سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. بۇل مەملەكەتتە مەنىڭ ورنىم جوق. ادەتتە، مەنىمەن سويلەيتىندەر ساۋاتسىز، ءبىلىمى جوقتار. مەنى قولداناتىنداردىڭ كوبىسى كەدەي. مەنى قولداناتىندار جارىققا ۇمتىلمايدى. الەمگە اشىق كوز، انىق ويمەن قارامايدى.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. بۇل قوعامداعى مەنىڭ ورنىم تەك قانا  قاتىن-قالاش پەن القاشتىڭ اڭگىمەسىن ايتۋدان اسپايدى. مەن ارقىلى ەشقانداي ماڭىزدى اقپارات تارامايدى. بار بولعانى ولەكسە ساسىعان ارنالار مەن وسەك-اياڭ سارناعان گازەتتەر مەن سايتتاردا عانا جۇرەمىن. مەن جاي عانا تابيعاتتىڭ كەزدەيسوقتىعىنان كەيبىر قازاق بولىپ تۋعانداردىڭ اۋزىنان عانا شىعامىن.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. وسى ۋاقىتقا دەيىن مەن ارقىلى الەمگە ماڭىزدى جاڭالىق اشىلعان جوق. مەن عىلىمنىڭ ءتىلى بولا المايمىن. مەنىڭ بار قولدانىلاتىن جەرىم - مەكتەپتىڭ اياسى عانا. ودان شىققان سوڭ، مەنىڭ ەشكىمگە قاجەتىم جوق. ونەركاسىپ پەن تەحنولوگيانىڭ ءتىلى بولۋعا مەنىڭ دارگەيىم دە دەڭگەيىم جەتپەيدى.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەنى جۇرت تەك قانا قىلمىس ياكي ايىپ جاساعان كەزدە كەلىسۋ ءۇشىن عانا قولدانادى. مەندە ەشقانداي قاسيەت جوق. مەن تەك قانا السىزگە جەكيمىن. شەشىنگەن قىزدارىما سەس كورسەتەمىن. وزگەشە يگىلىك ويلاعانداردى قارعاپ سىلەيمىن. ارى كەتسە، ءولىم تىلەيمىن. سوندىقتان مەنىڭ بولمىسىمنان ءبارى دە جەرىنىپ كەتكەن.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەن جانجالدىڭ ءتىلىمىن. قانشاما كوشە بۇزاقىلارى، ادىلەتسىز پوليتسەيلەر، قابىلەتسىز ماماندار مەن باقىتسىز وتباسىداعى ادامداردىڭ ءبىرىن-ءبىرى ايىپتاپ سوڭىندا بەتكورىسپەس قيانعا جەتكىزەتىن ءتىلمىن.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەن ەڭ كەدەي ءتىلمىن. مەنىمەن جاعدايى جاقسى قازاقتار سويلەمەيدى. مەنىمەن تەك قانا تاعدىرىن تالكەك قىلعان، ءۇمىت جوعالتىپ رۋحى سىنعان كەدەيلەر سويلەيدى. سايكەسىنشە، مەن ارقىلى سويلەگەندەردىڭ ەشقانداي مىنبەرگە داۋسى جەتپەيدى.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. بالكىم، تاريحتا مەن مىقتى بولعان شىعارمىن. بىراق، مەن قازىر ءولدىم. مەن تەك قانا ارزانقول ۇرى انشىلەر، قايعى اقىندار مەن قايىرشى بالالاردىڭ تىلىنە اينالدىم بۇگىن. مەندە ەشقانداي ۇلىلىق جوق.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەن ادامزاتقا يگىلىك اكەلگەن بىردە ءبىر عالىم مەن تەحنوكراتتىڭ اۋزىنان شىقپاعانمىن. مەن تەك قانا ءوزىن جوعالتقان ۇرپاقتىڭ اۋزىندا عانا ءجۇرمىن. مەنىڭ دارەجەمنىڭ تومەندىگى سونشالىق، جەتىستىككە جەتكەن مەنىڭ ۇلانىم ۇلكەن ورتالاردا سويلەيتىن بولسا، اينالاسىنىڭ ءبارى دە ونى "مامبەت", "مال ساسىعان كولحوزنيك" دەگەن كوزقاراسپەن قاراي باستايدى. مەنى بىلەتىن ادامداردى وسىلايشا ۇنەمى ۇياتقا قالدىراتىن ديۋانا ءتىلمىن مەن. قىمبات رەستورانعا قايىرشى بىرەۋ كىرىپ كەتسە، ونى قۋىپ شىعارىپ جىبەرەتىنى سياقتى، زيالى ورىندارعا كىرۋگە مەنىڭ قۇقىعىم جوق.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەنىڭ جاي عانا "مەملەكەتتىك" دەگەن ستاتۋسىمنان باسقا ەشتەڭەم دە جوق. بيلىكتە قازاقتىڭ تاعدىرى مەنىمەن شەشىلمەيدى. مەن ارقىلى ماڭىزدى ەشتەڭە جازىلمايدى. مەكەمەلەردە ماعان جاي عانا "دليا گالوچكي" اۋدارىلادى. مەنىڭ بارىمنان كورە جوعىم الدەقايدا ءتيىمدى ولار ءۇشىن.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەن ويسىز ۇلاندارىما سىرتتان كەلگەن اعىمداردى بويلارىنا سىڭىرۋگە اتسالىساتىن ءبىرىنشى فاكتورمىن. ءيا، مەن ولاردى ءوز ۇلتى مەن سالتىنان، وزىمنەن جەرىندىرۋ ءۇشىن پايدالانىلاتىن ءتىلمىن. مەن بۇل قوعامدى ەركىن ويدان شەكتەپ، ءبارىن توزاقپەن قورقىتىپ، ادامداردى ۇرەيدە ۇستاپ، دامۋعا جول بەرمەيتىن ءدىننىڭ جاي عانا قۇرالىمىن. مەنىمەن ءتىپتى دۇعا دا جاسالىنبايدى. ول ءۇشىن ءدىننىڭ بەكىتكەن ءتىلى بار. مەن ول دەڭگەيگە لايىق ەمەسپىن.

