الەۋمەتتىك جەلىنى اشىپ قالسام: وكپە، رەنىش، زاپىران. قازاق قوعامى اشىنعان: قازاقتىڭ جوعىن جوقتاي الماي، بىراق قازاقتىڭ نانىن جەپ جۇرگەندەرگە وكپەسى قارا قازانداي. كەلمەسكە كەتكەن، قازاقتىڭ ساناسىن ۋلاپ، باسىن جالماعان قان ءتۇستى قىزىل جۇيەنىڭ ارۋاعىن تىرىلتكىسى كەلەتىندەردى ءتۇتىپ جەۋگە دايار. كىمگە رەنجيمىز؟

ء"ار حالىققا وزىنە ساي بيلىك بەرەمىز" دەپتى جاراتۋشى يەمىز. قازاقتىڭ اۋليەسى ءماشھۇر ءجۇسىپ جەتكىزگەن قازاق ماقالىندا: "ادامنىڭ ەڭ ازعىنى اكەسىن ولتىرگەنمەن دوس بولادى، ەڭ جامانى قاتىنىنىڭ ويناسىمەن دوس بولادى" دەلىنگەن. تۋرا بىزدەگى جاعداي. الىپ قوسارى جوق. اكەمىزدى ولتىرگەن، الاش انامىزدى زورلاعان قىزىل جۇيەمەن دوس بولۋ، اشىنا بولۋ قاي قيسىنعا سىيادى؟ نەدەن سورلى بولدىق؟ نەگە باعىمىز جانبايدى؟ نەگە اتا ءتىلىمىز تۋعان جەرىندە سالتانات قۇرمايدى؟ نەگە؟ نەگە؟ نەگە؟ نەگە ءالى كۇنگە دەيىن: "وزىمدىكى دەي الماي ءوز مالىڭدى، كۇندىز كۇلكىڭ بۇزىلدى، تۇندە -ۇيقىڭ".

جاۋابى بىرەۋ-اق - وتارشىلدىق. وتار بولدىق. مويىندامايمىز. قازاقتىڭ ۇلى دەنەسىنە تۇسكەن قاندى جارانى كورسەك تە كورمەگەندەي بولامىز. جاسىردىق. ەندى ءولىپ بارامىز. دىمىمىز شىقپاي ءولىپ بارامىز. ءبىز دە سىن دا جوق، ۇيات تا جوق. ويتكەنى "قۇس ىلگەن قۋدا سىن جوق ۇياتپەن". قايران ماحامبەت!

يمپەريانىڭ قوس باستى قۇسى ىلگەن قازاق قۋدا سىن دا جوق، ۇيات تا جوق. كۇشىگىندە تالانباعان، قۇستىڭ تىرناعى باتپاعان، "جالعىز ءجۇرىپ وتتامايتىن، اققۋ قۇستىڭ تورەسىندەي", ءسانى دە سالتاناتى بويىندا، بويىنداعى قاسيەتى مەن كيەسىن توگىپ الماعان تەكتى ۇرپاق كەرەك بىزدەرگە!

ول ءۇشىن اۋىر دا بولسا مويىنداپ، قاندى جارامىزدىڭ بەتىنە تۇز سەۋىپ، قۇرىم كيگىزدى وتقا كۇيدىرىپ باسىپ، وتارسىزدانۋىمىز كەرەك! قورقا- قورقا بولدىق. شەگىمىزگە جەتتىك. وزەكتى ەرگە ءبىر ءولىم. الاش انامىزدى ساتىپ، ارسىزدىقپەن ۇياتسىزدىقتان، قورقاقتىق پەن ەزدىكتەن كۇندە ولگەنشە، ءبىر-اق رەت ولەيىك! بىزگە ءبىر اللا جار بولسىن!

ومار جالەلۇلىنىڭ facebook پاراقشاسىنان

Abai.kz