«Kazakh Tourism» اق ۇلتتىق كومپانياسى ءتۋريزمنىڭ بارلىق سالاسىن قامتيتىن  «NATIONAL TOURISM AWARDS-2018» سىيلىعىن جاريالادى، دەپ حابارلايدى اباي-اقپارات قازاقپاراتقا سىلتەمە جاساپ.

تۋريزم سالاسىنداعى ۇلتتىق بايقاۋ سالا يندۋسترياسىن دامىتۋداعى جەتىستىكتەرى ءۇشىن بەرىلەتىن ماراپات رەتىندە تاعايىندالدى.

ماقساتى - ەلىمىزدىڭ ىشكى جانە سىرتقى ءتۋريزمى سالاسىنداعى ەڭ تابىستى جوبالاردى، تۋرونىمدەر مەن ۇزدىك تۋروپەراتورلاردى انىقتاۋ. سونداي-اق، سالاعا ينۆەستيتسيا تارتۋ مەن تۋريستىك ونىمدەردىڭ بىرىڭعاي اقپاراتتىق بازاسىن قۇرۋ.

بايقاۋعا قاتىسۋعا تۋريزم سالاسىنا قاتىستى ۇيىمدار مەن ونىڭ وكىلدەرى شاقىرىلادى.

17 ارنايى جانە 2 قوسىمشا نوميناتسيادان تۇراتىن بايقاۋعا ءوتىنىم 2018 جىلدىڭ 10 قاراشاسىنا دەيىن قابىلدانادى، ال 19-28 قاراشا ارالىعىندا ونلاين داۋىس بەرۋ جۇرگىزىلەدى. ماراپاتتاۋ ءراسىمى وسى جىلدىڭ 8 جەلتوقسانىندا استانادا وتەدى.

«NATIONAL TOURISM AWARDS-2018» بايقاۋىنىڭ نوميناتسيالارى:
- «جىلدىڭ ۇزدىك جوباسى» (فەستيۆالدەر، بايقاۋلار، كورمەلەر، كونتسەرتتەر، كارناۆالدار، سونىڭ ىشىندە بالالارعا ارنالعان);
- «ۇزدىك تۋريستىك كومپانيا»;
- «شەتەلدىك تۋريستەر ءۇشىن ۇزدىك تۋريستىك ءونىم»;
- «وتاندىق تۋريستەر ءۇشىن ۇزدىك تۋريستىك ءونىم»;
- «ۇزدىك گيد-ەكسكۋرسيا جۇرگىزۋشىسى»;
- «ۇزدىك بيزنەس قوناق ءۇي»;
- «تۋريستەر ءۇشىن ۇزدىك قوناق ءۇي» (ۇسىنىلاتىن قىزمەتتەر تىزىمىنە سايكەس);
- «ۇزدىك ايماقتىق قوناق ءۇي»;
- «ۇزدىك شيپاجاي» (قىزمەت كورسەتۋى، تازالىعى، قىزمەتكەرلەر قۇرامى);
- «ۇزدىك حوستەل»;
- «بالالار مەن جاستارعا ارنالعان ۇزدىك تۋريستىك جوبا»;
- «تۋريزم سالاسىنداعى ۇزدىك يدەيا» (بۇرىن ىسكە اسىرىلماعان);
- «تۋريزم تۋرالى ۇزدىك Instagram پاراقشا»;
- «جىلدىڭ Travel فوتوگرافى»;
- «قازاقستان ءتۋريزمى تۋرالى ۇزدىك ماقالا»;
- «تۋريزم تاقىرىبىنداعى ۇزدىك TV جوبا»;
- «تۋريزم بويىنشا ۇزدىك ينتەرنەت جوبا». قوسىمشا نوميناتسيالار:
- «تۋريزمگە قوسقان ۇلەسى ءۇشىن»;
- «قازاقستان ءتۋريزمىن دارىپتەۋگە قوسقان ۇلەسى ءۇشىن».

بايقاۋعا ءوتىنىم مەن وعان قاتىستى تولىق مالىمەتتى www.tourismawards.kz سايتىنان بىلۋگە بولادى.

Abai.kz