مەملەكەت باسشىسى بيىلعى 28 قىركۇيەكتە وتەتىن تمد ەلدەرى باسشىلارى كەڭەسىنىڭ وتىرىسىنا قاتىسۋ ءۇشىن دۋشانبە قالاسىنا كەلدى.

قازاقستان پرەزيدەنتى تاجىكستان رەسپۋبليكاسىنىڭ پرەزيدەنتى ەمومالي راحمونمەن كەزدەسۋ وتكىزدى.

كەزدەسۋدە تاراپتار ەكى جاقتى قاتىناستاردىڭ قازىرگى ماسەلەلەرىن جانە ەكونوميكانىڭ ءتۇرلى سەكتورلارىنداعى ىنتىماقتاستىقتى ودان ءارى دامىتۋدىڭ پەرسپەكتيۆالارىن تالقىلادى.

– ەلدەرىمىز اراسىندا ءوزارا سەنىمگە نەگىزدەلگەن قارىم-قاتىناس ورنادى. ءبىز تاجىكستانعا ءاردايىم كومەك كورسەتىپ، قولداۋ بىلدىردىك. بۇگىندە وسى ىنتىماقتاستىعىمىزدى تەرەڭدەتىپ، ءوزارا ساۋدا-ساتتىقتى ىلگەرىلەتۋدى كوزدەپ وتىرمىز، – دەدى مەملەكەت باسشىسى.

سونىمەن قاتار، نۇرسۇلتان نازارباەۆ تمد ەلدەرى اراسىنداعى بايلانىستاردى ودان ءارى نىعايتۋ جانە ينتەگراتسيالىق ۇدەرىستەردى كەڭەيتۋ ءۇشىن شارالار قابىلداۋدىڭ ماڭىزدى ەكەنىنە نازار اۋداردى.

تاجىكستان پرەزيدەنتى ەكى ەل اراسىندا قالىپتاسقان قاتىناستاردىڭ ستراتەگيالىق سيپاتى تۋرالى ايتتى.

– قازاقستان – تاجىكستاننىڭ نەگىزگى ستراتەگيالىق جانە ەكونوميكالىق ارىپتەستەرىنىڭ ءبىرى. ءبىزدىڭ ساۋدا-ەكونوميكالىق قاتىناستارىمىز كەڭەيىپ كەلەدى، – دەدى ە.راحمون.

تاجىكستان پرەزيدەنتى ەمومالي راحمون نۇرسۇلتان نازارباەۆتىڭ حالىقارالىق ارەناداعى بەدەلىن ەرەكشە اتاپ ءوتىپ، ەكونوميكالىق جانە ساياسي تۇرعىدان قولداۋ كورسەتكەنى ءۇشىن قازاقستانعا ريزاشىلىق ءبىلدىردى.

Abai.kz