اقوردادا قر مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن قر پرەزيدەنتى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

باسقوسۋدا جەر قاتىناستارى سالاسىندا زاڭدىلىقتى ساقتاۋ ماسەلەلەرى،  سونداي-اق ءبىلىم بەرۋ ىسىندە بيۋدجەت قاراجاتىن ءتيىمدى پايدالانۋدى قامتاماسىز ەتۋ ءۇشىن قابىلدانىپ جاتقان شارالار تالقىلاندى. باس پروكۋراتۋرانىڭ، مەملەكەتتىك قىزمەتى ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ، رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ، اۋىل شارۋاشىلىعى، ءبىلىم جانە عىلىم مينيسترلىكتەرىنىڭ باياندامالارى تىڭدالدى.

جەر قاتىناستارى سىبايلاس جەمقورلىق بەلەڭ العان سالانىڭ ءبىرى بولىپ سانالاتىنىن تاجىريبە كورسەتىپ وتىر. تەك سوڭعى ەكى جارىم جىل ىشىندە بۇل سالا بويىنشا سىبايلاس جەمقورلىققا قارسى قىزمەت 457 قىلمىستى تىركەگەن. 78 ادام سوتتالدى. پروكۋرورلىق تەكسەرىس ناتيجەسى بويىنشا، جەر قاتىناستارىن رەتتەيتىن زاڭنامانى بۇزعانى ءۇشىن 342 ادام ءتۇرلى جاۋاپكەرشىلىكە تارتىلدى، سونىڭ ىشىندە 25 قىزمەتشى مەملەكەتتىك قىزمەتتىڭ بەدەلىنە نۇقسان كەلتىرگەنى ءۇشىن جاۋاپتى بولدى. وسىعان بايلانىستى مۇددەلى مەملەكەتتىك ورگانداردىڭ نازارى جەر تۋرالى زاڭنامانى، جەكە باسپانا قۇرىلىسى ءۇشىن جەر تەلىمدەرىن بەرۋ كەزىندەگى كەزەكتىلىك ءتارتىبىن جانە مەملەكەتتىك قىزمەت كورسەتۋ مەرزىمىن ساقتاۋ، كوممەرتسيالىق جەرلەردى اۋكتسيونسىز يەلەنۋگە جول بەرمەۋ قاجەتتىگىنە اۋدارىلدى.

مەملەكەتتىك حاتشى ءبىلىم بەرۋ ءىسىن قارجىلاندىرۋعا مەملەكەتتەن مول قارجى ءبولىنىپ وتىرعانىنا توقتالدى. سونىمەن قاتار، 2016 جىلدان بەرى بۇل سالادا سىبايلاس جەمقورلىققا قاتىستى 510 قىلمىس تىركەلىپ، 178 ادام سوتتالعان. الەۋمەتتىك ساۋالنامالار جوعارى وقۋ ورىندارىنداعى ءبىلىم بەرۋ ىسىندە، مەكتەپكە دەيىنگى مەكەمەلەردەگى بالالارعا ورىن ءبولۋ بارىسىندا سىبايلاس جەمقورلىق دەڭگەيى جوعارى ەكەنىن كورسەتەدى.

تالقىلاۋ ناتيجەسى بويىنشا كوميسسيا وكىلەتتى مەملەكەتتىك ورگاندارعا انىقتالعان زاڭ بۇزۋشىلىقتارعا قاتىستى تالداۋ جۇرگىزۋ جانە قىلمىستىڭ الدىن الاتىن ءتيىستى تەتىكتەر ازىرلەۋ ءۇشىن شارالار قابىلداۋ جونىندە تاپسىرما بەردى.

سوڭىندا گ.ابدىقالىقوۆا ەلىمىزدە سىبايلاس جەمقورلىقسىز قۇقىقتىق مەملەكەت قالىپتاستىرۋ ءۇشىن جۇرگىزىلىپ جاتقان رەفورمالار قازاقستان رەسپۋبليكاسىنىڭ 2025 جىلعا دەيىنگى ستراتەگيالىق دامۋ جوسپارىنىڭ باستى مىندەتتەرىنە قول جەتكىزۋگە باعىتتالۋى كەرەك ەكەنىن ايتتى. بۇل – جەدەل ءارى ساپالى ەكونوميكالىق ءوسىم جانە حالىقتىڭ ءال-اۋقاتىن ارتتىرۋ.

Abai.kz