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. جوعارىدا ايتقانىمداي مەندە ۇلىلىق قالماعان. ەجەلدە مەن ارقىلى ۇلى عۇنداردىڭ پاتشالارى مەن جاۋىنگەرلەرى، كوكتۇرىكتەردىڭ ۇلى قاعاندارى مەن بىلگەلەرى، قازاق ەلىنىڭ ۇلى حاندارى مەن بيلەرى، الاشتىڭ كوسەمدەرى مەن اعارتۋشىلارى سويلەگەن ەدى. الەمگە ءامىرىمدى جۇرگىزگەن ءتىل ەدىم. بىراق، ءدال قازىر مەن كوشە تورىعان ۇلدار مەن قارا جۇمىسقا جەگىلگەن قۇلداردىڭ ءتىلىمىن. بالكىم، وعلانىم ۇلىقتىعىن ۇمىت قىلماي، يگىلىككە ۇمتىلعاندا ءحالىم باسقاشا بولار ما ەدى، كىم ءبىلسىن..؟

سالەم. مەن - قازاق ءتىلىمىن. مەن ءالسىز ءارى بەيشارا ءتىلمىن. مەن باۋىرى ناقاق ايىپتالىپ، اينالاسىنان ادىلەت پەن مەدەت سۇراپ جان ۇشىرىپ، كوزدەرى جاسقا تولعان بايعۇس انانىڭ ءتىلىمىن. بىراق، ەشكىم مەنى ەستىمەيدى. ويتكەنى، مەنىڭ ءۇنىم تاۋسىلعان...

مەنىمەن سويلەمەۋگە دە بولادى. مەنىمەن سويلەپ، ابىروي مەن ار تابام دەپ ءۇمىت قىلما. قيناما مەنى! ۇنسىزدىكتە جانىم شىعىپ، تاركى-دۇنيە بولۋىما مۇمكىندىك بەر، ۇلانىم... ەسكە العىڭ كەلسە، وقىلمايتىن ەسكى كىتاپتاردان ىزدەپ كورەرسىڭ... مولام سوندا بولار بولسا.

سادىق شەرىمبەكتىڭ facebook پاراقشاسىنان

Abai.kz