"Alvares Sanches" – بۇل "youtube" جەلىسىنە 2018 جىلدىڭ 1-ماۋسىمىندا تىركەلگەن ارنا ەكەن. وسىدان ءبىراز ۋاقىت بۇرىن “قازاقستان رەسەيدىڭ قۇرامىنا كىرىپ، ءبىر گۋبەرنياسى بولۋى كەرەك” دەپ ۇگىت جاساعان ەرمەك تايشىبەكوۆتىڭ كانالى كورىنەدى. ءبىزدىڭ بۇلاي توپشىلاۋىمىزعا اتالعان "youtube" ارناسىنداعى بەينە جازبالاردىڭ بىرىندە ءبىر قىزعا سۇراق قويىپ وتىرىپ، بەينە جازبانى ءتۇسىرۋشى ادام ءوزىن ەرمەكپىن دەپ تانىستىرادى. سونداي-اق، اتالعان ارنادا ەرمەك تايشىبەكوۆتىڭ كوپتەگەن بەينە جازبالارى جاريالانىپتى.

ازىرگە 469 جازىلۋشىسى بار ەكەن. قازاقشا ەجىكتەپ سويلەپ وتىرعان ەرمەك  بۇل جولى ءوز “يدەياسىن”، پرو-رەسەيلىك پوزيتسياسىن ساناسى ەندى قالىپتاسا باستاعان جاسوسپىرىمدەرگە ناسيحاتتاۋدى ءجون كورىپتى.

ماسەلەن، جامبىل وبلىسى، بايزاق اۋدانىندا تۇسىرىلگەن ءبىر ۆيدەوسىندا، كۇرەسكە قاتىساتىن 15-16 جاستاعى بالالارمەن تانىسىپ، سۇراق قويىپ وتىر. سۇراقتارىنىڭ سۇرقى مىناداي: ءسىز قازاقسىز با؟ ءسىز قاي مەملەكەتتە تۇراسىز؟ قازاقستان، رەسەي، ۋكراينا، بەلورۋسپەن قوسىلىپ ءبىر مەملەكەت بولادى؟ سەن وعان قالاي قارايسىڭ؟

بۇعان، ەشتەڭەنىڭ پارقىنا بارا قويمايتىن الگى جاسوسپىرىمدەر:  كەلىسەمىن. ءبارى قوسىلىپ، ۇلكەن مەملەكەت بولسا جاقسى عوي. ءبىز بىرىكسەك ءبىزدى ەشكىم الا المايدى. اقش تى قيراتىپ تاستايمىز، - دەگەن سياقتى جاۋاپتار بەرىپ وتىر. وعان ريزا بولعان تايشىبەكوۆ، -كوپتەگەن دوستارىڭىز دا سىزدەر سياقتى ويلاي ما؟ ولاردا سىزدەرگە قوسىلادى عوي,  دەپ الگى بالاقايلاردىڭ ودان ءارى باسىن قاتىرادى.

ءوزىنىڭ ارناسىندا وسىنداي ماعىناداعى 110 ۆيدەو جۇكتەلگەن ەكەن. بارلىعى دەرلىك وسى اۋانداعى سۇراقتار مەن جاۋاپتار.

سونىمەن، ءوز ەلىن “ولتىرۋگە” ولەرمەندىكپەن اتسالىسىپ جۇرگەن تايشىبەكوۆ پە، بۇل؟ ويتكەنى، رەسەي يمپەرياسىنىڭ كۇلىمسى ساسىعان قولتىعىنا كىرۋدە ءولىپ-ءوشىپ قالايتىن جالعىز ادام بولسا، ءبىز بىلەتىن تايشىبەكوۆ قانا.

ەرمەكتىڭ بيوگرافياسىنا كوز جۇگىرتسەك، ەندى...

ول 1978 جىلى جامبىل وبلىسى، قورداي اۋدانىندا دۇنيەگە كەلگەن. ايتۋىنشا، اتەيست، تەحنوكرات. ءوزىن «ساياسات، گەوساياسات، ەكونوميكا، قارجى سالاسىنداعى ساراپشى» دەپ اتايدى.

2015 جىلدىڭ 30 ماۋسىمىندا وعان قارسى قازاقستان رەسپۋبليكاسى قىلمىستىق كودەكسىنىڭ 174-بابىنىڭ 1-تارماعى «الەۋمەتتىك، ۇلتتىق، ۋربانيستىك جانە ءدىني قاقتىعىستاردى قوزدىرۋ» بابى بويىنشا قىلمىستىق ءىس قوزعالعان. وسى ساتتەن باستاپ، ول ءوزىن ساياسي تۇتقىن دەپ سانايدى.

