مەملەكەت باسشىسى جۇمىس ساپارىمەن اقتوبە قالاسىنا كەلدى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

ساپار اياسىندا قازاقستان پرەزيدەنتىنىڭ وڭىردەگى بىرقاتار الەۋمەتتىك جانە ونەركاسىپتىك نىسانداردى ارالاپ كوردى.

مەملەكەت باسشىسى «ايالا» بالالاردى ساۋىقتىرۋ ورتالىعىنا باردى

ەلباسى تسەرەبرالدى سال اۋرۋىمەن، اۋتيزممەن، نەيرو-ورتوپەديالىق پاتولوگيامەن اۋىراتىن بالالارعا ارنالعان زاماناۋي تەحنولوگيالار مەن ستاندارتتارى بار الەۋمەتتىك-پسيحولوگيالىق جانە مەديتسينالىق وڭالتۋ باعدارلامالارىمەن تانىستى.

سونىمەن قاتار، نۇرسۇلتان نازارباەۆقا «باقىتتى بالا» وبلىستىق جوباسىنىڭ جۇزەگە اسىرىلۋ ناتيجەلەرى جونىندە مالىمدەلدى. جوبا اياسىندا ەرەكشە مۇقتاج بالالار ءۇشىن ارنايى كوررەكتسيالىق بالاباقشا، پسيحولوگيالىق جانە مەديتسينالىق-پەداگوگيكالىق كونسۋلتاتسيا بەرەتىن ورىندار، «كۇنشۋاق» بالالاردى ساۋىقتىرۋ لاگەرى اشىلدى. اۋداندارداعى پسيحولوگيالىق-پەداگوگيكالىق كوررەكتسيا كابينەتتەرى جانە اقتوبە قالاسىنىڭ ورتا مەكتەپتەرىندە ينكليۋزيۆتى ءبىلىم بەرۋ ءىسىن دامىتۋ جونىندەگى رەسۋرستى كابينەتتەر جاساقتالىپ، جۇمىس جۇرگىزۋدە.

بيزنەستىڭ الەۋمەتتىك جاۋاپكەرشىلىگى اياسىندا «اقتوبە مىس كومپانياسى» جاۋاپكەرشىلىگى شەكتەۋلى سەرىكتەستىگى سالعان ورتالىق شۆەيتساريا، چەحيا، پولشا جانە رەسەيدىڭ زاماناۋي قۇرالدارىمەن جابدىقتاعان.

ەلباسى جاڭادان سالىنعان مۇز سارايىنا باردى.

ەلباسى مەملەكەت-جەكەمەنشىك سەرىكتەستىك اياسىندا سلوۆاكيا ينۆەستورلارىنىڭ قاتىسۋىمەن سالىنعان قالاداعى جاڭا مۇز سارايىنا باردى.

قازاقستان پرەزيدەنتى جاس حوككەيشىلەردى جانە بارشا اقتوبەلىكتەردى مۇز سارايىنىڭ اشىلۋىمەن قۇتتىقتاپ، شايباعا ەستەلىك قولتاڭبا قالدىردى.

جالپى اۋماعى 8 500 شارشى مەتر بولاتىن سپورت كەشەنى جىل بويى حوككەيدەن، شورت-ترەكتەن، مانەرلەپ سىرعاناۋدان، باسكەتبولدان، شاعىن فۋتبولدان، بوكستان، ۇلكەن تەننيستەن، گيمناستيكادان كاسىبي جارىستار وتكىزۋگە، سونداي-اق كونكيمەن جاپپاي سىرعاناۋعا مۇمكىندىك بەرەدى. ارەنا 2 500-دەن استام كورەرمەنگە ارنالعان.

قازاقستان پرەزيدەنتى «اقتوبە» يندۋستريالىق ايماعىنا باردى.

مەملەكەت باسشىسىنا يندۋستريالىق ايماقتا ىسكە اسىرىلىپ جاتقان جوبالار، سونداي-اق ونەركاسىپ كاسىپورىندارىن تسيفرلاندىرۋ جانە تەحنولوگيالىق تۇرعىدان جاڭعىرتۋ، وبلىستىڭ اگروونەركاسىپ كەشەنىن دامىتۋ ءۇشىن اتقارىلعان جۇمىستار تۋرالى مالىمدەلدى.

اقتوبە وبلىسىنىڭ اكىمى وڭىردىڭ بيىلعى 9 ايداعى الەۋمەتتىك-ەكونوميكالىق دامۋىنىڭ نەگىزگى ناتيجەلەرى جونىندە باياندادى.

– ەسەپتى كەزەڭدە الەۋمەتتىك-ەكونوميكالىق دامۋدىڭ بارلىق نەگىزگى كورسەتكىشتەرى بويىنشا ءوسۋ قارقىنى ساقتالىپ وتىر. ونەركاسىپ ءوسىمى – 105,7 پايىز. جالپى، قاڭتار-قىركۇيەك ايلارىندا وندىرىلگەن ءونىمنىڭ قۇنى 1,3 تريلليون تەڭگەدەن استى. اۋىل شارۋاشىلىعى ءونىمىنىڭ جالپى كولەمى 167,3 ميلليارد تەڭگەنى نەمەسە 104 پايىزدى قۇرادى. وسى ايدا 85 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. بۇل بىلتىرعى وسى كەزەڭمەن سالىستىرعاندا 22,1 پايىزعا ارتىق. بيىلعى 9 اي ىشىندە 318 ميلليارد تەڭگەدەن استام ينۆەستيتسيا تارتىلدى، – دەدى ب.ساپارباەۆ.

سونىمەن قاتار، ءوڭىر باسشىسى نەگىزگى  مەملەكەتتىك باعدارلامالاردىڭ، سونىڭ ىشىندە «بەس الەۋمەتتىك باستامانىڭ» جۇزەگە اسىرىلۋ بارىسى جونىندە ەسەپ بەردى.

باياندامانى تىڭداعان سوڭ، نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا ارنالعان جولداۋدى ءتيىمدى ىسكە اسىرۋدىڭ ماڭىزدىلىعىن اتاپ ءوتىپ، وبلىستاعى ورتاشا جالاقىنى ءوسىرۋ، جەرگىلىكتى ماڭىزى بار جولداردى جوندەۋ جانە ءوڭىردىڭ، اسىرەسە اقتوبە قالاسىنىڭ ەكولوگيالىق احۋالىن جاقسارتۋ جونىندە بىرقاتار ناقتى تاپسىرما بەردى.

«اقتوبە» يندۋستريالىق ايماعىنىڭ كولەمى 200 گەكتار جەردى قامتيدى. وندا ينجەنەرلىك-كوممۋنيكاتسيالىق ينفراقۇرىلىم، اۆتوموبيل جانە تەمىر جول كولىكتەرىنە ارنالعان كىرمە جولدار بار. بۇگىندە مۇندا جالپى قۇنى 60,3 ميلليارد تەڭگە بولاتىن 14 ينۆەستيتسيالىق جوبا جۇزەگە اسىرىلۋدا.

Abai.kz