ەلىمىزدە سۋ رەسۋرستارىنا ارنالعان su24.kz جاڭا اقپاراتتىق-تانىمدىق سايتى ىسكە قوسىلدى.

سايتتا سۋ الەمىنە قاتىستى جاڭالىقتاردان بولەك، وزەن-كولدەر تۋرالى تانىمدىق ماتەريالدار، رەسپۋبليكالىق ماڭىزى بار سۋ نىساندارى، سونىمەن قاتار شارۋا قوجالىق باسشىلارى، بىلىكتى سۋ ماماندارى، وسى سالانىڭ ارداگەرلەرى مەن ەكولوگتار، قوعام قايراتكەرلەرىنىڭ سۇحباتتارى ۇسىنىلعان.

ءبىز ءوز كەزەگىمىزدە اۋىل شارۋاشىلىعى مينيسترلىگى سۋ رەسۋرستارى كوميتەتى مەن «قازسۋشار» رەسپۋبليكالىق مەملەكەتتىك كاسىپورنىنىڭ ءباسپاسوز ىسىنە بىردەي جاۋاپتى مامان، سايت جەتەكشىسى ازامات بايعاليۇلىمەن سۇحباتتاسىپ، ءمان-جايدى بىلگەن ەدىك...

-ازامات مىرزا، مەنىڭ بىلۋىمشە بىزدە سۋ الەمى تۋرالى بۇرىن-سوڭدى مۇنداي سايت جۇمىس ىستەمەگەن. دەمەك، بۇل ءوز الدىنا ەرەكشە جوبا. بىراق نەگە سۋ تۋرالى سايت، نەگە باسقا سالا ەمەس؟

-دۇرىس ايتاسىز، بۇل سايت سۋ ماسەلەلەرىنە ارنالعان سالالىق سايت. «الدىڭعىلار قالاي جاساعان» دەگەندەي ۇلگى دە جوق. جۇمىستىڭ ەڭ قيىن تۇسى وسى. ونىڭ ۇستىنە سۋ – جالپى ادامزات بالاسىنىڭ باس اۋرۋىنا اينالدى. مەيلى ول اۋىز سۋ، مەيلى ەگىن سۋ، قازىر سۋدىڭ قانداي تۇرىنە دە سۇرانىس وتە جوعارى. الەمدە جاڭبىر سۋىن جيناپ الىپ، جان باعىپ وتىرعان ەلدەر بار. ولارعا ءار ءبىر تامشى قىمبات. ترانسشەكارالىق وزەندەر ماسەلەسى دە ۋاقىت وتكەن سايىن كۇردەلەنىپ بارادى. بۇل سۋدىڭ باعاسى ءارى قاراي دا وسە بەرەدى دەگەن ءسوز. بۇرىن قۋاتتى مەملەكەتتەر ءزاۋلىم عيماراتتار سالىپ جارىسقا تۇسسە، قازىر الىستى ويلاعاندار سۋ نىساندارىنا ەرەكشە ءمان بەرەدى. تامىز ايىندا اقتاۋ قالاسىندا نۇرسۇلتان ءابىشۇلى باستاعان مەملەكەت باسشىلارىنىڭ قاتىسۋىمەن كاسپي ماڭى ەلدەرىنىڭ V ءسامميتى ءوتتى. وتكەن اپتادا شەكاراارالىق سۋ ارنالارى مەن حالىقارالىق كولدەردى قورعاۋ جانە پايدالانۋ تۋرالى كونۆەنتسيا كەڭەسىنىڭ سەگىزىنشى سەسسياسىن ۇيىمداستىردىق. قانشاما ەلدىڭ وكىلدەرى كەلىپ قاتىسىپ، ۇسىنىس-تىلەكتەرىن جەتكىزىپ جاتىر. ياعني جاھاندا قاتتى الاڭداۋشىلىق بار. 1992 جىلدان بەرى ءبىر تيىن سۇراماعان تۇركمەنستان بيلىگى جاڭا جىلدان باستاپ اۋىز سۋ ءۇشىن ەلدەن اقى الا باستايدى. جەردى قويىپ مۇمكىندىگى بار جۇرتتار مارس پەن يۋپيتەردەن سۋ ىزدەپ كەتتى. عالامدىق جىلىنۋدىڭ سەبەبىنەن لوندون، شانحاي سەكىلدى قالالار سۋ استىندا قالۋى مۇمكىن دەگەن اڭگىمەلەر بەدەلدى باسىلىمداردىڭ بەتىندە باسىلا باستادى. سوندىقتان دا سۋ ماسەلەسى باستى تاقىرىپتاردىڭ ىشىندەگى ەڭ باستىسى. ءبىزدىڭ ەلدىڭ تۇرعىندارى دا ءمان-جايدى تەرەڭنەن ۇعىپ، الەمدە ورىن الىپ جاتقان وزگەرىستەردەن حاباردار بولۋى كەرەك. بۇل رەتتە مۇنداي سايتتىڭ جۇمىس ىستەگەنى وتە ماڭىزدى.

