باس پروكۋراتۋرانىڭ 2 قازان كۇنى تاراتقان اقپاراتى بويىنشا، ءابليازوۆتىڭ ءىسى قىلمىستىق كودەكستىڭ 1997 جىلعى رەداكتسياسىنىڭ 28-بابى 3-تارماعى (قىلمىس جاساۋدى ۇيىمداستىرعان نەمەسە ونىڭ ورىندالۋىنا باسشىلىق جاساعان ادام) جانە 96-بابى 3-تارماعىنىڭ "ج" جانە "ز" بولىمدەرى (توپ بولىپ، الدىن الا ءسوز بايلاسۋ ارقىلى، پايدا تابۋ ماقساتىمەن، سول سياقتى جالدانىپ نە قاراقشىلىقپەن، قورقىتىپ الۋشىلىقپەن، يا بانديتيزممەن ۇشتاسقان جەكە ادامعا قارسى قىلمىس) بويىنشا دارەجەلەنگەن.
تاتىشەۆ ولىمىنە قاتىستى ءىستى جامبىل وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى قارايدى.
ەرجان تاتىشەۆ 2004 جىلى اڭشىلىقتا جۇرگەندە وق ءتيىپ ولگەن. سول كەزدە بۇنى سوت "جازاتايىم وقيعا" دەپ تانىپ، بانكيردىڭ جانىندا بىرگە بولعان كاسىپكەر مۇراتحان توقماديدى ءبىر جىلعا سوتتاعان. بىراق 2017 جىلى ءىس قايتا قارالىپ، مۇراتحان توقمادي تاتىشەۆتى "تۇرانالەم" بانكىن يەلەنۋدى كوزدەگەن "مۇحتار ءابليازوۆتىڭ تاپسىرىسىمەن ءولتىردىم" دەگەن. سوت ونى 2018 جىلى ون جارىم جىلعا سوتتالدى.
قازاقستان باس پروكۋراتۋراسى 4 ساۋىردە مۇحتار ءابليازوۆتىڭ ۇستىنەن "بانكير ەرجان تاتىشەۆتى ءولتىرۋدى ۇيىمداستىردى" دەگەن ايىپپەن قىلمىستىق ءىس قوزعاعان.
وسىدان كەيىن مۇحتار ءابليازوۆ ازاتتىققا ەرجان تاتىشەۆ ولىمىنە قاتىستى تەرگەۋگە جانە سوتقا قاتىسۋعا دايىن ەكەنىن مالىمدەگەن. ول سوتقا تاتىشەۆ ولىمىنە قاتىسى بار دەپ سوتتالعان مۇراتحان توقمادي كەلسە عانا وتىرىستارعا ۆيدەو ارقىلى تىكەلەي قوسىلاتىنىن ايتقان.
مۇحتار ءابليازوۆ 2009 جىلدان بەرى شەتەلدە تۇرادى، وزىنە قاتىستى بارلىق ايىپتاۋلاردىڭ ساياسي سەبەبى بار دەپ سانايدى. قازاقستان سوتى ءابليازوۆتى "قىلمىستىق توپ قۇردى" جانە "اقشا جىمقىردى" دەپ، 2017 جىلى سىرتتاي 20 جىلعا سوتتالعان.
Abai.kz
