باتىس قازاقستان وبلىسىنىڭ جاڭاقالا اۋدانىندا سالىنعان جاڭا الاڭ ءدال قازىر پايدالانۋعا بەرىلۋگە دايىن تۇر. بىراق، اۋدان اكىمدىگى دايىن الاڭدى ەل يگىلىگىنە بەرۋگە اسىعار ەمەس. اۋىل جاستارى وسى الاڭدى جاز بويى كۇتكەنى بەلگىلى. قازىر ءتىپتى، شىدامدارى تاۋسىلىپ بارادى.

الاڭنىڭ اشىلماي تۇرۋىنىڭ سەبەبى، اۋدان باسشىلارى بۇل الاڭعا ەندى باسكەتبول قۇرىلعىلارىن دا قويعىسى كەلەدى ەكەن. سپورتتان حابارى جوق باسشىلار بولعاسىن سويتەدى دە...

استىنا جاسىل گازون توسەلگەن باسكەتبول الاڭىن ولار قايدان كوردى ەكەن؟ ءبىزدىڭ باسشىلاردان ءبارىن دە كۇتۋگە بولادى. بۇل فۋتبول الاڭىنا ەندى باسكەتبولدان بولەك ۆولەيبول، گاندبول، قىستا حوككەي الاڭىن جاساپ، "5 ۆ ودنوم" سپورت الاڭىن جاساپ تاستاسا دا تاڭ قالماسپىز.

قۇرمەتتى اۋدان باسشىلارى، جوباسى فۋتبول الاڭى دەپ باستالعان الاڭدى، مىڭ قۇبىلتپاي تەزىرەك اشساڭىزدار ءجون بولار ەدى. جاز ءبىتىپ، كۇز باستالدى. الدا قىس كەلە جاتىر. ەڭ بولماسا جاستار ءبىر اي بولسا دا، الاڭنىڭ يگىلىگىن كورسىن.

اۋدان باسشىلارى باسكەتبول ويناعىلارىڭ كەلسە، اۋدان ورتالىعىندا ۇلكەن ستاديون بار ەكەنىن ەستەرىنە سالعىمىز كەلەدى. وزدەرى وسى الاڭدى ارى-بەرى كوشىرىپ، بىت-شىتىن شىعارعانىن دا قاپەرلەرىنە سالعىمىز كەلەدى.

ول از دەسەڭىز وبلىستان باسشىلار كەلىپ، لەنتاسىن قيماي بۇل الاڭىمىز اشىلمايتىن سياقتى. سوندا بۇل الاڭ جوعارىداعى باسشىلار ءۇشىن سالىندى ما، جوق الدە اۋىل حالقى ءۇشىن بە؟

ايبولات بوكەنوۆ، جاڭاقالا اۋدانى

Abai.kz