2018 جىلعى 25–26 قىركۇيەكتە قر پرەمەر-ءمينيسترىنىڭ ءبىرىنشى ورىنباسارى اسقار مامين جۇمىس ساپارىمەن پەكينگە (قحر) باردى، دەپ حابارلايدى اباي-اقپارات قر پرەمەر-ءمينيسترىنىڭ ءباسپاسوز قىزمەتىنە سىلتەمە جاساپ.

ساپار اياسىندا اسقار مامين قحر مەملەكەتتىك كەڭەسى پرەمەرىنىڭ ورىنباسارىمەن، قر–قحر ىنتىماقتاستىق كوميتەتىنىڭ تەڭ توراعاسى حان چجەنمەن كەلىسسوزدەر جۇرگىزىپ، ءىرى ينۆەستيتسيالىق، قارجىلىق، ونەركاسىپتىك، قۇرىلىس، كولىك-لوگيستيكا كورپوراتسيالارىنىڭ باسشىلارىمەن بىرلەسكەن ينۆەستيتسيالىق جوبالاردى ىسكە اسىرۋ ماسەلەلەرى جونىندە بىرقاتار ەكىجاقتى كەزدەسۋلەر وتكىزدى.

«ەكى مەملەكەتتىڭ كوشباسشىلارى – قر پرەزيدەنتى نۇرسۇلتان نازارباەۆ پەن قحر توراعاسى سي ءتسزينپيننىڭ ارقاسىندا قازاقستان مەن قىتاي اراسىندا ەكى جاقتى قارىم-قاتىناستىڭ بارلىق سالاسىندا ىنتىماقتاستىقتىڭ جوعارى دەڭگەيىنە قول جەتكىزىلدى. "نۇرلى جول" جانە "ۇلى جىبەك جولىنىڭ ەكونوميكالىق بەلدەۋى" باعدارلامالارىنىڭ تۇيىندەسۋى ەكى ەل اراسىنداعى ينۆەستيتسيالىق ىنتىماقتاستىقتىڭ جوعارى دەڭگەيىن قامتاماسىز ەتەدى»، — دەدى اسقار مامين حان چجەنمەن كەزدەسۋ بارىسىندا.

قر ءبىرىنشى ۆيتسە-پرەمەرىنىڭ ايتۋىنشا، قحر – نەگىزگى ساۋدا سەرىكتەستەرىنىڭ ءبىرى. ەكى ەل اراسىنداعى سىرتقى ساۋدا اينالىمى 2017 جىلى 30%-دان استامعا ۇلعايعان. 2018 جىلى باقىلاپ وتىرعان جوعارعى قارقىن تاۋار اينالىمىنىڭ كولەمىن $20 ملرد جەتكىزۋ تۋرالى ەكى مەملەكەتتىڭ باسشىلارى العا قويعان مىندەتتەرگە قول جەتكىزۋگە مۇمكىندىك بەرەدى.

كەزدەسۋ بارىسىندا ساۋدا-ەكونوميكالىق، قارجى، ەنەرگەتيكا، كولىك جانە لوگيستيكا، اۋىل شارۋاشىلىعى، ونەركاسىپ سەكتورلارىنداعى، سونداي-اق، شەكارا ماڭىنداعى جانە ايماقارالىق بايلانىستاردى دامىتۋ سالاسىنداعى ەكىجاقتى ىنتىماقتاستىقتىڭ اۋقىمدى ماسەلەلەرى تالقىلاندى.

اسقار مامين قر مەن قحر ىنتىماقتاستىق كوميتەتىنىڭ ەكى ەل اراسىنداعى جان-جاقتى ستراتەگيالىق سەرىكتەستىكتى نىعايتۋداعى ماڭىزدى ءرولىن اتاپ ءوتتى.

