ىشكى ىستەر ءمينيسترى قالمۇحانبەت قاسىموۆ ورتالىق كوممۋنيكاتسيالار قىزمەتىندە وتكەن «قۇقىقتىق ءتارتىپ جانە قاۋىپسىزدىكتى نىعايتۋ» تاقىرىبىنداعى ءباسپاسوز ءماسليحاتىنا قاتىستى.

جينالىستا ءسوز العان مينيستر ءوزىنىڭ قازىرگى قىزمەتىندە قالۋ-قالماۋىن پرەزيدەنت شەشەتىنىن ايتتى. مانەرلەپ سىرعاناۋشى دەنيس تەن قازاسىنان كەيىن قوعام قۇقىق قورعاۋ ورگاندارىنىڭ قىزمەتىن سىنعا الىپ، قالمۇحانبەت قاسىموۆ باستاعان باسشىلاردىڭ وتستاۆكاعا كەتۋىن تالاپ ەتكەن ەدى.

— ءبىز اسكەري ادامبىز، پرەزيدەنت قالاي شەشەدى، سوعان باعىنامىز. بۇيرىق بەرىلگەن جەردە ىستەيمىز",- دەپ قىسقا قايىردى مينيستر جۋرناليستەردىڭ وتستاۆكا تۋرالى سۇراعىنا.

سونىمەن قاتار قاسىموۆ ءوزى باسقارىپ وتىرعان مينيسترلىك پەن پوليتسەيلەر تاراپىنا ايتىلىپ جاتقان قاتاڭ سىندارمەن كەلىسەتىنىن ايتتى.

— وكىنىشكە قاراي، سوڭعى ۋاقىتتا ءىىد، سونداي-اق پوليتسيا قاتاڭ سىنعا قالىپ وتىر. كوپ جاعدايدا سىن ورىندى ايتىلادى. راسىندا، پوليتسيا قىزمەتىندە شەشىلمەگەن ماسەلەلەر كوپ. مينيسترلىك باق-تاعى سىني ماتەريالدارعا مونيتورينگ جاساپ وتىرادى. ءاربىر اقپارات بويىنشا ءتارتىپ پەن زاڭنىڭ ورەسكەل بۇزىلعانى انىقتالعان جاعدايدا جۇمىستان شىعارۋعا دەيىنگى قاتاڭ شارالار قولدانىلادى. اعىمداعى جىلى جاعىمسىز سەبەپتەرمەن ءىىو-دان 600 قىزمەتكەر جۇمىستان شىعارىلدى، - دەدى قاسىموۆ.

ءمينيستردىڭ ايتۋىنشا، سوڭعى جىلدارى ءىىم جۇيەسى قوعام الدىندا جاريا جۇمىس ىستەي باستاعان.

— ينتەرنەتتە ءىىم رەسمي سايتى بار. ىشكى ىستەر ءمينيسترىنىڭ بلوگى جۇمىس ىستەيدى، سونداي-اق ازاماتتار قىزمەتكەرلەردىڭ ارەكەتىنە قاتىستى ارىزدانىپ، ءىىو بولىمشەلەرىنىڭ قىزمەتىن جەتىلدىرۋ بويىنشا ۇسىنىس ەنگىزۋگە ارنالعان ءىىم بىرىڭعاي سەنىم تەلەفونى ىسكە قوسىلدى. ءىىو قىزمەتىندەگى ماسەلەلەر بويىنشا ۇكىمەتتىك ەمەس ۇيىمدارمەن، ءىىد جانىنداعى كونسۋلتاتيۆتى-كەڭەسشى ورگاندارىمەن بايلانىسا قوعامدىق كەڭەس جۇمىس ىستەيدى. كەڭەس حالىقپەن ءجيى ەسەپ بەرۋ جيىندارىن وتكىزەدى. مينيستر، تەرريتوريالدى ورگان باسشىلارى مەن ۋچاسكەلىك پوليتسيا ينسپەكتورلارى، بۇدان بولەك مينيسترلىك جىلىنا ەكى رەت پارلامەنت ماجىلىسىندەگى ۇكىمەت ساعاتىندا مينيسترلىك قىزمەتىنىڭ جەكە باعىتتارى بويىنشا جۇمىستاردىڭ ناتيجەلەرى تۋرالى ەسەپ بەرەدى. مينيسترلىك باسشىلىعى، ايماقتىق دەپارتامەنت باسشىلارى ازاماتتاردىڭ جەكە ماسەلەلەرى بويىنشا تۇراقتى تۇردە قابىلداۋلار جۇرگىزەدى، - دەدى مينيستر.

بىراق، اتتان تۇسسە دە ۇزەڭگىدەن تۇسكىسى كەلمەگەن مينيستر سونشا كوپ سىنعا قالعانىنا قاراماستان وزدەرىنىڭ جەتىستىكتەرى جايلى ايتۋدى دا ۇمىتقان جوق. ءمينيستردىڭ ايتۋىنشا، وتكەن جىلدارمەن سالىستىرعاندا ەلدەگى قىلمىس سانى كوبەيمەگەن. كەرىسىنشە، اۋىر جانە اسا اۋىر قىلمىس سانى 17 پايىزعا، ورتا دارەجەلى قىلمىس 10 پايىزعا تومەندەگەن. ءتىپتى قوعامدىق ورىنداردا بولاتىن قاراقشىلىق، ۇرلىق فاكتىلەرى مەن بۇرىن سوتتى بولعان ازاماتتار قىلمىسى دا ەداۋىر ازايىپتى.

— قازىر بۇرىنعىسىنشا كوپ ورىن الاتىن قىلمىس ءتۇرى - ۇرلىق بولىپ وتىر. بارلىق قىلمىستىق ارەكەتتەردىڭ شامامەن 70 پايىزى سونىمەن بايلانىستى. ماسەلەن الماتىدا 74 پايىز، الماتى مەن اقتوبە وبلىستارىندا 72 پايىز، - دەدى قاسىموۆ.

ءمينيستردىڭ ايتۋىنشا، ەلدەگى قۇقىق بۇزۋشىلىققا تەرىس اسەر ەتىپ جاتقان كريمينوگەندىك فاكتورلار - ناشاقورلىق، الكوگولگە قۇمارلىق، جۇمىسسىزدىق، وقۋ وقىماۋ جانە وتباسىنداعى كەلەڭسىز جاعدايلار ەكەن.

ءمينيستردىڭ بۇل سوزدەرىنەن قۇقىق قورعاۋشىلاردىڭ قىزمەتىنە وڭ باعا بەرىپ وتىرعانىن اڭعارۋ قيىن ەمەس. بارشا اقپارات قۇرالدارىندا ەلدە قىلمىستىڭ كوبەيگەنى جايلى ايتىلىپ، جازىلىپ جاتسا دا جاۋاپتى قىزمەتكەرلەر «جاعدايمىز جاقسى» دەگەن جاتتاندى ۋاجدەرىنەن تانار ەمەس. ەگەر مينيستر ايتقانداي قىلمىس جىلدان-جىلعا ازايىپ بارا جاتسا، بۇكىل ەل بولىپ ونىڭ وتستاۆكاعا كەتۋىن تالاپ ەتپەس ەدى عوي.

Abai.kz