بۇل جايىندا قازاقستاننىڭ قىرعىزستانداعى ەلشىسى كارىم كوكىرەكباەۆ 19 قىركۇيەكتە قىرعىز سىرتقى ىستەر ءمينيسترى ەرلان ابدىلداەۆپەن كەزدەسكەن كەزدە ايتقان. ول سونىمەن بىرگە قىرعىزستانعا قازاقستان نوتاسىن بەرگەن. بىراق ءماتىن مازمۇنى ازىرگە جاريالانبادى.
4 قىركۇيەكتە قازاق ەلشىسى قىرعىزستاننىڭ سىرتقى ىستەر مينيسترلىگىنە شاقىرىلىپ، الماتى اۋەجايىندا قىرعىز ازاماتتارى جۇيەلى تۇردە قاتاڭ تەكسەرىلەتىنى ايتىلىپ، نارازىلىق نوتاسى جولدانعان.
«كەزدەسۋ بارىسىندا قىرعىز تارابى قازاقستاننىڭ قۇزىرلى ورگاندارىنىڭ ءىس-ارەكەتىنە الاڭداۋشىلىق بىلدىرەتىنىن قايتارا جەتكىزدى. قازاقستان ەلشىسىنە ءتيىستى نوتا بەرىلدى»، - دەگەن بولاتىن قىرعىزستاننىڭ سىرتقى ىستەر مينيسترلىگىنىڭ وكىلى.
ءدال وسىنداي نارازىلىق نوتاسىن قىرعىزستان تارابى بيىل مامىر ايىندا دا جولداعان. سول كەزدە قازاقستان قىرعىز ازاماتتارىنىڭ اراسىنان حالىقارالىق تەرروريستىك ۇيىمعا قاتىسى بار ادامدار انىقتالدى دەپ جاۋاپ بەرگەن.
قىرعىز ازاماتتارى بيلىك وكىلدەرىنە قازاقستاننىڭ ارنايى قىزمەتى ءارتۇرلى سەبەپتەرمەن اۋەجايدا قاتاڭ تەكسەرىپ، ءموبيلدى قۇرىلعىلاردىڭ IMEI-كودتارىن جازىپ الادى دەپ شاعىمدانعان.
Abai.kz