قازىرگى تاڭدا قازاقستان مەن قىتاي يندۋستريا، كولىك جانە لوگيستيكا سالالارىندا جالپى قۇنى $28 ملرد بولاتىن 51 بىرلەسكەن جوبانى جۇزەگە اسىرۋدا. اتالعان جوبالاردى تابىستى ىسكە اسىرۋ ونىمدەرى الەمنىڭ جەتەكشى نارىقتارىنا جەتكىزىلەتىن بىرقاتار اۋقىمدى ءوندىرىس ورىندارىن قۇرۋعا مۇمكىندىك بەرەدى. جالپى $1,9 ملرد سوماسىنا جاڭا 11 جوبانى بىرلەسىپ جۇزەگە اسىرۋ تۋرالى كەلىسىمگە قول جەتكىزىلدى.

ا. مامين پەكين قالاسىنا جۇمىس ساپارى بارىسىندا CITIC Group, China Xin Xing Group Co.، YTO Group Corp.، Jiangxi Copper Company, Jiaxin Investment Resources, China Energy Engineering, CSI Solar Power Group, China CAMC Engineering Co.، Lovol Heavy Industry, China Energy Engineering Corporation, China General Nuclear Power Group جانە ت. ب. كومپانيالاردىڭ باسشىلىعىمەن كەلىسسوزدەر وتكىزدى.

COSCO Shipping Corporation باسشىسى حۋان سياوۆەنمەن جانە ليانيۋنگان پورتىنىڭ باسقارما توراعاسى دين جۋيمەن كەزدەسۋدە ترانسكونتينەنتتىك تاسىمالداردى جەتىلدىرۋ، سونداي-اق، ورتاق تەرمينال مەن «قورعاس – شىعىس قاقپاسى» اەا ودان ءارى دامىتۋ ماسەلەلەرى تالقىلاندى.

«China Construction Bank» باسشىسى ۆان تسزۋتسزيمەن قارجى سالاسىندا ىنتىماقتاستىق ورناتۋ ماسەلەلەرى تالقىلاندى. پرەمەر-ءمينيستردىڭ ءبىرىنشى ورىنباسارى ا. مامين احقو-عا «ءبىر بەلدەۋ – ءبىر جول» باستاماسى اياسىندا جوبالاردى قارجىلاندىرۋعا قىتاي بانكتەرىنىڭ «ۇلكەن التىلىعىنىڭ» قاتىسۋىنىڭ جوندىلىگىن جەتكىزدى.

بۇدان وزگە، پەكيندە اسقار مامين حەنان، سىچۋان پروۆينتسيالارىنىڭ جانە چۋنتسين قالاسىنىڭ اكىمشىلىك باسشىلارىمەن كەزدەسۋ وتكىزدى.

قحر-گە جۇمىس ساپارى اياسىندا بىرقاتار قۇجاتتارعا قول قويىلدى:

قوستاناي وبلىسىنىڭ اكىمدىگى، «Kazakh Invest» ۇك» اق جانە HKC Corporation Limited «2018–2019 جج. قوستاناي قالاسىنىڭ يندۋستريالىق ايماعىنىڭ اۋماعىندا تەلەديدار شىعاراتىن زاۋىت سالۋ» جوباسىن ىسكە اسىرۋ جونىندەگى جول كارتاسىنا قول قويدى. قوستاناي قالاسىندا تەلەديدار شىعاراتىن زاۋىت سالۋ جۇمىستارى بيىل باستالادى. كاسىپورىننىڭ جوسپارلى قۋاتتىلىعى — جىلىنا 3 ملن بىرلىك. باستاپقى كەزەڭدەگى ينۆەستيتسيالاردىڭ جوسپارلى كولەمى — $50 ملن. ءونىمدى وتكىزەتىن ماقساتتى نارىق — تمد ەلدەرى;

«قتج» ۇك» اق، Huawei International Co.،LTD جانە Ili Baitexing Commercial Trading Co.، LTD ەلەكتروندى كوممەرتسيانى دامىتۋ تۋرالى كەلىسىمگە قول قويدى;

«اگروماش حولدينگ KZ» اق، Lovol Heavy Industry, «Kazakh Invest» ۇك» اق جانە YTO «اۋىل شارۋاشىلىعى جانە جول-قۇرىلىس تەحنيكاسىن شىعارۋ» جوباسىن ىسكە اسىرۋ جونىندەگى جول كارتاسىنا قول قويدى.

Abai.kz