«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ قىزىلوردا وبلىسىنا ساپارى بارىسىندا وسىلاي دەدى.

بۇگىن ەلباسىنىڭ جاڭا جولداۋىندا ايتىلعان باسىمدىقتاردىڭ ماڭىزىن حالىققا ءتۇسىندىرىپ، ونىڭ جۇزەگە اسىرىلۋىن قاداعالاۋ ءۇشىن ماۋلەن اشىمباەۆ سىر وڭىرىنە ارنايى كەلدى. سونىڭ بارىسىندا ول قىزىلورداداعى سىرداريا وزەنىنىڭ سول جاعالاۋىنداعى قۇرىلىس بارىسىن قاداعالاپ، «7-20-25» باعدارلاماسىنىڭ ورىندالۋىنا نازار اۋداردى. سونىڭ بارىسىندا قۇرىلىسشىلارمەن، ەكىنشى دارەجەدەگى بانك وكىلدەرىمەن كەزدەسىپ، سونداي-اق، مەملەكەتتىك باعدارلامانى ىسكە اسىرۋ كەزىندە تۋىنداعان ماسەلەلەردىڭ ءمان-جايىن تالقىلادى.

سونداي-اق پارتيانىڭ وبلىستىق اكتيۆىمەن جانە سىرداريا اۋدانى، شاعان اۋىلىنىڭ تۇرعىندارىمەن كەزدەستى. ءوز سوزىندە ماۋلەن اشىمباەۆ ەلباسىنىڭ جولداۋدا قوعامدا قىزۋ تالقىلانىپ جۇرگەن ەڭ وزەكتى الەۋمەتتىك ماسەلەلەردى قامتىپ، ولاردى شەشۋ ءۇشىن ناقتى شارالاردى ۇسىنعانىن ايتتى.

ودان بولەك، «نۇر وتان» پارتياسى توراعاسىنىڭ ءبىرىنشى ورىنباسارى پارتيانىڭ ەلباسىنىڭ سەنىمدى تىرەگى، ەلىمىزدەگى جەتەكشى ساياسي كۇش رەتىندە الداعى ۋاقىتتا جولداۋدى جۇزەگە اسىرۋعا باسىمدىق بەرەتىنىن جەتكىزدى.

– پارتيا جولداۋدىڭ ءمانى مەن ماڭىزىن حالىققا كەڭىنەن ءتۇسىندىرىپ، جۇزەگە اسىرىلۋىنا جۇيەلى تۇردە قوعامدىق باقىلاۋ جۇرگىزەدى. پارتيا تەك باقىلاپ قانا قويماي، جولداۋدا ايتىلعان ۇسىنىستاردى جۇزەگە اسىرۋعا تىكەلەي قاتىساتىن جانە سونى قامتاماسىز ەتەتىن باستى كۇشكە اينالۋى ءتيىس. بۇل – ەلباسىنىڭ بىزگە بەرىپ وتىرعان ناقتى تاپسىرماسى. قاجەت بولسا ولقىلىقتاردى جەرگىلىكتى اتقارۋشى ورگاندار مەن ۇكىمەتتىڭ الدىنا ماسەلە ەتىپ قويىپ، ونىڭ ءارى قاراي ساپالى جانە ۋاقىتىلى ورىندالۋىن تالاپ ەتۋ، ءتيىمدى جولدارىن كورسەتۋ، بارلىق ىستە تاباندىلىق تانىتۋ دا پارتيانىڭ مىندەتى بولىپ سانالادى. سوندىقتان «نۇر وتان» جولداۋدىڭ جۇزەگە اسىرىلۋىن قاتاڭ باقىلايتىن بولادى، – دەدى ماۋلەن اشىمباەۆ.

پارتيا توراعاسىنىڭ ءبىرىنشى ورىنباسارى ءوز سوزىندە قىزىلوردا وبلىسىندا ەلباسى جولداۋىن ىسكە اسىرۋدا ناتيجەلى جۇمىس جۇرگىزىلىپ جاتقانىنا دا نازار اۋداردى. اتاپ ايتقاندا، قىزىلوردا وبلىسىندا «وردا» تۇرعىن ءۇي قۇرىلىسىنىڭ «جول كارتاسى» قولعا الىنىپ، العاشقى سالىمسىز-اق نەسيەگە تۇرعىن ءۇي ساتىپ الۋعا جول اشىلدى. وسىلايشا، وڭىردە پرەزيدەنتتىڭ جولداۋدا ايتقان باسپاناعا مۇقتاج جاندارعا ناقتى كومەك كورسەتۋ تۋرالى تاپسىرماسى ورىندالۋدا.

ەلباسىنىڭ تسيفرلاندىرۋ، شاعىن جانە ورتا بيزنەسكە قولداۋ ءىسىن جۇزەگە اسىرۋدا دا وبلىستىڭ وزىق تاجىريبەسىن اتاپ وتكەن ءجون. ياعني وبلىستا كوممەرتسيالىق ماقساتتاعى جەر تەلىمدەرى تۋرالى اقپاراتتىڭ اشىقتىعىن قامتاماسىز ەتەتىن گەواقپاراتتىق ونلاين قىزمەت كورسەتەتىن جۇيە قۇرىلعان. «رۋحاني جاڭعىرۋ» باعدارلاماسى بويىنشا دا وبلىستا اۋىز تولتىرىپ ايتارلىقتاي جۇمىستار اتقارىلعان. وسىعان وراي ماۋلەن اشىمباەۆ ەلباسى جولداۋىن جۇزەگە اسىرۋدا قىزىلوردا وبلىسىنىڭ تاجىريبەسىن وزگە وڭىرلەردە دە قولدانۋدىڭ بەرەرى مول ەكەنىن تىلگە تيەك ەتتى.

ساپار بارىسىندا پارتيا توراعاسىنىڭ ءبىرىنشى ورىنباسارى وبلىس ورتالىعىنداعى بىرقاتار الەۋمەتتىك نىسانداردى ارالاپ، بەس الەۋمەتتىك باستاما جانە پارتيالىق جوبالار اياسىندا جۇزەگە اسىرىلعان جۇمىستارمەن تانىستى.

Abai.kz