كومسومولدىڭ قاتارىندا بولعانىم ءۇشىن، الاش ارۋاقتارى الدىندا كەشىرىم سۇرايمىن!
ماسەلە كومسومولدىڭ 100 جىلدىعىن تويلاعاندا/تويلاماعاندا ەمەس. ماسەلە سونداي ۇيىمنىڭ ءبىزدىڭ ەلىمىزدە بولعانىنا، سول وڭباعان ۇيىمعا مۇشە بولعانىمىزعا وكىنىش (پوكايانيە) بىلدىرە بىلۋدە.
مەن دە بىلمەستىكتەن 14 جىل قاتارىنان سول قانقۇيلى ۇيىمنىڭ مۇشەسى بولدىم. سوعان قاتتى وكىنىشىمدى بىلدىرەمىن.
ويتكەنى ولار ءبىزدى تەرىس وقىتتى. تاريحتان الاش ارىستارىنىڭ اتتارىن سىزىپ تاستاپ، اتاۋعا دا تىيىم سالدى.
اۋقاتتى قازاقتاردىڭ مال-مۇلىكتەرىن تاركىلەۋگە ات سالىستى. قازاقتى ۇجىمشارعا كۇشتەپ تىعۋعا، ءسويتىپ اسىل حالقىمنىڭ جارتىسىنا جۋىعىنىڭ جەر بەتىنەن جويىلىپ كەتۋىنە بەلسەنە تۇرىپ كىرىستى.
ۇلتىمىزدىڭ قايماعىن سىپىرىپ تاستاعان ساياسي قۋعىن-سۇرگىننىڭ باسى-قاسىندا ءجۇردى. قۇدايعا دا قاجەتى جوق سوعىسقا قازاقتىڭ جاستارىن ايداپ سالدى.
تىڭ جەردى يگەرۋ دەگەن سىلتاۋمەن قازاقتىڭ مال جايۋعا تاپتىرماس شۇيگىن جەرىن جىرتىپ تاستاعان كەزدە دە سول كومسومولار بەلسەندىلىك كورسەتىپ ءجۇردى.
ەڭ اقىرى، مەكتەپ بىتىرگەن تۇلەكتەردى "جاستار بريگاداسى" دەگەن سىلتاۋمەن قويدىڭ سوڭىنا كوگەندەپ قويعىلارى دا كەلدى...
ايتا بەرسەڭ، قىلمىستارى شاش-ەتەكتەن...
سوندىقتان دا مەن كومسومولدى جەك كورەمىن. سول ۇيىمنىڭ قاتارىندا بولعانىما وكىنىشىمدى بىلدىرەمىن. الاش ارۋاقتارى الدىندا كەشىرىم سۇرايمىن.
ناعاشىباي ەسمىرزانىڭ facebook پاراقشاسىنان
Abai.kz
