پاتەر يەلەرى مۇلكىن جالعا بەرگەن كەزدە پاتەنتى بولسا، سالىق تولەگەندە ۇنەمدەي الادى. بۇل تۋرالى قر قارجى مينيسترلىگىنىڭ مەملەكەتتىك كىرىس كوميتەتىندە وتكەن بريفينگتە جۋرناليستەرگە ايتىلدى. بۇل تۋرالى Abai.kz اقپاراتتىق پورتالى حابارلايدى.

جىلجىمايتىن مۇلىكتى جالعا بەرۋگە جەكە كاسىپكەرلەر دە، جەكە كاسىپكەر رەتىندە تىركەلمەگەن جەكە تۇلعالار دا قۇقىلى. وسى قىزمەت ءتۇرى ءۇشىن ەڭ قولايلى رەجيم پاتەنت نەگىزىندەگى ارناۋلى سالىق رەجيمى بولىپ تابىلادى، سەبەبى سالىق ستاۆكاسى 1%-دى قۇرايدى.

پاتەنت نەگىزىندەگى ارناۋلى سالىق رەجيمىن قولدانۋ ءۇشىن كەلەسى شارتتارعا ساي بولۋ كەرەك — جالدامالى ەڭبەكتى پايدالانباۋ جانە كۇنتىزبەلىك جىل بويىنشا تۇپكىلىكتى كىرىس 300 ەسەلەنگەن ەڭ تومەنگى جالاقىدان اسپاۋ قاجەت (2018 جىلى 8 485 200 تەڭگە).

«ەگەر جەكە تۇلعا جك رەتىندە تىركەلگەن بولسا، پاتەنت نەگىزىندە ارنايى سالىق رەجيمى بەلگىلەنەدى. بۇل رەجيمدە سالىق بولجاناتىن پايدانى نەگىزگە الا وتىرىپ، ءۇش اي، جارتى جىل نەمەسە جىل ارالىعىمەن الدىن الا تولەنەدى. پاتەنتتى ۇزارتۋعا بولادى. پاتەنت نەگىزىندە سالىق رەجيمىنىڭ مولشەرلەمەسى 2018 جىلدان باستاپ 2%-دان 1%-عا دەيىن تومەندەتىلدى. بۇل رەجيم جالعا بەرۋشىلەر ءۇشىن ەڭ بەلگىلىسى»، — قر قم مەملەكەتتىك كىرىستەر كوميتەتىنىڭ كامەرالدىق مونيتورينگ باسقارماسىنىڭ باسشىسى ورىنباسارىنىڭ مىندەتىن اتقارۋشى ەربول ءامىرحانوۆ.

مىسالى پاتەردى 100 مىڭ تەڭگەگە تاپسىرساڭىز، وندا سالىق ايىنا تەك 1000 تەڭگەنى، جىلىنا 12 مىڭ تەڭگەنى قۇرايدى، بۇل اكىمشىلىك قۇقىق بۇزۋشىلىق ايىپپۇلىنان ءۇش ەسە از.

«ەگەر دە ءسىز بەلگىلەنگەن مەرزىمدە سالىق ەسەپتىلىگىن تاپسىرماساڭىز، سىزگە ءبىرىنشى رەت «ەسكەرتۋ» تۇرىندە ءوندىرىپ الۋ شاراسى قولدانىلادى، قۇقىقتى قايتا بۇزساڭىز اكىمشىلىك ايىپپۇل 36 075 تەڭگەنى (15 اەك) قۇرايدى»، — دەدى ەربول ءامىرحانوۆ.

سونداي-اق وسى كاسىپ تۇرىندە سالىق تولەۋدىڭ باسقا دا تۇرلەرى بار.

«مۇلىكتى جالعا بەرۋدەن تۇسكەن تابىستار بويىنشا جەكە تۇلعا ءوزى كۇنتىزبەلىك جىل ناتيجەسى بويىنشا ورنالاسقان جەرىندەگى سالىق ورگانىنا ەسەپتىك سالىق كەزەڭىنەن كەيىنگى جىلدىڭ 31 ناۋرىزىنان كەشىكتىرمەي 24000 نىسان بويىنشا سالىق دەكلاراتسياسىن تابىس ەتەدى جانە دەكلاراتسيانى تاپسىرۋ مەرزىمىنەن كەيىن 10 كۇنتىزبەلىك كۇنىنەن كەشىكتىرمەي العان تابىس سوماسىنان 10% ستاۆكاسىمەن جەكە تابىس سالىعىن تولەۋگە مىندەتتى»، — دەدى ول.

جەكە كاسىپكەر رەتىندە تىركەلۋ ءۇشىن «ەلەكتروندىق ۇكىمەت» ۆەب-پورتالى ارقىلى ەلەكتروندى تۇردە نەمەسە قاعاز جەتكىزگىشتە ءوزى كەلۋ تارتىبىندە دارا كاسىپكەر رەتىندە قىزمەتىنىڭ باستالۋى جايلى حابارلامانى ۇسىنۋ قاجەت.

كوميتەتتىڭ مالىمەتىنشە پاتەرلەرىن جالعا زاڭدى تۇردە بەرىپ جاتقانداردىڭ سالىعى بويىنشا وتكەن جىلى بيۋدجەتكە 207 ميلليون تەڭگە تۇسكەن. ال وسى جىلدىڭ 6 ايىنىڭ ىشىندە وسىنداي سالىقتان 110 ميلليون تەڭگە مەملەكەت قازىناسىنا كەلگەن.

بولجام بويىنشا جىل سوڭىنا دەيىن جالعا بەرىلگەن جىلجىمايتىن مۇلىكتەردىڭ سالىقتارىنان 230 ميلليون تەڭگە تۇسەتىن بولادى.

Abai.kz