ۇكىمەت وتىرىسىنىڭ قورىتىندىسى بويىنشا وتكەن بريفينگتە ءبىلىم جانە عىلىم ۆيتسە-مينيسترلەرى ەلميرا سۋحانبەرديەۆا جانە بيبىگۇل اسىلوۆا مەكتەپكە دەيىنگى ءبىلىم ساپاسىن كوتەرۋ شارالارى تۋرالى ايتىپ بەردى.

ە. سۋحانبەرديەۆانىڭ ايتۋىنشا، پرەزيدەنتتىڭ قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىن ورىنداۋ ءۇشىن ءبىلىم جانە عىلىم مينيسترلىگى مەكتەپكە دەيىنگى بىلىمگە قاتىستى بىرقاتار ماسەلەلەردى قاراستىرىپ جاتىر.

«ءبىز جەرگىلىكتى اتقارۋشى ورگاندارمەن بىرلەسىپ جول كارتاسىن جاسادىق. جۇمىس توبى قۇرىلىپ جاتىر. بىرىڭعاي ۇلتتىق بىلىكتىلىك تەستىلەۋىن ەنگىزۋ بويىنشا جۇمىستاردى باستاپ جاتىرمىز»، — دەدى ۆيتسە-مينيستر.

ورتا بۋىن پەداگوگتارىنا ارنالعان بىلىكتىلىك تەستىلەۋى ازىرلەنىپ قويعانىن ايتا كەتۋ كەرەك. سونىمەن قوسا، بيىل ماۋسىم ايىندا 56 910 پەداگوگ سول تەستىلەۋ بويىنشا اتتەستاتتاۋدان وتكەن. تەستىلەۋدەن جانە ەكىنشى كەزەڭنەن وتكەن مۇعالىمدەر 1 قىركۇيەكتەن باستاپ جاڭا جالاقى الىپ جاتىر. كەلەسى تەستىلەۋ 2018 جىلى قاراشادا وتەدى.

تاربيەشىلەر ءۇشىن دە وسىنداي ۇلتتىق بىلىكتىلىك تەستىلەۋىن ەنگىزۋ جوسپارلانىپ وتىر.

«ءبىز جالاقى دەڭگەيىن كوتەرۋ تۋرالى ايتىپ وتىرمىز. ۇلتتىق بىلىكتىلىك تەستىلەۋىنىڭ ناتيجەلەرى بويىنشا 30%-دان 50%-عا دەيىن قوسىمشا تولەماقى ەنگىزىلەدى. ياعني، بۇل تەك تاربيەشىلەردىڭ عانا ەمەس، بالاباقشا مەڭگەرۋشىلەرى مەن ادىسكەرلەرىنىڭ دە جالاقىسىنا قاتىستى»، — دەدى ە. سۋحانبەرديەۆا.

ءبىلىم جانە عىلىم ۆيتسە-ءمينيسترى بيبىگۇل اسىلوۆا تاپسىرما بويىنشا 2023 جىلعا قاراي جالپى ءبىلىپ بەرۋ سالاسىنا جۇمسالاتىن شىعىندار ءبىرشاما ارتتىرىلاتىنىن ايتتى.

«بىزگە بولىنەتىن قوسىمشا قارجىنىڭ ارقاسىندا، 2019 جىلدان باستاپ بالاباقشا تاربيەشىلەرىنىڭ، ادىسكەرلەرى مەن مەڭگەرۋشىلەرىنىڭ جالاقىسى وسەدى. پەداگوگتاردىڭ مارتەبەسى تۋرالى زاڭدى ازىرلەۋ اياسىندا مەكتەپ ديرەكتورلارى مەن ديرەكتورلاردىڭ ورىنباسارلارىنىڭ جالاقىسىن كوتەرۋ قاراستىرىلىپ وتىر. سونىمەن قاتار، پەداگوگتاردى قولداۋ ماقساتىندا سىنىپقا جەتەكشىلىك ەتكەنى جانە داپتەرلەردى تەكسەرگەنى ءۇشىن جالاقىنى ءۇش ەسەگە دەرلىك ارتتىرۋ قاراستىرىلۋدا. بۇل ماقساتتارعا رەسپۋبليكالىق بيۋدجەتتەن قوسىمشا قاراجات بولىنەدى»، — دەدى ب. اسىلوۆا.

Abai.kz