاندا ەلباسىمەن "مۇڭلىق-زارلىقتىڭ" اڭگىمەسىن ايتاتىن كلاسسيك جازۋشىمىز دۋلات يسابەكوۆ تا وسى جيىندا قازاق ءتىلىن جەر ەتىپ، ورىسشاعا جۇيرىك ەكەنىن كورسەتىپ قالدى. راس، بىزدە يسابەكوۆتەي الەم ەلدەرىنىڭ ساحناسىندا پەسالارى قويىلىپ جۇرگەن دراماتۋرگتەر جوققا ءتان. بۇل كىسى ەڭبەكقورلىعىمەن كوپكە ۇلگى بولىپ كەلەدى. بىراق، 27 جىلدىق تاۋەلسىزدىگىمىز قايدا قالدى؟ شيرەك عاسىر تاۋەلسىز ەل بولعانىمىزدى ءبىر-اق كۇندە ۇمىتىپ كەتكەنى قالاي؟ جوق، الدە "اۋىلداعىنىڭ اۋزى ساسىق" دەپ ءجۇر مە؟ اۋىلداعى قازاعىنىڭ اۋزى ساسىق ەكەن دەلىك، ورىستىڭ كەرەمەت بولىپ تۇرعانى شامالى ەكەنىن نەگە اڭعارمايدى. ءبىز سەكىلدى قازاقتىڭ نەنى اڭسايتىنىن باسقا بىلمەسە دە، يسابەكوۆ ءبىلۋى كەرەك ەدى. قازاق تىلىندە جازىپ، الەمگە تانىلعان ادام جوپەلدەمەگە كەلگەندە ورىسشىل بولا قالۋى نەنىڭ بەلگىسى؟

دۋلات اعامىزدى دا جەكە جۇندەمەيىك. پەن كلۋبتىڭ باس ساردارى، ءتىرى كلاسسيگىمىز ءابدىجامىل نۇرپەيىسوۆ ورىسشاعا كەلگەندە ءتىپتى جۇيرىك ەكەن. جاسى جۇزگە جاقىنداعان اقساقالىمىز بايانداماسىن كوزىلدىرىكسىز وقىپ، ىرگەدەگى كورشىسىنە دەگەن ادالدىعىن تاعى تانىتتى. تاۋەلسىزدىك العانىمىزعا وتىز جىلعا جاقىنداعانداعى ءبىزدىڭ ابىز اقساقالىمىزدىڭ سيقى وسى بولسا، جەتىسكەن ەكەنبىز.

قوش! ء"بىز قازاقشا ايتساق، وزگەلەر تۇسىنبەي قالادى" دەگەن باياعى قۇلدىق پسيحولوگيادان اقساقالدارىمىز ءالى ارىلماعان ەكەن. الدىن-الا اۋدارماشى دايىنداپ قويۋعا اقىلدارى جەتپەگەن بە؟ ءبىزدىڭ ناق تاۋەلسىز ەل بولۋعا بەت العانىمىزدى كورسەتەتىن وسى اقساقالدار ەمەس پە؟ ولاردى نە تۇلەن ءتۇرتتى؟ شاحانوۆ كەيدە ەلباسىنى سىنايتىنى بار. بۇۇ-نىڭ مىنبەرىندە قازاقشا سويلەگەن ەلباسىنىڭ ەرلىگى ناعىز باتىرلىق ەكەن عوي. ءوز الماتىسىندا تۇرىپ، ءبىزدىڭ ءۇش ارىسىمىزدىڭ مىنا الجاسۋىن ۇرپاق كەشىرە الار ما ەكەن؟ ءاي، قايدام!

ءشارىپحان قايسار

Abai.kz