بۇگىن قازاقستان پرەزيدەنتى نۇرسۇلتان نازارباەۆ كادرلىق وزگەرىستەر جاسادى. بۇل تۋرالى اقوردانىڭ ءباسپاسوز قىزمەتى حابارلادى.

عابيت جاقىپبايۇلى بايجانوۆ قر پرەزيدەنتىنىڭ كومەكشىسى — قاۋىپسىزدىك كەڭەسىنىڭ حاتشىسى بولىپ تاعايىندالدى، ول بۇعان دەيىن قر «سىربار» سىرتقى بارلاۋ قىزمەتىنىڭ ديرەكتورى قىزمەتىن اتقارعان.

مەملەكەت باسشىسىنىڭ جارلىعىمەن مارات ەرسايىنۇلى شايحۋتدينوۆ قر پرەزيدەنتىنىڭ كومەكشىسى — قاۋىپسىزدىك كەڭەسىنىڭ حاتشىسى مىندەتىن ۋاقىتشا اتقارۋدان بوساتىلدى.

قر پرەزيدەنتىنىڭ جارلىعىمەن قر «سىربار» سىرتقى بارلاۋ قىزمەتى ديرەكتورىنىڭ ءبىرىنشى ورىنباسارى يساتاي باقتيارۇلى سارتاەۆقا قر «سىربار» سىرتقى بارلاۋ قىزمەتى ديرەكتورى مىندەتىن ۋاقىتشا اتقارۋ جۇكتەلدى.

سونداي-اق، كۇزەمبەك ستانبايۇلى ادەنوۆتىڭ باسقا جۇمىسقا اۋىسۋىنا بايلانىستى جانات قۋاندىقۇلى شايمەردەنوۆ قر «سىربار» سىرتقى بارلاۋ قىزمەتى ديرەكتورىنىڭ ورىنباسارى لاۋازىمىنا تاعايىندالدى.

Abai.kz