كەيىن سوت-مەديتسينالىق ساراپتاما جۇرگىزىلەدى. ساراپتاما ناتيجەسى بويىنشا، ونىڭ ميىندا اقاۋ بارى انىقتالعان. ءسويتىپ، ول الماتى قالاسىنداعى پسيحياتريا، پسيحوتەراپيا جانە تاۋەلدىلىكتىڭ عىلىمي-تاجىريبەلىك ورتالىعىنا ءبىر اي ەمدەلۋگە جىبەرىلەدى.

2015 جىلدىڭ 19 قىركۇيەگىندە ول قاشىپ جۇرگەن جەرىنەن جامبىل وبلىسىنداعى ۇقك عيماراتىندا ۇستالادى.

سول جىلى ەرمەك تايشىبەكوۆ ءتورت جىلعا باس بوستاندىعىنان ايىرىلعان. 2017 جىلدىڭ 12 شىلدەسىندە تايشىبەكوۆ راقىمشىلىققا ءىلىنىپ، ونىڭ مەرزىمى سەگىز ايعا قىسقارتىلادى.

ءسويتىپ ول، 2017 جىلدىڭ 20 قىركۇيەگىندە شارتتى تۇردە مەرزىمىنەن بۇرىن بوساتىلعان.

بوستاندىققا شىققان سوڭ دا بوسقا جۇرمەي، الگى يدەياسىن جالعاستىرىپ كەلەدى ەكەن. سۇحباتتارىن قاراساڭىز سويلەۋى، ءوزىن ۇستاۋى ءبىزدى وسىنداي ويعا جەتەلەدى. ساياساتكەر نەمەسە ساياسي قۋعىن ءرولىن ويناپ جۇرگەن اكتەرلەر از ەمەس بىزدە. بىراق، كىمنىڭ اكتەرى بولسا دا، تايشىبەكوۆتىڭ يدەيالارىن قازاقستاندا قاتاڭ تۇردە شەكتەۋ كەرەك. سوندىقتان، ۇقك، قر پروكۋراتۋراسى تايشىبەكوۆكە قاتىستى بۇل مالىمەتتە تەكسەرۋدى قۇزىرلى ورگاننىڭ قۇزىرەتىنە قالدىرامىز.

قازىر قازاق قوعامى قايتسەك ۇلتتىق مەملەكەتكە اينالامىز دەپ جانتالاسىپ جاتقاندا، ىشتەن شىققان وسىنداي مىسىقتىلەۋ جانداردىڭ كەرى تارتاتىنى وكىنىشتى.  ايتپەسە، ولار رەسەيدىڭ ەكونوميكاسى كۇن ساناپ قۇلدىراپ، ءوز بىلىعىنا ءوزى باتىپ بارا جاتقانىن بىلمەي وتىرعان جوق. سونى كورە تۇرا، مەملەكەتتى ودان ءارى قۇردىمعا قۇلاتقىسى كەلەدى.

وسىنداي نيەتتىلەردىڭ ءبىرازى بيىلعى 9-مامىر كۇنىن الماتىدا قالاي تويلاعانى ەستەرىڭىزدە بولار. سسسر-دىڭ قىزىل تۋىن الىپ، الماتىنىڭ ورتالىق كوشەلەرىمەن ءجۇرىپ وتكەندە، كەڭەستىك كەزەڭنىڭ جوقتاۋشىلارى  ءالى دە بار ەكەنىن بىلدىك. ايتپاقشى، "Alvares Sanches" ارناسىندا دا وسى كۇندى سىلتاۋ قىلىپ، گەورگي لەنتاسىن تاعىپ تۇرعان قارت كىسىنىڭ، “قازاقستان رەسەيگە قايتسە دە قوسىلۋى كەرەك” دەگەن سۇحباتى بار.

قۇزىرلى ورگان الگى "youtube"  ارناسىن بۇعاتتاۋى كەرەك. ال، ونىڭ قۇرىعىنا الگىندەي جاستار مەن جاسوسپىرىمدەردىڭ ىلىگىپ قالماۋى ءۇشىن، رەسەي اقپارات قۇرالدارىنىڭ ىقپالىن ازايتۋ قاجەت. سەبەبى، ءوزى دە قۇردىمعا كەتىپ بارا جاتقان ەلدىڭ ەتەگىنەن ۇستاپ، اقپاراتىمەن “تىنىستاۋ” – كەلەشەگىمىز ءۇشىن قاۋىپتى...

نۇربيكە بەكسۇلتانقىزى

Abai.kz