28 قىركۇيەكتە زىريان اۋدانىنىڭ اتىن التاي دەپ اتاۋ تۋرالى ۇسىنىستاردى تالقىلاۋ ءۇشىن «گورنياك» مادەنيەت ۇيىندە قوعامدىق تىڭداۋ وتەدى. شىعىس قازاقستان وبلىسىنىڭ اكىمى دانيال احمەتوۆتىڭ وڭ شەشىم قابىلداۋى ءۇشىن بۇكىل قازاق ەلى  وز قولداۋىن بىلدىرسە دەگەن ءوتىنىشىمىز بار. 

وتكەن جولى ايماق باس­شى­سىنىڭ اۋداندىق ءماسليحات دەپۋ­تاتتارىمەن، جەرگىلىكتى قاۋىم­داستىق وكىلدەرىمەن كەزدەسۋىندە اۋدان اتىن وزگەرتۋ ماسەلەسى ءسوز بولدى. "ەگەمەن قازاقستان" گازەتىنىڭ جازۋىنا قاراعاندا اۋداندىق ءماسليحات دەپۋتاتى لاريسا گرەچۋشنيكوۆا 27 تامىزدا زىريان اۋدانىنىڭ اكى­مى نۇرجان توقسەيىتوۆكە جەر­گىلىكتى قاۋىمداستىق وكىلدەرى اۋداندى دامىتۋ جانە قالا مەن اۋدان اتىن وزگەرتۋ جونىندە ۇسىنىس جىبەرگەن.

«بۇل ۇسىنىستى دەپۋتاتتار كورپۋسى قولداپ وتىر. قازىر كەزدەسۋلەر ۇيىمداستىرىلىپ، قوعامدىق پىكىرلەر زەرتتەلۋدە، 28 قىركۇيەكتە «گورنياك» مادەنيەت ۇيىندە قوعامدىق تىڭداۋ وتەدى»، – دەيدى ول.

دەپۋتاتتار جاڭا اتاۋ اۋ­داننىڭ جاڭا برەندىن قالىپ­تاس­تىرىپ، ينۆەستيتسيا تارتۋعا، ەكونوميكانى دامىتۋعا تىڭ سەرپىن بەرەتىنىنە سەنىمدى. «بورودينو» شارۋا قوجالىعىنىڭ باسشىسى قايرات بوكەجانوۆ زىريان اۋ­دانىنىڭ تابيعاتى تاماشا بول­عانىمەن، ازىرگە ءتۋريزمدى وركەن­دەتۋگە تولىق جاعداي جاسالماي وتىرعانىن، جاڭا اتاۋ وسى سالانىڭ اياعىنان قاز تۇرۋىنا سەپتەسەتىنىن اتاپ ءوتتى.

«جاستار دا بۇل يدەيانى قۇپتاپ وتىر. ءبىز التاي قالاسىندا، التاي اۋدانىندا تۇرعىمىز كەلەدى»، دەيدى اۋداندىق جاستار رەسۋرستىق ور­تالىعىنىڭ جەتەكشىسى ماينا لي­سوۆتسوۆا.

وبلىس اكىمى دانيال احمەتوۆ كەزدەسۋدە اۋداندىق دەپۋتاتتار مەن جاستاردىڭ تاراپىنان ايتىلعان ۇسىنىستى قولدايتىنىن جەتكىزگەن.

«زىرياندى التاي دەپ اتاۋ بارلىق جاعىنان دا كەلىپ تۇر. زىرياننىڭ تۇرعان جەرى التاي ەكەنى راس. التاي – سان ءتۇرلى حالىقتىڭ شىققان جەرى، اتاجۇرتى. سول سەبەپتى، ءبىز قانداي كيەلى جەردە تۇرىپ جاتقانىمىزدى ەشقاشان ۇمىتپاۋىمىز كەرەك. بۇل – ەڭ الدىمەن تاريحىمىزعا تاعزىم. اۋدان اتىن وزگەرتۋ ەكونوميكالىق تۇرعىدان دا ءتيىمدى بولارى ءسوزسىز. نەگە دەسەڭىز، التاي – برەندتىك اتاۋ. بۇل وڭىرگە تۋريستەردى كوپتەپ تارتۋعا مۇمكىندىك بەرەدى» دەدى ايماق باسشىسى.

ءتۇيىن

ءبىز وبلىس اكىمى دانيال احمەتوۆتىڭ سوزىنە تولىقتاي قوسىلىپ، التاي اتتى برەندتىك اتاۋدى اۋدانعا بەرۋدى قولدايمىز جانە بۇكىل قازاق ەلىن ءۇن قوسۋعا شاقىرامىز. 

ءشارىپحان قايسار

Abai.kz