مۇرات قابىلباەۆ – ون ءبىر بالانىڭ اكەسى. ول اقمولا وبلىسىندا بالا اسىراپ الۋشىلار مەن الەۋمەتتىك قوزعالىستاردىڭ ۇيىمداستىرۋشىلارى اراسىندا تانىمال تۇلعا. مۇرات  «بالا - وتباسىندا ءومىر ءسۇرۋى كەرەك» قوعامدىق قوزعالىسىنىڭ بەلسەندى مۇشەسى. سونداي-اق، ارۋجان سايننىڭ «دوم» قوعامدىق قورىندا جانە  «قازاقستاندا جەتىمدەر جوق» جوباسىندا جۇمىس ىستەيدى.  usynovite.kz سايتىنىڭ رەداكتورى.

ءسىزدى اتا-انا قارۋىنسىز قالعان ون شاقتى بالانى اسىراپ العان ازامات رەتىندە بىلەمىز. مۇنداي قادامعا بارۋىڭىزعا نە سەبەپ بولدى؟

-ايەلىم ەكەۋمىز ۇيلەنگەننەن كەيىن توعىز جىل بالا سۇيە المادىق. توعىز جىلدان كەيىن يبراحيم ەسىمدى ۇلىمىز ومىرگە كەلدى. ۇلىم جاسقا تولعاننان كەيىن، ايەلىم ەكەۋمىز بالالار ۇيىنەن بالا اسىراپ الۋ تۋرالى شەشىمگە كەلدىك. باستاپقىدا كىشكەنە جاستاعى ءۇش بالانى اسىراپ الۋ تۋرالى ويلاعانبىز. ويتكەنى، ۇلكەن بالالاردى تاريبەلەۋ قيىن بولادى عوي. بىراق، ويلانا كەلە مەن ول قاعيدانى بۇزعىم كەلدى. سەبەبى، ەرەسەك بالالار دا وتباسى جىلۋىن كورۋى كەرەك قوي. ءسويتىپ، ون بالانى اسىراپ الدىم. ولاردىڭ ىشىندە ورىس، ۋكراين، تۇرىك، تاتار، پولياك سياقتى ءارتۇرلى ۇلت وكىلدەرى دە  بار.

ءسىزدىڭ ىستەپ جاتقان جۇمىسىڭىز دا قايىرىمدىلىق قورلارىمەن تىعىز بايلانىستى. سول قورلاردىڭ جۇمىسى تۋرالى ايتىپ بەرسەڭىز...

- مەن ارۋجان سايننىڭ «دوم» قوعامدىق قورىندا جۇمىس ىستەيمىن. ول قوردىڭ جۇمىس ىستەپ كەلە جاتقانىننا 11 جىلدان استى. سونداي-اق، «كازاحستان بەز سيروت» اتتى جوبامىز دا بار. ءبىز وندا، بالا اسىراپ العىسى كەلەتىن اتا-انالارعا كومەك كورسەتەمىز. سونداي-اق، ونلاين كەڭەستەر بەرەمىز. قازىر بىزگە قازاقستاننان بولەك، قىرعىزستاننان، رەسەيدەن ازاماتتار حابارلاسىپ، كەڭەستەر الىپ جاتادى. سونداي-اق، وسى باعىتتا جۇمىس ىستەيتىن usynovite.kz دەگەن سايتىمىز دا بار. وسى اتقارعان ىستەرىمىزدىڭ ناتيجەسىندە “التىن جۇرەك” سىيلىعىن الدىق.

سونداي-اق، بيىل  “قازاقستاننىڭ 100 جاڭا ەسىمىنە” ەندىڭىز؟ بۇل جوبا سىزگە نە بەردى؟

-ءيا، مەنى ول جوباعا ءۇش ورگانيزاتسيا ۇسىندى. ول – بۋراباي اۋدانىنىڭ اكىمدىگى، ارۋجان سايننىڭ قورى جانە اقمولا وبلىستىق اسسامبلەيا مۇشەلەرى. بۇل جوبا جەڭىمپازدارى ونلاين داۋىس بەرۋ ارقىلى ىرىكتەلدى.

ماعان بۇل جوبا – جاڭا مۇمكىندىكتەرگە جول اشتى. ءوز جوبامنىڭ كەڭىرەك تانىلۋىنا سەپتىگىن تيگىزدى. سونىڭ ارقاسىندا، جوعارىدا ايتقانىمداي شەت ەل ازاماتتارىمەن بايلانىس ورناتتىم. ەندى، الداعى ۋاقىتتا ءوزىم جۇزەگە اسىرىپ جاتقان جوبامنىڭ توڭىرەگىندە ونلاين مەكتەپ اشايىن دەپ جاتىرمىن.

ءسىزدىڭ “پوكاجي منە نەبو...” اتتى كىتابىڭىز شىعىپتى.  ول نە جايىندا؟

-ءيا، ول كىتاپ 2015 جىلى شىققان. بىزدە بالا اسىراپ العان اتا-انالار ءوز تاجىريبەلەرىمەن بولىسە بەرمەيدى. سوندىقتان ءبىز سونى جازۋ ارقىلى وقىرماندارعا جاڭا ۇيگە كەلگەن بالالاردىڭ پسيحولوگياسى قانداي بولاتىنىن ايتقىمىز كەلدى. جالپى، ول كىتاپتا بالا اسىراپ العىسى كەلەتىن اتا-انالارعا ارنالعان كەڭەستەر جانە جەتىم بالالاردىڭ تاعدىرى تۋرالى جازىلعان. ەندى سول كىتاپتىڭ جالعاسىن شىعارۋدى جوسپارلاپ وتىرمىن...

قازىر قوعامدا تالقىلانىپ جاتقان “رۋحاني جاڭعىرۋ” باعدارلاماسى تۋرالى ويىڭىزدى بىلسەك...

مەنىڭ ويىمشا، بۇل دەر كەزىندە قولعا العان ماڭىزدى باستاما. سەبەبى، قازىر كوبىمىز ماتەريالدىق بايلىقتىڭ سوڭىنا ءتۇسىپ كەتتىك. قاراپايىم ادامي قاعيدالاردى ەستەن شىعارىپ جاتامىز. ال، بۇل باستاما ءبىزدىڭ كىم ەكەنىمىزدى، تاريحىمىز بەن مادەنيەتىمىزدى تەرەڭ تۇسىنۋگە سەپتىگىن تيگىزەدى. بىلايشا ايتقاندا، قوعامدى قايتا جاڭعىرتۋعا باعىتتالعان جوبا دەپ ەسەپتەيمىن. سوندىقتان، بۇل بارلىعىمىز ءۇشىن ماڭىزدى ءارى قۇندى جوبا.

نۇربيكە بەكسۇلتانقىزى

Abai.kz