-يدەيا قايدان كەلدى؟

-سۋ سالاسىنا قىزمەتكە كەلگەنىمە ەكى جىلدان استى. وسىعان دەيىن قانداي ءبىر باستامامىز ىسكە اسىپ جاتسا، ول سۋ رەسۋرستارى كوميتەتىنىڭ توراعاسى يسلام مىرزا ابىشەۆتىڭ سەنىمى مەن قولداۋى. ول كىسىنىڭ الدىنا بارعان بىردە-ءبىر قىزمەتتىك حاتىم ەسكەرىلمەي كەرى قايتقان ەمەس. مۇنى ىسكەر باسشىنىڭ جاس ماماندارعا دەگەن قولداۋى دەپ ءتۇسىندىم. ءار وڭىردە ورنالاسقان سۋ نىساندارىنىڭ جاعدايىن وسى كىسىدەي بىلەتىن ادام جوق دەسەم ارتىق ايتقاندىعىم ەمەس. يسلام ءالماحانۇلىنىڭ قاراماعىندا، تۋراسىن ايتقاندا تاربيەسىندە بولعانىم مەن ءۇشىن ابىروي، ءارى مول تاجىريبە. سايت يدەياسىڭ اۆتورى وسى ادام.

-تۇسىنىكتى. ال ەندى سايتتىڭ قۇرىلىمىنا، جالپى اتقارىلاتىن ءىس-شارالارعا توقتالىپ وتسەڭىز.

-سايت تەك وزىمىزدەگى ەمەس، سونىمەن قاتار جاھانداعى سۋعا قاتىستى بارلىق جايتتاردى جاڭالىق رەتىندە ۇسىنادى. نەگىزى باسىمدىقتى تانىمدىق كونتەنتكە بەرەمىز. الداعى ۋاقىت قولدانۋشىلار ەلىمىزدىڭ ءار وڭىرىندە ورنالاسقان سۋ قويمالارىن 3D نۇسقادا تاماشالاي الادى. كاسىپكەرلەردىڭ بازاسىن دايىنداپ جاتىرمىز. ول جەردە كەز-كەلگەن قولدانۋشى وزىنە قاجەتتى شارۋا قوجالىعى تۋرالى اقپاراتقا قول جەتكىزەتىندەي مۇمكىندىك جاسايمىز. جىل سوڭىنا دەيىن 30 000 كاسىپكەر تۋرالى مالىمەت جۇكتەلەدى. سايت قىزمەتىنىڭ كەلەسى كەزەڭىندە قازاق تىلىندە جاريالانعان بارلىق ماتەريال ورىس، اعىلشىن تىلدەرىندە ۇسىنىلادى. جاڭا جىلدان كەيىن «تسيفرلى قازاقستان» باعدارلاماسى اياسىندا ەلەكتروندى قۇجات اينالىمى ىسكە قوسىلادى. وسىنىڭ كومەگىمەن ەلىمىزدىڭ ءار وڭىرىندەگى شارۋا قوجالىقتارى يەلەرى سۋعا قاتىستى وپەراتسيالارىن ونلاين تۇردە جۇزەگە اسىرادى. تاعى ءبىر تىڭ باستاما – مىڭداعان سۋ نىساندارى بەينەلەنگەن ينتەراكتيۆتى كارتا جۇمىس ىستەيدى. ءار وبلىستاعى سۋارمالى جەرلەرگە قاتىستى مالىمەتتەردىڭ بارلىعى وسى كارتادان كورىنىس تابادى. وزىمىزدەگى وزەن-كولدەردىڭ ەرەكشەلىگى، ولاردىڭ 25 جىل ىشىندە قالاي وزگەرىسكە تۇسكەنى، رەسپۋبليكالىق ماڭىزى بار سۋ نىساندارىنىڭ جاي-كۇيى جايىندا دا اقپار ۇسىنامىز. اۋىلشارۋاشىلىق سالاسىن دا قامتيمىز. اسىرەسە شارۋا قوجالىق باسشىلارى، بىلىكتى سۋ ماماندارى، وسى سالانىڭ ارداگەرلەرى مەن ەكولوگتار، قوعام قايراتكەرلەرىنىڭ وي-پىكىرلەرىن ۇسىنامىز. بۇلاردان بولەك، جالپى سۋعا قاتىستى بارلىق ماسەلەلەر بويىنشا ازاماتتاردان ارىز-تىلەكتەر قابىلدانادى. ولاردىڭ تىكەلەي جاۋاپتى باسشىلارعا جەتۋىنە اتسالىسامىز. جالپى العاندا Su24.kz قازاقستاننىڭ سۋ ساياساتىنا ۇلەس قوسادى.

-راحمەت، ازامات مىرزا. باستامالارىڭىزعا ساتتىلىك تىلەيمىز. ەلىمىز سۋدان تارشىلىق كورمەسىن دەيمىن.

-سىزگە دە راحمەت!

پىكىرلەسكەن نۇربيكە بەكسۇلتانقىزى

Abai.kz